Орданьбуев самсто «Эрзянь правда» газетань журналисттнэ свал бажильть вастовомс райононь администрациянь аппаратонь руководителенть Мария Григорьевна Апанина марто.
Ниленьгемень иеде ламо Мария Апанина важодсь Орданьбуень эрицятнень лезэс, эрьва пшкадицянтень, сехте пек васоло велесэ эрицянтень сон бажась теемс весементь, штобу ломанесь туевель кедьстэнзэ седеень витезь, эрявиксэнть топавтозь. Нама, а стяко сон казезь «За доблестный труд» медальсэ, Мордовия Республикань Почетной грамотасо ды ламо лия казнесэ.
Те эрзянь авась, кодамо аютко бу тензэ аволь уле, машты седейшкава инжень вастомо, минек редакциянь журналисттнэнень публикациянь героень муеме, подпискань шкасто газетанок лангс сёрмадстомасонть лездамо.
Сень лангс апак вано, Мария Григорьевна ней пенсиясо, ялатеке вети общественной покш важодема. Сон – Ардатовань Войнань ды трудонь ветеранонь, Правань ванстыця органтнэнь ды Вооружённой вийтнень советэнь прявт. Течи Мария Григорьевна минек редакциянь инже.
– Мордовия Республикань Прявтось Артём Алексеевич Здунов МР-нь Госсобраниянтень ды республикань весе эрицятненень Кучоманзо ушодызе СВО-нь участниктнеде кортамсто. Мария Григорьевна, инескеть, пачтядо, кодамо путовксост Орданьбуень райононь ветерантнэнь минек воинтнэнь эрямост шождалгавтомасо, сыненст лезксэнь максомасо ды патриотической лувсо од ломантнень кастомасо?
– СВО-нь участниктнеде мелявксось течи талновты весень. Тешкстаса, минек ошонь-райононь ветеранонь первичной организациятне а кадновить ве ёнов воинтнэнень лезксэнь максомань тевтнеде. Кода икелеяк, Ветеранонь советэсь неень шкасто покш важодема вети од ломантнень военно-патриотической лувсо кастоманть коряс. Тешкстаса, Орданьбуе ошсо ды районсонть Ине Отечественной войнасо маштовозтненень алтазь кеврунгодонть башка эштё стявтозь памятникть тылэнь тружениктненень ды войнань эйкакштненень, чернобылецтнэнень... Теде башка, эштё улить кавто обелискт.
Ютазь иень кизна панжозель кеврунго сеть воинтнэнень, кить советской войскатнень составсо служасть Германиянь Демократической Республикасо. Кода мерсть те тевенть ушодыцятне, истя сынь мольсть неонацисттнэнь каршо. Неть кеврунготне теезь ветерантнэнь ушодксост коряс, минек ёнкссо чачозтнень ярмакост лангс. Жарёнки велень пенсионерэсь Г. В. Карпушкин, кие служакшнось флотсо, эсензэ кудосо панжсь ВМФ-нь музей.
Районсонок улить ламо содавикс ломанть, Советской Союзонь колмо Геройть, сынст ютксо эрзянь цёрась И. А. Пожарский. Минь вейсэ боевой действиянь ветеранонь общественной организациянть марто ютавттано ламо эрьва кодат мероприятият од ломантнень патриотической воспитаниянть коряс. Райононь Советсэ ули башка тарка, косо ёвтневи воинтнэде-афганецтнэде ды локальной лия войнатнень участниктнеде. Тосо жо улить Украинасо специальной военной операциянть ютавтомсто маштовозтнень фотографияст.
Сеть школатнесэ, косо тонавтнесть боецтнэ, панжовсть мемориальной лазт ды аравтозь героень партат. Истя, ветерантнэнь ушодксост коряс ютавтовить акцият, конат алтавить СВО-нь участниктненень.
Ветеранонь организацияс совицятне свал пурнавкшныть библиотекасо. Тоско ушодынек кекшемань алтыматнень кодамо, теинек уш ветесядто ламо. Пенсионертнэ сакшныть тов эрьва чистэ, теке важодема таркав.
Тешкстаса, минек аватне те тевенть топавтыть аволь ансяк Орданьбуе ошсо, истя жо Чукало велесэ, Тургенева посёлкасо, Баеньбуесэ ды лия велетнесэ. Райононь пенсионертнэнь ютксто теинек «Сиянь» волонтёрт» группа.
– Мария Григорьевна, Орданьбуень районсо эриця пенсионертнэнь кода икелеяк, истя нейгак а вишкине путовксост тынк ёнксонть виевгавтомасо. Мезень коряс течи сынь аштить покш мельспаросо?
– Неень шкане Орданьбуень районсо эрить кавксо тёжат пенсионерт. Минек Ветеранонь советэнтень совить ветеранонь 54 первичной организацият. Сынь аштить покш каштанчисэ минек ёнкссо весе паро тевтнень эрямос совавтоманть коряс. Невтемакс, маныть ушодсь важодеме ведень ванськавтомань станциясь, конань питнезэ 109,5 млн целковойть. Те покш ды питней объектэсь теезель ветерантнэнь ды минек ёнксонь эрицятнень депутаттнэнень кармавтоматнень ды пшкадематнень вельде. Те тевенть эрямос совавтомасо покш путовксост Мордовия Республикань прявттнэнь. Эдь паро тевенть минь учинек малав комсь иеть.
Течи кенярдтано укшномань бассейнанть тееманзо кувалма, ков сеедьстэ якить пенсионертнэяк, ули шумбрачинь группа. Кенярдтано, ошонок паролгавтови «Формирование городской среды» программанть вельде. Парт невтевксэнек велень хозяйствасо, покш путовксонок республикасонок ламо сюронь кастомасо ды лия норовонь пурнамосо.
– Кодат кевкстемат кепсевить ветеранонь промкстнэсэ сыре ломантнень эрямост паролгавтомга?
– Кода райононь, истя ветеранонь первичной организациятнесэ свал кепсевить талновтыця истят кевкстемат, кода ФАП-нть важодемадо, лецямопелень пачтямодо, велень ульцятнева ды калмолангтнес китнень витнемадо, общественной территориятнень ванськавтомадо, модатнень сокавтомадо ды истя седе тов.
Ветеранонь отчётонь-кочкамонь промкстнэс ды конференциятнес минь тердтнетяно райононь прявтонть, райбольницянь прявт врачтнень, сынст полавтыцяст ды медицинань лия специалисттнэнь. Вейсэ мартост толковатано кевкстематнень, конат течи талновтыть сеть велень эрицятнень, косо арасть ФАП-т, а сатыть медицинань важодицят. Нурькинестэ, ветерантнэнь ули мелест весемеде содамс ды лездамс витемс те эли тона стакачинть.
Невтемакс, ули минек истямо оймамонь а содыця вейке пенсионер. Те – агропромышленной комплексэнь первичной организациянь прявтось В. В. Бирюков. Сонзэ ушодксонзо ды важодеманзо вельде минек ошонь вейке ульцясонть панжозь эйкакшонь площадка, теезь велень хозяйствань важодицятненень ды тылэнь тружениктненень кеврунго, сёрмадозь ды нолдазь «Колхозная эпоха: от рассвета до заката» книгась. Ютазь иестэ ванськавтозель ошонь калмазыресь, косто шукштне эзть ливтневе малав комсь иень перть. Тешкстаса, В. В. Бирюковнень 83 иеть, ансяк тень лангс апак вано, сонзэ виензэ сатыть ламос.
Сон сёрмали поздоровт чачома чинь кувалма «Маяк» райгазетас велень хозяйствань предприятиятнень икелень прявттнэнь, специалисттнэнь лемс. Свал максы тенек лезэв превс путомат ветеранонь организациятнень важодемаст паролгавтомань коряс.
– Мария Григорьевна, аволь умок ульнесь сыре ломанень ковось, инвалидэнь декадась. Кодамо мель явовсь тынк районсо эрицятненень, кить пингень перть важодсть тиринь районсонть, ды сетненень, кить стакасто сэредить, улить-арась лездыцят ветеранонь организациянтень?
– Эрьва иестэ сыре ломантненень алтазь ковстонть минь виевгавттано важодеманок ветерантнэнь марто. Районной советэсь меельце иетнестэ покш мель яви ветеранонь активень резервань фондонть теемантень. Эдь неть ломантне ошонь ды Чукало велень поселениянь эрьва ветеранонтень видьстэ кудов пачтить материальной лезкс. Истя пурнынек 100 ломаньстэ ветеранонь актив, ков, ошонь Ветеранонь советэнь члентнэде башка, совасть куротнень комитетэнь прявттнэ, ламо квартирань кудотнесэ эриця пенсионертнэнь ютксто ломантне, кить содавтсть 200 ламо сыре ломанть. Сынь кармасть содамо эрямонь стакачидест, кунсолызь мелест-арсемаст.
Тевенек ладятано райононь ды велень поселениянь администрациятнень, культурань, библиотекатнень ды лия учреждениятнень марто. Сеедьстэ пенсионертнэнь пурнакшнотано Культурань кудос, бажатано тов тердемс васняяк сеть сыре ломантнень, кинь предприятияст пекстазь. Эдь ней сыненст а кинень максомс казнеть.
Минек васень лездыцянок, ветерантнэнень казнень свал максыцянок – Орданьбуень районсо чачозесь-касозесь, Орданьбуе ошонь Почётной гражданинэсь В.В. Литюшкин. Владимир Васильевич эрьва иестэ кенярдовты эйсэнек эсензэ лездамосо, весенень тенек мелень явомасо. Паро, мастор лангсо улить истят ломанть, кить а стувтнить тиринь ёнкстост ды тосо эрицятнеде.
Валентина Юдина