Вторник, октября 27, 2020
Важное

 

Александр Маркович Шаронов – филологиянь наукань доктор, поэт, Россиянь Сёрмадеень вейсэндявксос совиця... Сёрмадындерямс весе сень, ков сови ды мейсэ казезь те превей ломанесь, весе лемтне ды тешкстнэ а кельгить вейке лопаскак. Сёрмадовксонзояк аволь аламо.

Нолдась научной 80 ламо важодевкст, «Мордовский героический эпос» монография (2001).  Теде башка, сёрмады литературань эрьва кодамо жанрасо. Ловныцятнень мельсэ-превсэ аштить «Шокшун», «Кудадей», «Инешкипаз» поэманзо,  «Тюштя» ёвтамозо, «Планета Эра», «Потехония» фантастикань повестензэ, ламодояк ламо валморонзо. Весемеде содавиксэкс, нама, ловови «Масторава» эпосось, конань пурнамонзо ды сёрмадоманзо туртов Александр Маркович эсензэ эрямосто макссь комсте ламо иеть. Ней те эпосось совась аволь ансяк мокшэрзянь литературас, саизе эсь неявикс тарканзо масторлангонь  весе раськетнень литературань сырнень паргосонть.

Весе теде мольсь кортамось А.М. Шароновонь «Монологи» валморонь од пусмонзо презентациясо, кона ульнесь даволковонь 18-це чистэ А.С.Пушкин лемсэ Раськень ловнома кудосо. Эйзэнзэ пурнавкшность содавикс учёнойть, литературоведт, сёрмадейть, общественной вейсэндявксонь прявтт, вузсо тонавтыцят ды тонавтницят, поэтэнть  роднянзо-раськензэ, ялганзо-оянзо, малавиксэнзэ. Вейс пурнавомс ульнесь лия тувталгак: се чистэнть А.М.Шароновонь чачома чизэль. А стяко лембе валтнэде башка казезельть цецят ды казнеть. Вейкесь – Культурань, национальной политикань ды архивень тевтнень коряс министерстванть пельде. Те – «Равось – ояксчинь лей» экспедицияв тердемадо сертификат. Сонзэ каземстэ Культурань, национальной политикань ды архивень тевтнень коряс министрань васенце полавтыцясь А.С.Карьгин ледстизе се шканть, зярдо сонсь тонавтнесь А.М.Шароновонь кедьсэ, нейгак эзизе стувто, кода сон тонавтсь эйсэст, макссь домка содамочить эрзянь-мокшонь фольклоронть, устно-поэтической творчестванть коряс.

Кодамо путовкс А.М.Шаронов тейсь минек раськень литературанть лезэс, теде кортасть философиянь наукань докторось, Н.П.Огарёв лемсэ МГУ-нь профессорось А.А.Гагаев, «Чилисема» журналонь прявт редакторось  Н.И.Ишуткин, сонзэ шкинемань содыцятне – МГУ-нь профессортнэ  О.Ю.Осьмухина, С.П.Гудкова, рузонь поэтэсь А.Громыхин, мокшонь поэтэсь В.Корчеганов ды лият. Паро валт тетянзо лемс ёвтасть тейтерезэ Елена, цёразо Марк, поэтэнть  лелянзо цёрась Н.С.Шаронов.

Пурнавозтне  эзть юта  книгань выставканть вакскаяк, конань анокстызь А.С.Пушкин лемсэ библиотекань национальной ды краеведениянь отделсэ важодицятне. Эйзэнзэ пурназельть А.Шароновонь малав весе книгатне, конат нолдазь Мордовиясо ды омбо масторсо.    

Вастовомась седеяк лембелгадсь, зярдо эсензэ валморотнень кармась ловномо сонсь А.Шаронов. Ламотне алтазельть козяйканстэнь, конань марто сынь эрясть пек кувать ды кона аволь умок тусь эрямосто.

Арасть кавтолдомат сеньсэ, «Монологи»  пусмось, ков совасть  А.Шароновонь рузонь кельсэ малав 500 валморонзо, колмо поэмат («Шапка-невидимка и поэт», «Садко», «Иван и жар-птица»), мусынзе  эсензэ ловныцятнень ды седеяк келейстэ невтьсы «сырнень пингестэ» сазь сёрмадыцянть певтеме  ёрокчинзэ.

Раиса Щанкина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».