Сентябрянь 2-це чистэ Ковылкина ошсо ютась Эрзянь ды мокшонь раськень регионъютконь общественной вейсэндявксонь исполкомонь промкс. Сонзэ ветясь председателесь Юрий Мишанин. Промксонтень шумбракстнеме сакшнось Ковылкинань райононь прявтось Игорь Бутяйкин.
Тесэ жо ульнесть Россиянь Федерациянь Советэнь сенаторось, «Ассоциация финно-угорских народов РФ» Весероссиянь общественной движениянь председателесь Пётр Тултаев, Мордовиянь Культурань, национальной политикань ды архивень тевень министрась Светлана Баулина, Госсобраниянь депутаттнэ Сергей Вдовин, Евгений Ледяйкин, кемгавтово регионтнэстэ представительтне.
Вейсэндявксонь председателесь Юрий Мишанин яволявтынзе промксонь кевкстематнень. Васенцекс кунсолозель сонзэ докладось исполкомонть тевдензэ масторонь келес эрзя-мокшонь раськенть вейсэнь важодемадо ды Россиянь раськетнень марто ялгаксчисэ эрямодо кевкстематнень коряс. Сон тешкстызе, вейсэндявксось важоди Россиянь Конституциянь ды государственной национальной политикань Стратегиянь лувонь коряс. Весе мероприятиятне тесэ алтазь раськень культурань, койтнень-кирдатнень ванстомантень. Меельце промкстонть икеле вастовомасонть шназель Россиянь Президентэнть В. В. Путинэнь спецоперациянть ушодомадо мелезэ.
Аволь умок президиумонь келейгавтозь промкссонть кортазель раськень культурань, келень ванстомань, кастомань-кемекстамонь республикань госпрограмманть топавтомадо. Ульнесть анокстазь зярыя мероприятият: ютась тиринь келень тонавтыцятнень республикань форум, филологиянь докторонть А. М. Каторовань эрзянь-мокшонь литературань тонавтомань программатне кемекстазь Московсо федеральной уровеньсэ. Ютасть «Равось – ояксчинь лей» этноэкспедициясь, «Морыця чувто» керсемань фестивалесь, «Сабантуй», «Акша келу», «Раськень озкс», «Кулдор-калдор», «Кургоня» кенярксчитне, «Диалог культур» национальной од ломантнень форумось ды лият.
Раськень культурань, келень тевтнеде мольсь кортамось Мордовиянь Прявтонть юрсо Межнациональной ды межконфессиональной вейсладямотнень коряс советсэ. Снимазельть зярыя программат телевидениясо. Арсеви ютавтомс эрзянь-мокшонь од ломантнень форум. Ютасть пек ламо покш мероприятият регионтнэсэ: Санкт-Петербургсо, Башкортостансо, Пензасо, Ульяновскойсэ, Саратовасо, Нижней Новгородсо, Татарстансо… «Весе сынь эштё весть невтить: эрзятне-мокшотне аштить вейсэ Россиянь раськетнень марто, ды рузонь келесь минек туртов истямо жо тиринь кель, кода эрзянь ды мокшонь», – тешкстызе Юрий Мишанин ды яволявтсь, а эряви кунсоломс омбо масторонь сеть ломантнень, кить бажить те лувонть коламс. Эряви седеяк вейсэндявомс-сюлмавомс ды кеместэ кирдемс минек республикань Прявтонть ды Россиянь Президентэнть мелест-арсемаст.
Исполкомонь промкссонть истя жо кочказельть организациянь од члент ды яволявтозель мель пурнамс исполкомонь прявтокс Эрзянь раськень фондонь руководителенть Татьяна Ларинань.
Марина Девятова