Мордовиянь Общественной лезксэнь максомань штабсонть ютавтозель «Апелемачинь урок», конась алтазель Афганистансто советской войскатнень ливтемань 35 иетненень.

Те войнась минек масторонть туртов ульнесь пек кажовокс, сайсь ламо солдатонь эрямот.

Саранскоень электромеханической колледжень студенттнэнь ды 12 № гимназиянь тонавтницятнень марто вастовомо сакшность сеть, кить эсь сельмсэст неизь, мезе тосо мольсь сеть шкатнестэ, неть: Владимир Кондрашкин, Наиль Вагапов ды Лидия Чикина. Од ломантненень сынь пачтясть боевой службадост ледстнематнеде, ёвтнесть мартост служиця ялгатнень апелемачидест.

А вана «Известия Мордовии» газетань прявт редакторось Олег Каштанов эйкакштненень ды од ломантненень ёвтнесь Афганистансо войнанть историядо. Сон истя жо тешкстась, што минек масторонтень, кода ламо иеде икелеяк, эряви ванстомс эсь границятнень. Неень шкасто апелемачи ды кемечи невтить Россиянь военнослужащейтне, конатне участвовить специальной военной операциясонть ды тюрить неонацизманть каршо.

Афганистансо маштовозь Мордовиясо чачозтнень, конатне топавтсть эсь гражданской ды интернациональной долгост, мероприятиянтень пурнавозтне метрономонть гайтензэ пингстэ ледстизь чатьмонемань минутасо.