Ромодановань районсо перерабатывающей кавто покш предприятият: «Ромодановосахар» ООО-сь ды «АПО Элеком» ОАО-сь. Иестэ иес касты производствань невтевксэнзэ «Ромодановосахар» ООО-сь. Истя жо парсте тевест ютыть велень хозяйствань продукциянь нолдамосо «Комсомолец» и К» ООО-нь ТНВ-сэ, АПО «Элеком» ОАО-со, «ООО МАПО и К» ТНВ-сэ, «Комсомолец» ООО-со, «Ромодановское» ды «Атьма» ООО-тнесэ.
Седе, кода аштить тевтне райононть социально-экономической невтевкстнэнь виевгавтоманть, вишка ды средней предпринимательстванть келейгавтомань, туризманть туртов паро условиятнень теемань ды ламо лия кевкстематнень эрямос совавтомань коряс минь кортнинек Ромодановань муниципальной райононь администрациянь прявтонть Сергей Валентинович ВЕДЯШКИН марто.
– Сергей Валентинович, ловозь чить кадовсть Велень хозяйствань ды перерабатывающей промышленностень кенярксчинть самс. Кодамо невтевкс марто сонзэ вастыть Ромодановань райононь велень хозяйствань предприятиятнесэ важодицятне?
– Тешкстаса, 2021 иень ды те иень кото ковтнень перть улить паро полавтомат райононь социально-экономической невтевкстнэнь коряс. Истя, мелят, манынь коряс собственной доходтнэ ламолгадсть 28,6 %. Сындест райононь консолидированной бюджетс састь 122389,3 тёжат целковойть. Икелепелев тешкстазесь топавтовсь 135,6 %. 2022 иень кото ковтнень перть арсезь собственной доходтнэ топавтовсть 148,9 %, райононь бюджетс састь 61 620 тёжат целковойть. 2022-2024 иетнестэ арсеви неть невтевкстнэнь кастомс 110,1 %.
Велень хозяйствань ды крестьянонь-фермерэнь организациятне мелят мисть 26207,7 тоннат ловсо, манынь коряс те аравтлувось топавтозель 103,5 %. Те иень кото ковтнень перть ловсодонть тевс нолдазь 12 943,5 тоннат. 2024 иентень неть невтевкстнэнь арсеви кастомс иезэнзэ 26939 тоннас.
Ракшатнень ламолгавтомань коряс тевтне аштить истя: велень хозяйствань ды крестьянонь-фермерэнь организациятнесэ мелят сывельденть мисть 863,4 тоннат, манынь невтевкстнэнь коряс аравтлувось топавтовсь 100,6 %.
Ютазь иень теке жо шканть коряс ракшатне ламолгадсть вейке ды нилеце пель процентс. Истя, икелепелень арсезь аравтлувось топавтовсь 136,1 %. 2024 иенть самс арсеви сывелень производстванть ламолгавтомс иезэнзэ 881 тоннас.
Неень шкане паксятнесэ эште поладовить велень хозяйствань тевтне, ламбамо якстерькаень таргамось ды сонзэ тевс нолдамось.
– Кода ютыть тевтне «Ромодановосахар» ООО-со? Эдь Мордовиясо те вейкине предприятия, косо нолдави сахар.
– Виде, промышленной продукциянь нолдамосо ды миемасо Ромодановань муниципальной районсо сехте ламо теи (95 %) «Ромодановосахар» ООО-сь. Истя, маныть те предприятиясь продукция нолдась 4658 212 тёжат целковоень питнес.
Тешкстаса, те предприятиясонть продукциясь иенть перть нолдави аволь вейкетьстэ, сехте покш тевтне эрсить сёксня, зярдо тов ушодыть пачтямо ламбамо якстерькаенть.
Те иень кото ковтнень перть «Ромодановосахар» ООО-со нолдазь продукциядонть миезель 3072 548 тёжат целковойс. Питнетнень кастомаст мельс саезь, аравтлувось топавтовсь 106,3 %.
– Мордовия Республикань Прявтонть МР-нь Госсобраниянтень ды республикань эрицятненень Кучомасонть башка мель явови инвестициянь проекттнэнь эрямос совавтомантень ды важодемань од таркатнень теемантень. Кода ютыть тевтне неть кевкстематнень коряс?
– Тешкстасынек, 2021 иестэ вишка бизнесэнь коряс инвестиционной проекттнэнь эрямос совавтомсто теезельть важодемань 66 од таркат, ютксост 64 – «Европак» ООО-со. Теде башка, Ромоданова посёлкасонть панжовсь «Победа» микшнемань сетень од объект, ков мольсть важодеме 13 ломанть.
2022 иень васенце пельксстэнть аволь бюджетэнь инвестициятне, конат совить основной капиталс, кармасть 588 366 тёжат целковойть. Эйстэст пеледест ламотне (58,3 %) теевсть «Ромодановосахар» ООО-со. Те невтевксэсь ютазь иень теке жо шканть коряс кастовсь 1,3-ксть.
2022-2024 иетнестэ арсеви совавтомс эрямос истят инвестициянь проектт, кода «Комплекс селекционно-семеноводческого центра по производству семян сельскохозяйственных культур в ООО «Ромодановское». Те проектэсь ушодовсь 2019 иестэ, питнезэ – 280 млн целковойть. «АПО Элеком» ОАО-со поладови комбикормовой заводонть витнемась-одкстомтомась. Те проектэсь ушодовсь тевс нолдавомо 2020 иестэ, арсеви прядомс 2022 иень 4 кварталсто, питнезэ 245 млн целковойть.
Неень шкане прядовома лангсо «МАПО и К» ТНВ ООО-нь животноводческой помещениянь стявтомась, косо кармить кирдевеме 430 прят потявтовиця скалт. Вейсэ ловсонь блоконть марто питнезэ карми 54 млн целковойть. Виде, улить эштё ламо проектт, конатнень лангсо неень шкане важодить Ромодановань райононь эрицятне. Учневи, аволь бюджетэнь финансированиянь инвестициянь средстватнень вельде 2022 иестэ районс сыть 892 693 тёжат целковойть, 2023 иестэ – 955 301 тёжат целковойть, 2024 иестэ – 1.040 323 тёжат целковойть.
– Сергей Валентинович, меельце шкасто минек республикасо ламо тееви туризманть виевгавтоманзо коряс. Кода аштить тевтне тень коряс тынк районсо?
– Ромодановань муниципальной райононь территориясо улить православной кавто монастырть. 1835 иестэ Курилова кезэрень эрзянь велесэ теезель Свято-Троицкой тейтерь-авань монастыресь. Тосо улить келейной, настоятельской ды гостиничной корпуст. Те монастыресь меельце шкастонть одкстомтови. Истя, 2014 иестэ храмонть велькссэ кепедезель од куполось. Те монастыресь тееви яла седеяк содавиксэкс. Тов кармасть сакшномо аволь ансяк минек райононь, республикань эрицят, истя жо Мордовиянь томбальдеяк.
Аволь пек васоло эйстэнзэ Покш Чуфарова велесь, тосо Свято-Троицкой цёрань монастыресь. 1994 иестэ сонзэ вельмевтемадо мейле, те таркась истя жо теевсь содавиксэкс масторонь келес, сеедьстэ тов сакшныть шабра регионстояк.
Аволь пек умок Свято-Троицкой Чуфаровской цёрань монастырьсэ ютавтовсь «Волонтёры наследия» республиканской выездной сессиясь. Кавтосядто ламо паломникть тов сакшность Саранскойстэ, истянь зняро жо Пензань, Саратовань, Нижегородской областтнестэ. Монастырьсэнть служить кемень священнослужительть.
Эрьва иестэ мелень витиця тевекс кода минек ёнксонь ломантненень, истя жо инжетнененьгак ледстневицякс кадови «ВкусФест» райононь кизэнь кухнянь фестивалесь. Раськень (национальной) кухнясь терди весень лезэв ды тантей ярсамопелень варчамо.
Те фестиваленть прявт тевезэ – кезэрень ярсамопельтнень вельмевтемась, покштятнень-бабатнень пидевксэст-паневксэст ледстямось, межнациональной ояксчинь сюлмотнень ладямось. Тесэ свал невтевить «Мордовское», «Татарское», «Армянское» подворьятне, косо каванить тантей ярсамопельсэ. Сынст варчамодо мейле весементь мереви рамамс. Мезесь кенярдовты, азортнэ инжетнень вастыть эсест раськень мазый оршамопельсэ. Райононь самодеятельной артисттнэ весе пурнавозтненень невтить концерт, косо гайгить морот, невтевить киштемат ды ловновить стихотвореният.
– Сергей Валентинович, ёвтнеде районсонть Национальной проекттнэнь эрямос совавтомадо ды гранттнэнь коряс важодемадо?
– Тешкстаса, минек райононь организациятне покш мель явить РФ-нь Президентэнть ёндо яволявтозь гранттнэнь лангсо важодемантень. Невтить ёрокчист культурань, искусствань ды шкинемань ёнкстнэсэ. Истя, «Культура» национальной проектэнть лувсо витнезель эйкакшонь искусствань школань основной зданиясь ды филиалось. Весемезэ тень лангс ютавтозь 18 181,8 тёжат целковойть. «Жилье и городская среда» проектэнть вельде Ромоданова посёлкасо 1 726,0 тёжат целковойс витнезь ды одкстомтозь кудотнень перька таркатне.
«Содействие развитию автомобильных дорог регионального, межмуниципального и местного значения» РФ-нь «Развитие транспортной системы» государственной программанть вельде Ромоданова посёлкасо витнезь кавто кить. Кувалмост весемезэ – 2,32 вайгельбеть, 26 789,37 тёжат целковоень питнес.
«Жилье» республиканской целевой программанть эрямос совавтомсто Мордовия Республикань ки лангонь фондонь средстватнень вельде витнезь автомобильной 5 кить, конатнень кувалмост 2,58 вайгельбеть. Питнест стясь 17 665,0 тёжат целковойть. Ютазь иестэ «Безопасные качественные автомобильные дороги» национальной проектэнть лувсо витнезельть эштё кавто кить. Сынст кувалмост 8 вайгельбеть, питнест – 76 035 тёжат целковойть.
Национальной проекттнэнь вельде паролгавтовить велетне, стявтовить ды одкстомтовить образовательной учрежденият, эрямо кудот.
Валентина Юдина