Течи Чаунзань райононь Комсомольской посёлкань эрицятне эсь ютко шканть покш мельсэ ютавтыть од парксонть, конась кенярдовты вишкинетнень ды покштнень. Тесэ пек мазый тельняяк, кизнаяк. Весемесь теезь истя, кода бажасть сынсь эрицятне, зярдо макссть эсь вайгелест те тарканть вадрялгавтоманзо кис. Неть роботатне ветявсть «Жильё и городская среда» нацпроектэнь «Формирование комфортной городской среды» федеральной проектэнть лувсо.
Ды вана посёлкасонть теезь общественной мазый ды вадря тарка. 2021 иестэ вадрялгавтовсь парконь вейке пельксэсь. Сестэ тесэ теезель мероприятиятнень ютавтоманть туртов площадесь, косо ули сцена, оймсема таркат, налксемань ды спортонь туртов площадкат. Парконь омбоце пельксэсь витневсь ютазь иестэ.
Самай тесэ ютавтневить весе кенярксчитне. Ды свал пек ламо ломанть – эйкакштнеяк-покштнеяк явить мель тренажёртнэнень, вишка эйкакш марто аватне мелявкстомо якить теезь яннэтнева, нурсить нурямотнесэ. Скейтплощадкась, воркаутонь кужинесь, тенниссэ налксема площадкась – ёроков од ломантнень туртов. Сыретненень – эземтне ды оймсемань туртов таркатне. Парконь весе территориясь валдомтозь.