Неень шкане Мордовиянь районтнэсэ ды оштнесэ эрицятне эрьва мейсэ лездыть специальной военной операциянь участниктненень. Седеймариця ломантне пурныть гуманитарной лезкс, ламот сынсь пачтить эйсэст минек ёнксонь цёратненень. Социальной ламо учреждениятнесэ: эйдень кужотнесэ, школатнесэ, библиотекатнесэ ды культурань кудотнесэ – спецоперациянть ушодовомадо мейле кармасть воинтнэнень кекшемань алтымань кодамо. Школасо тонавтницятне сёрмадыть сёрмат, конатненень пек кенярдыть минек боецтнэ, эйдень кужонь эйкакштне анокстыть артовкст.
Аволь пек умок савсь улемс Покш Березникень райононь Чугур велесэ, зярдо тосо ютавтовсь Эрзянь ды мокшонь раськень регионъютконь общественной вейсэндявксонь исполкомонь промксось.
Шугуровань средней школань актовой залсонть улемстэ весе участниктне сцена лангсто редизь кекшемань алтымань кодамонь тарканть. Кевкстеманок лангс, кие топавты те паро тевенть, школань музеень прявтось Валентина Михайловна Арапова мерсь: «Тей сеедьстэ сакшныть Чугур велень ламот эрицятне, сынь эсест примерэст лангсо те тевентень явовтыть мелест школасо тонавтницятненьгак».
Неть читнестэ специальной военной операциясонть Покш Березникень райононь участниктненень лездамонь группастонть рединек истямо пачтямо: «Ушодтано Чугур велестэ. Исяк тов якинек минек цёратнень туртов гуманитарной лезкс мельга. Те велень седеймариця, эрьва ков кенериця авась Валентина Семёнова вейсэ ялганзо марто уш аволь васенцеде теить покш лезкс. Валентина Яковлевнань валонзо коряс, сынст велень эрицятнень ютксто аламот кить кадновить ве ёнов.
Кекшемань алтыматнень кодамсто тейтерь-аватне сайсть мель воинтнэнень пурнамс ярмакт ды рамамс сехте эрявиксэнть: нардамот, носкат, футболкат, ацамот ды ламо мезе лия. Эзизь кадо сынст тантей ярсамопельтемеяк, рамасть тустомтозь ламбамо ловсо. Кадовозь ярмактнень лангс рамасть алтымань кодамс коцт. Те велень вейке эрицясь, кие эзь мере ёвтамс лемензэ, кандсь 10 килограммат сахар.
Весе пурназь ули-паронть сынсь путызь автомобильс, крёстызь ды мерсть пачтямс минек воинтнэнень. Сынст пельде мерсть ёвтамс сюкпря сетненень, кить ванстыть минек сэтьмечинть».
Виде, истят пачтямотнеде социальной сеттнесэ пек ламо, ломантне седейшкава лездыть, алкукс пиить-палыть минек цёратнень кисэ.
* * *
Неть читнестэ совсинь Казанень Пазонь Авань пазаванть лемсэ храмонтень, косо эрьва чистэ тейтерь-аватне зярдо ськамост, зярдо семиянек, сакшныть изнямонь чинть малавгавтомо, истя жо минек цёратненень лездамо.
Кенярксчистэ тосо вастыя эрзянь аванть Вера Соломоновань, конась малав эрьва чистэ якси тов важодеме. Сон кеми, минек боецтнэнь куроконь изнямонтень. Вановтонзо коряс, тов эрьва сыцясь тевензэ топавты седейшкава.
Тоско жо теевинь содавиксэкс «Всероссийский государственный университет юстиции» ФГБУ-нь ВО-нь Средне-Волжской институтонь Мордовиясо филиалонь гуманитарной ды специальной дисциплинатнень кафедрань доцентэнть Елена Фёдоровна Черёмушкина марто.
Елена Фёдоровна пингень перть важоди республикань вузтнэсэ, тонавты студентт англань келентень. Сон умок сакшны Казанень Пазонь Авань пазаванть лемсэ храмонтень.
Специальной военной операциянть ушодовомадо мейле кармась содамо, Саранскоень Иоанно Кронштадской лемсэ храмонь настоятеленть о.Владимирэнь баславамонзо вельде Мордовиянь церьковатнесэ васенцекс ушодсть гуманитарной лезксэнь пурнамо. Самай тосо тонавтнесь те паро тевенть топавтомо, кекшемань алтыматнень кодамо. Пек кенярдсь, зярдо кудо маласо храмсонтькак кундасть воинтнэнень лездамо. Ней малав эрьва чистэ важодемадо мейле ды оймсема читнестэ сакшны Казанень Пазонь Авань пазаванть лемсэ храмонтень изнямонь чинть малавгавтомо, воинтнэнень лездамо.
Валентина Юдина