Мордовиянь Кочкуровань районсо истя жо теевсть одкстомтомат-витнемат «Жилье и городская среда» национальной проектэнь «Формирование комфортной городской среды» федеральной проектэнть лувсо. Истя, 2020 иестэ паролгавтозельть кудотнень перька зярыя таркатне. Те: Кочкур велесэ Школьная курованть 10, 12, 20, 53, 55, 57 №№ кудотнень перька таркатне. Витнезельть-петнезельть ялго якамонь таркатне, кудотнень вакссо китне, ладязельть валдомтомкат, шукшонь пурнамонь урнат.
Теде башка, «Формирование комфортной городской среды» проектэнть лувсо паролгавтозель-одкстомтозель Советская куросонть паркось. Витнемань тевтне ушодозельть 2020 иестэ. Те тарканть паролгавтомс мелест ульнесь сынсест эрицятненьгак, секс кисэнзэ каясть сехте ламо вайгельть. Изнямось кандсь аволь ансяк кеняркс, истя жо ярмакт. 2022 иестэ парконть мазылгавтызь-одкстомтызь 8 миллионт целковоень питнес. Веленть куншкасо кармась оймсемань паро тарка: теезельть якамонь од яннэть, путнезельть эземнеть, эйкакштненень нурямкат, налксема таркат, стявтозель морамонь-киштемань туртов сцена.
Паркось ашти 1,7 гектартнэнь лангсо. Сонензэ уш ведьгеменде ламо иеть. Витнемань кавто пелькстнэнь перть ютавтозельть 16 млн целковойть. Пилязельть ташто чувтотне, тарказост озавтозельть одт. Ладязь фонарть. Весементь мельга ветяви видеонаблюдения.