А. С. Пушкин лемсэ библиотекасо ютась «Мордовиянь од вайгельть» литературань фестиваль. Те проектэсь – «Россиянь культурань фонд» Общероссийской общественной организациянь грантонь изниця (сон топавтовсь «Культура» нацпроектэнть вельде «Творческие люди» федеральной проектэнть лувсо). Истя, уш майстэ библиотекасо панжовсь Литературань лаборатория.
Тесэ эрзянь, мокшонь, рузонь кельтнесэ сёрмадыця од автортнэнь туртов ютасть мельстуиця вастовомат, мастер-класст, лекцият. Сынст ветясть педагогической наукань докторось, профессорось А.М. Каторова, филологиянь наукань докторось, Н. П. Огарёв лемсэ МГУ-нь профессорось С. П. Гудкова, эрзянь ды мокшонь журналтнэнь важодицятне, минек поэттнэ ды писательтне. Саемга, «Мокша» журналонь редакторось М. В. Аникина ютавтсь «Писательское мастерство» тренинг.
Од сёрмадыцятнень марто вастовомат ютасть Рузаевка, Краснослободск оштнесэ ды Отяжелесэ. Автортнэнь туртов яволявтозель «Мордовиянь од вайгельть» литературань пелькстамонь ютавтомадо. Тердевсть весе: школань тонавтницятне, колледжень ды вузонь студенттнэ. Конкурсов сынь кучсть произведеният зярыя номинациянь коряс: прозань, поэзиянь, драматургиянь.
Литературань фестивальсэ васняяк весе пурнавкшность «Мордовия литературная: связь времён и поколений» научно-практической конференцияс. Лембе вал марто инжетненень пшкадекшнесь А. С. Пушкин лемсэ библиотекань прявтось А. В. Бакулина. Сон пачтясь, проектэсь лиссь мельстуиця, сонензэ явсть мель малав 500 ломанть. Мезе парось, нолдазель «Мордовиянь од вайгельть» од автортнэнь произведенияст марто пусмо, ды теке жо сборникесь лиссь аудиоформатсо.
Ламо ломанть ёвтызь мелест те промкссонть ловномс докладост. Паро кортамо анокстась педагогической наукань докторось, профессорось, МР-нь высшей школань заслуженной роботникесь А. М. Каторова. Сон ёвтнесь эрзянь ды мокшонь литературанть неень шкасто эрямодонзо. Покш полавтоматне кармасть 1985 иеде мейле. Литературанть токизь минек масторонь се шкань социально-экономической условиятне, идеологиянь полавтомась, гонорартнэнь киртямось. Икеле минек ёроков од автортнэнь кучнесть тонавтнеме А. М. Горький лемсэ Литературной институтов, мейле коесь колазель. Бути ваномс 2015-2022 иетнень, Мордовиясо нолдазельть эрзянь, мокшонь ды рузонь кельсэ художественной литературань 190 изданият. Ды юткстост ансяк 22 нолдынзе Мордовиянь книгань издательствась. Те – минек народной писательтнень произведенияст. Книгат нолдасть Россиянь Литфондонь минек республикань отделениясь ды «Книга» издателень кудось. 2021 иестэ саезь художественной произведеният кармась нолдамо Н. П. Огарёв лемсэ МГУ-нь университетэнь издательствась. 70 % весе изданиятнестэ нолдазь авторонь редакциясо, сёрмадыцятнень эсест ярмакост лангс эли спонсоронь.
Меельце иетнестэ виевстэ невтизе прянзо поэзиясь. Бути саемс эрзянь поэзиянть, тесэ эрявить шнамс Людмила Рябовань, сон нолдась ниле книгат; Татьяна Мокшановань лиссть колмо пусмонзо; Алина Подгорновань – колмо, сон сёрмады эрзянь ды рузонь кельтнесэ; улить пусмост Мария Ереминань ды Марина Слугинань. Мокшонь автортнэнь ютксто зярыя сборникть нолдасть Рая Орлова, Полина Алёшина. Рузонь кельсэ сисем сборникть – МР-нь народной писателесь Константин Смородин ды МР-нь народной поэтэсь Камиль Тангалычев – вейксэ пусмот.
А вана прозась зярс виевгады аволь истя, кода поэзиясь. Драматургиясо эряви тешкстамс МР-нь народной писателенть Валентина Мишанинань.
– Ванкшныя «Мордовиянь од вайгельть» пусмонть. Тов совасть лирической ламо миниатюрат, прозаической произведеният. Кецявты, эйсэст ули тиринь ёнксонтень, эсь масторонтень вечкема, улить виев сёрмадовкст, – кортась А. М. Каторова.
Филологиянь наукань докторось, Н. П. Огарёв лемсэ МГУ-нь финнэнь-угрань филологиянь кафедрань прявтось Ю. Г. Антонов тешкстызе, кодамо покш путовкс минек драматургиянтень тейсь В. С. Брыжинский, кона нолдызе «Каргонь кинь ломанть» саганть, косо 25 пьесат.
Покш конференциядонть мейле яволявтозельть «Мордовиянь од вайгельть» конкурссонть изницятнень лемест. Весемезэ пелькстасть 55 ломанть, кинь иест 35 иеде аволь седе ламо. Неть – Саранскоень ды республикань 22 районтнэстэ автортнэ. Сынст важодевксэст ваннось комиссия, ков совасть: «Сятко» журналонь ответственной секретаресь, поэтессась М. П. Левщанова, «Чилисема» журналонь редакторось Е. В. Барцаева, «Якстерь тяштеня» журналонь редакторось В. И. Брындина, филологиянь наукань кандидатось, М.Е. Евсевьев лемсэ МГПУ-нь тиринь келень ды литературань кафедрань доцентэсь С. Н. Маскаева, Россиянь Писателень союзонь членэсь А. В. Горбунова ды лият.
Истя, «проза» номинациясо эрзянь кельсэ ёвтнематнень кис васенце таркась максозь Ирина Гусарованень. Сон тонавтни Н. П. Огарёв лемсэ МГУ-нь Медицинань институтсо.
«Поэзиясо» васенце таркас лиссь рузонь кельсэ сёрмадыцясь Татьяна Мирончева. Тейтересь тонавтни Н. П. Огарёв лемсэ МГУ-нь вуздо икеле анокстамонь ды средней профессиональной образованиянь факультетсэ.
«Драматургия» номинациясо васенце таркась максозь мокшонь авторонтень Евгения Качанованень. Сон тонавтни Сыре Шайговань райононь Сыре Теризморга велень средней школань 11-це классо.
Артём Ключагин сайсь те номинациясонть омбоце тарка. Сон чачсь Отяжбуень Кулязбуесэ. Прядызе Отяжеле посёлкань 2№ средней школанть. Невтнесь прянзо эрьва кодамо олимпиадасо. Саемга, эрзянь келень ды литературань, творческой секциясо. Лиснесь призёрокс ды изницякс муниципальной, республикань ды регионъютконь этаптнесэ. Ламо содамочить тензэ макссь эрзянь келень тонавтыцязо Н. Г. Сигимова. Сёрмадовксонзо лиснесть «Чилисема», «Сятко» журналтнэсэ, «Вперед» райгазетасо.
Весе изницятне ды призёртнэ казевсть дипломсо ды казнесэ, теде башка, тенст максовсть нолдазь произведенияст марто вейсэнь пусмот.
Литературань фестивалень весе инжетнень туртов Эрзянь ды мокшонь национальной театрань артисттнэ невтизь «Не забывай незабываемое» спектаклянть (путыцясь И. Кузьмин). Сон алтавсь Ине Отечественной войнасо чавовозь минек геройтненень. Путовксось тусь мельс ваныцятненень, токась оймес, сельведтне эзть кирдеве. Артисттнэнь лемс ёвтазельть ламо сюкпрянь валт.
Татьяна Маторкина