Вторник, марта 19, 2024
Важное

Ютазь недлясто тусь юткстонок паро ялганок-оянок, превс путыцянок, журналистикань китнес-янтнэс ветицянок. Сондензэ эштё стака кортамс – сон ульнесь. А кемеви, а чарькодеви... Николай Ивановичень ледстнемга ловнодо Раиса Щанкинань статьянзо.

 

Вана эдь кода эрси: лиясто ушодат сёрмадомо, валтнэ сынсь лисить, певерезь-певерить конёвонть лангс, кенерть ансяк сынст “кундсеме” ды таркаваст аравтнеме. Лия шкасто жо таргсезь таргсят эйсэст, сынь, идемевстне, ялатеке а таргавить. Кода ордакш сеясь, ков седе ускат, тов седеяк а ускови, пезнавтсынзе сюронзо модантень, пстии-кечкери. Азё сыргавтык таркастонзо?

Редия, истя лисни, зярдо ушодат сёрмадомо ломанде, конань содасак ды вечксак. Улема, те секс: пек ламо бажат ёвтамс сондензэ ды ламодо видькстамс. Истямо ломанень моньгак аволь аламо. Ды свал, кода кундан кидеяк эйстэст сёрмадомо, пондо ливезь лангстон валги: кодаяк а пурнавить вейс весе арсеман, седей валон, конатнень бажан ёвтамс се ломанденть.

Седеяк стака сёрмадомс сетнеде, кить сынсь сёрмадыть. Истятнэнь марто судот кирдть седеяк пштистэ. Сынь эрьва валот онкстасызь, эрьва ильведевксэть редясызь. Улема, а стяко, зярдо кундынь сёрмадомо “Чилисема” журналонь главной редактордонть Николай Иванович Ишуткиндэ, марявсь тень, буто понгинь кавто тол юткс ды кодаяк а муян лисема тарка. Валтнэ-арсематне чадозь чадыть пря потсонть, оляв нолдамс та-кода кавтолдынь ды натой пелинь. Ломанесь сон оно кодамо содавикс! Журналист. Поэт. Россиянь Писателень союзонь член, МР-нь культурань заслуженной роботник. Нолдась колмо сборникть: “Валскень теште” (1989 ие), “Тештень мастор” (1994 ие), “Пейзаж души” (1998 ие). Стихте башка сёрмалесь пародият, фельетонт, юмористической ёвтнемат. Эйсэст пейди-згили сеть автортнэнь лангсо, кинь произведенияст, кода мерить, “вецанат” ды “веректь”, парсте апак арсе, пешксеть асатыкстэ ды ильведькстэ. Терявтт сёрмадомс истямо ломанде? Секень вант, тонсь понгат сонзэ пародиянь геройтнень юткс.

Пелемс – вирев а якамс! Мезе ули, се ули. Ручкась кедьсэнь. Сыргинек...

Н.И. Ишуткинэнь содылия се шкастонть саезь, зярдо сынь “Эрзянь правдав”. Те ульнесь... ёвтамскак пелян зярдо. Сестэ, ловт, пиже тейтерькалинь, ансяк-ансяк прядыя школам. Велесэ касозь, ошсо прям мария ривезь ютксо ципакинекс. Киньгак а содан. А роднят, а ялгат, а малавикст, а лездыцят. Кода маштат, истя эряк. Ней монськак а содан, косто прась превезэнь мелесь молемс “Эрзянь правда” газетав. Самонть сынь, монсень седеесь талномадонть вармань каршо лопинекс тарнось. Икеле журналисттнэнь, писательтнень ловинь покшонь покш ломанекс. Аволь тосо кортнемс мартост, вакскаст ютамскак виздилинь.

Кувать якинь Печатень кудонть икельга. Окойники совинь... ды талномась шлязь-шлявсь ойме потстон. Теке эсень велень ломань юткс понгинь. Сеске тень кие лемсэ кармась мереме, кие – “сазорнэм, тейтерем”.

Озавтымизь машинной бюрос, путсть икелень печатамо машинка: тонавтнек. Чи, кавто нерькстнян клавишатнень ланга, пря а кепсян. Курок аволь ансяк печатамо тонадынь, содынь весе журналисттнэде: кие зярдо сась газетав, кие кода эри, кие кинь марто вастневи ды кие кода сёрмады. Эрьва газетасо сехте покш критиктне – машинисткатне. Материалтнэ васенцекс ютыть сынст кедьга. Васенце питнентькак путсызь сынь. А стяко журналисттнэ пельсть эйстэст. Сехте пек Анна Николаевна Акайкинадо. Редакциясо сон, ловт, весе эрямонзо ютавтызе. Кедьганзо ютасть зняро материалт, зяро онстоткак а неят. Эсензэ тевсэ Анна Николаевна профессороль. Печатась истя, мельганзо кодамояк редактор эзь эряво. Вейкеяк ильведевкс эзь менстя. Машинисткатнень туртов, кода свал, сехте ламо прянь сэредемат кандсть сёрмадыцятнень почеркест. Кой-кинь сон истямоль – саразонь лапаськак седе мазый. Сельметькак лисить сынст теня-беняст ловномсто. Лиясто сонсь автороськак, невтик тензэ, а чарькодьсы. Анна Николаевнанень сатотсь весть варштамс ды сеске чарькодилизе.

Сеске содылизе сеньгак, кинь эйстэ лиси журналист, кинь эйстэ – “строчкань паниця”. Се шкасто “Эрзянь правда” газетав ведрук састь зярыя од журналистт. Весе сыненст васенце экзаменэнть савсь кирдемс машинной бюросо. Те шкас а стувтса, кода Ишуткинэнь материалтнэнь печатамсто Анна Николаевна кортыль яла: “Вана те цёрыненть эйстэ лиси паро журналист”.

Вейкеде эзь сода Анна Николаевна: Ишуткинэнь эйстэ лиси аволь ансяк паро журналист, сон, шкань ютазь, тееви эрзянь поэттнэстэ вейкекс, кинь творчестванзо лади совавтомс литературань сырнень фондс.

Те карми мейле. Васня жо сонензэ савсь ютамс весе сень пачк, мезе пракшны творческой ломаненть кинзэ лангс.

Велестэ ушодовсь эрямонь ким-яном.

Тосо вельместь васень морон...”

Николай Ишуткин чачсь Покш Березник ёнксонь Симкина велесэ. Кудосост кавто тейтерь мельга учость цёрыне. Весемеде пек Ален бабазо. Сон васенцекс кедезэнзэяк саизе. Чачтомо больницяв аванзо а мейсэ ульнесь ускомс. Те весе лиссь каштом лангсо. Акушеркась – бабазоль. Сюлмизе ансяк чачозь эйденть почонзо, тапаризе руця потс, сонсь чийсь лавкав, рамась якстере вина, кудосо нуртясь покш цярка, симизе потмаксос, цярканть ёртызе потолокс: улезэ нуцьказо шумбракс ды уцяскавокс.

Мейлеяк Ален бабанзо туртов Коля ульнесь сехте вечкевикс нуцькакс. Мезе косто тантейне рамиль, сонсь а сэвилизе, максылизе Колянень. Чокшне ланга ёвксто “каваниль” эйсэнзэ. Сындест бабазо содыль певтеме. Сон ёвтниль, цёрынесь кунсолыль. Те шкастонть оймензэяк пелиль таргамс: сельмензэ икелев стильть Ведьавась, Вирявась. Те весе мейле кадовсь седейсэнзэ.

Ловномо тонадсь, зярдо топодсть тензэ 5 иеть. Ловнось эрьва мезть. Библиотекасо эзь кадново вейкеяк книга, конань сон аволизе ловно. Сеедьстэ сайнилизе “Сурань толт” журналонть. Тосо эрьва валось тензэ марявсь казнекс. Паряк, те мейле кармавтызеяк вечкемс тиринь келенть ды седеезэнзэ каясь сяткине сёрмадомс стихть.

Школасо тонавтнесь а беряньстэ. Пек вечкилизе математиканть. Сонзэ тонавтсь Валентин Осипович Ларькин. Од цёракс служась морфлотсо. Вечкиль ёвтнеме, кода сон укшнось иневедьга. Лиясто пеняциль: вана, келя, а кемить тень, эрзят эрить Америкасояк. Весть, ёвтниль Ларькин, Американь вейке портсо кучизь ловсонь рамамо. Совась вейке кудос. Азоравась нурти ловсо, мирдесь вакссонзо кевкстни эрзякс: “Баба, мекс ловсонть велькстэме максык?”

Урокто мейле – оскань пансеме. Футболось сехте вечкевикс налксемазо ульнесь. А кенериль соламо ловось Цика латкосонть, куринкань цёрынетне тингекс тапилизь. Ветицякс свал ульнесь Коля. Лиятнень оскаст арасель, сонзэ – свал кедьсэнзэль. Тетязо – Иван Алексеевич – школасо физкультурникель. Косо мезе таштоми ды калады, а ёртылизе. Коля сезезь оскатненьгак одов стакшнылинзе. Ютавтнильть веле-веле лангс пелькстамот. Тазинав, Шугуровав яксильть. Осканть совавтсак лиянь ортас – кенярксось потмозот а кельгиль. Мейле сядошкакс ёвтнесак, кода те ульнесь.

Эйкакшпингень неть ледстнематне свал эждсть поэтэнть седеензэ. А стяко сон ламо стихензэ алтынзе сонензэ. Ды одкс порантень:

Седяк, седяк, гармония,

Седяк зяро вий!

Од порам онстом неия:

Каршом пакшакс чийсь.

Алкукс, мезе седе мазый ды кенярксов эрси эйкакшпингеде ды одкс порадо башка? Секс, паряк, а марявияк, кода юты те шкась. Кивчкади ёндол ладсо ды мади. Коля эзь фатяяк, кода ютась эйкакшпингезэ, кода сась од порась. Стясь кевкстемась: ков молемс школадо мейле. Сисемеце классо сёрмадсть сочинения: “Кикс арсян улеме?”. Се иестэнть радиосо-косо сеедьстэ гайгсь морось, косо улить истят валт: “Ради несколько строчек в газете...” Мекс сынь педясть Колянь седейс, сонськак а содыль. Ансяк сынь свал мельсэнзэльть. Секс, паряк, сочинениясонзо сёрмадсь: “Карман улеме журналистэкс”.

Сёрмадома тевсэнть сон икелеяк варчнесь виензэ. Школасо ульнесь стенгазетань редакторокс. Сонсь материалтнэньгак сёрмадсь, сонсь ладсеськак эйсэст, артовкстнэньгак сонсь тейсь. Тонавтнесь 9 классо, зярдо “Заветы Ленина” (ней – “Присурские вести”) райгазетасо лиссь васенце заметказо. Тень кисэ пандсть тензэ 90 трёшникть. Неть ярмактне Колянень сестэ миллионокс марявсть. Зярдо тензэ мерсть сынст мельга молемс почтав, эзь сода, кода тов пачкодсь.

Мейле сёрмадовксонзо седеяк сеедьстэ кармасть лиснеме райгазетасо. Лемензэ ало ней уш сёрмалесть “велькор”.

Прядызе школанзо Шугуровасо (Симкинасо арасельть 9, 10 класст). Эрьва чистэ 5 вайгельбеть тов, вете – мекев. Якшамот, пиземеть, вармат – мезеяк лангс а ванат, молят.

Сась се шкаськак, зярдо эрявсь туемс кудосто. Икеле учость покш тевть. Мелензэ саизе молемс тонавтнеме университетэв филологиянь факультетэв. Сестэ ансяк панжовсь журналистикань специализациясь. Петайкин Коля ялганзо марто максызь документэст рузонь отделенияс. Конкурсось тосо кавксо ломанть вейке таркас. Васенце экзаменэсь – сочинения. Ишуткиннэнь путсть «колмо», ялганстэнь – «кавто». Се сеске тусь велев. Коля эзь максо пря, арсесь седе тов “тюремс”. Омбоце экзаменсэ М.Е. Евсевьев лемсэ пединститутонь икелень ректорось В.М. Макушкин превс путызе: “Тон – эрзянь аля, а мезть теть теемс тесэ. Азё эрзянь отделенияв”. Толковизе, кода тень теемс.

Вана зярдо маштовсь тензэ тиринь келенть содамось. Чийсь лавкав, рамась эрзянь книгат. Кавто чить пря эзь кепсе лангстост. Мезесь ледсь мелезэнзэ, мезенть одов тонавтнизе. Экзаменэнзэ идизе “нилес”. Истя понгсь эрзянь отделенияв.

Ки лангсо виевтне

а авардить...

Университетсэ тонавтнема иетне Ишуткинэнь эрямосо кадсть эсест тешкс. Тесэ путозель юрось сы шкань творчествантень. Васенце видьмесь оймезэнзэ каязель сестэ, зярдо сыненст, I курсонь студенттнэнень, инжекс сакшность эрзянь, мокшонь зярыя писательть. Ютксост – А. Мартынов, А. Тяпаев. Се вастовомась допрок кемекстызе меленть сёрмадомс валморот (стихть). Васенцетнень – “Од пора”, “Кизэнь ве” – кучинзе “Сятков”. Шкань ютазь тердизь эсензэ. Талнозь совась редакцияв. Сестэ сон ульнесь Володарскоень ульцясо ташто кудынесэ, конань вальманзо токасть овсе модас. Кабинетсэнть, кода мейле кармась содамо, Эскин, Щеглов. Учось, кармить сялдомонзо. Сынь, мекевлангт, шнамо ушодсть. Ишуткин истямо ёжосоль, теке сёлмот кассть лавтовонзо лангс. Омбоцеде самсто сынст керизь юрнэк.

Тень теизе А. Мартынов. Ломанесь сон ульнесь “а тонеть, а сонензэ”. Чуросто зярдо вечкевильть тензэ лия поэттнэнь валморост. Одтнэнь овсеяк эзь нолда поэзиянть малав. Мартост кортамозо вейкель: «Эли сёрмадат паро стихть, эли иля сайне кедезэть ручка». Некеть валтнэсэ вастызе Ишуткинэньгак: “Бути а лисни сёрмадомс стихть, иля майсевте эсь прят”.

Мерсь ды теке пря ланга каясь. Кувать мейле Ишуткин эзь кундсе валморонь сёрмадомо. Тень таркас седе покш мель кармась явомо журналистикантень.

Покш школакс тензэ ульнесь практикань шкась. Ютызе сонзэ эсензэ райононь газетасо. Тесэ васенцеде варчизе журналистэнь кшинть танстензэ. Чият тов, чият – тей, сеедьстэ, алкукс, вейке строчкань кисэ. Мейле пря яжат материал лангсо. А кенерят прядомо вейкенть, омбоцесь уш – учи. Истя эрьва чистэ. Журналистэнь тевесь – кода ведьгевесь, чинь-чоп яжи ды а кенери: каят – аламо, таго каят – ялатеке а сатны. Ды те эрьва чистэ. Мадяткак, сыргозяткак – пря потсонть секеть мельтне: кода ушодомс материалонть, кода седе видестэ ёвтамс се-тона арсеманть, козонь кодамо валось седе лади ды истя седе тов. Лиясто удемесь, мерят, лакамо курок туи. Валт ды цифрат, цифрат ды валт, теке мекшть бизмолдыть эсест пизэсэ. Сюлмсят-тапарят эйсэст, мекев юкснят, одов тапарят. Удемесь, ловт, зярдояк а оймси. Тень цидярдсы аволь эрьвась. Ансяк се, кие те тевенть кочкизе седеенть мереманзо коряс. Ишуткин аволь ансяк цидярдызе, сон рузонь газетань таркас сась “Эрзянь правдав”. Тердсть эйсэнзэ товгак, тейгак. “Эрзянь правдань” се шкань редакторось П.П. Борейкин вансь од журналисттнэнь материалост мельга. Ишуткинэнь лемензэ сон сеске редизе ды весть тердизе «кортнеме». Састь ялганзо (те ульнесь Коля Жидкин) марто. Борейкин макссь тенст АПН-нь статьят. Мерсь ютавтомс эрзякс. Колмошка чинь ютазь Ишуткин кандызе эсензэнть.

Борейкин кувать ванкшнось-ловнось эйсэнзэ... ды сёрмадсь приказ «саемс Н.И. Ишуткинэнь “Эрзянь правдань” корреспондентэкс».

Саизь (те ульнесь 1976 иестэ) велень хозяйствань отделс. Васенце командировкав кучизь Кочкурбуень Семилеев. Кучизь ды мерсть тосто ускомс сялдомань материал. Крупская лемсэ колхозонь фермасо вельть беряньстэ мольсть тевтне ловсонь потявтомань коряс. Эзь ашолгадояк, Ишуткин уш тосоль. Якась, кевкстнесь. Материалось окойники пурназель. Мейле лангсонзо пря яжась малав 20 част. Максызе, сонсь учось, кода судонь залсо чумонь теицясь приговоронть. Пельсь стяко. Редакторонть мельс, улема, тусь материалось.

Мейле сындест ульнесть ламо. Иень ютазь Борейкин путызе старшей корреспондентэкс. Ютасть таго 1,5 иеть ды сон кармась отделэнь прявтокс.

Неть иетне Ишуткинэнь туртов ульнесть вийс совамонь ды седе тов касомань шкакс. Эсензэ тонавтыцякс сон васняяк лови Н.В. Кулавскоень. Тевензэ се содылизе парсте, ансяк обуцязо: валске марто маней, чопоньбелев – пурьгине. А уш бути копорды зярдо, кемень пикссэ сюлмсик – а кирдеви. Начальства икеле – “герой”. Келесь лаужашка. Икелензэ аштезэ Американь президентэсь – а тандады, куш мезе мери. Коляньгак пря ланга эзь вадяша. Тонавтсь яла эйсэнзэ: «Лемдик прят журналистэкс, невтик, мезес маштат». Ды эрьва чистэ вешсь пельдензэ од материал. Чизэнзэ эрявсь максомс сехте аламо 200-250 строчкат. Лиясто а кенерят сёрмадомо роботасо, сат кудов – таго озат конёвтнень вельксэс. Истя эрьва чистэ.

Стакаль-аволь тензэ? А мезекс кевкстнемскак теде. Эрьва тевенть эсензэ стакачинзэ. Эрявсь тонавтнемс сынст цидярдомо. Сыргить ки лангов, иля мере: а ютаса. “Ки лангсо виевтне а авардить”, – кода мейле сон сёрмады. Эрямосояк бажась улемс истямокс. Весемеде пек а шождаль васенце шкастонть. Кадык келентькак содылизе а беряньстэ, ялатеке эрявсь одов сонзэ тонавтнемс. Теньсэ пек покш лезкс макссть тензэ В.К. Радаев ды М.А. Втулкин. Сестэ “Эрзянь правдасо” панжозель “Тештине” литвейсэндявкс. В.К. Радаев сонзэ прявтсоль. Лездыцякс тензэ ульнесь М.А. Втулкин. Пурнылизь сынь од сёрмадыцятнень вейс, ушодыльть ванкшномо стихест, ёвтнемаст. Кодат стихть, кодат ёвтнемат?! Кие кода маштсь вачкась валтнэнь лангсек-лангсек, а ушодкс, а куншка, а пе. Втулкин марто Радаев неть сёрмадовкстнэнь почт ладсо сувтнезь сувтнилизь, витнилизь-петнилизь ды газетас максылизь. Кода теде мейле а кепети мелесь сёрмадомс седе тов? Ишуткинэнь оймесэ одов кирвазсь стихень сёрмадома сяткинесь. Сынь лиснесть кода “Эрзянь правдасо”, истя “Сяткосояк”.

Ламо вий ды кемема макссь тензэ Од писателень всесоюзной 6 семинарось. Тов сон понгсь Мордовиясто ськамонзо. Васня эрявсть кучомс эсь произведеният. Сындест Мордовиясто кучнесть вете ломанть. Юткстост кочкизь Ишуткинэнсетнень.

Семинаров сакшность ламо содавикс поэтт, прозаикть. Ютксост Ишуткин прянзо марясь, кода ломанесь, кона понгсь менель теште юткс. Семинарсто (сон мольсь Московсо) од поэтэсь велявтсь седеяк покш мель марто – сёрмадомс стихть. Зярдо сындест таштавсть сатышка, пурнынзе вейс ды максынзе книгань издательствав. Курок лиси сонзэ васенце сборникезэ – “Валскень теште”. Те ульнесь 1989 иестэ. Ишуткин сестэ “Чилисема” журналонь редактороль ды топодекшнесть тензэ ансяк 33 иеть. Се шкань весе редактортнэнь ютксто ськамонзо истямо одоль. Сон свал мельсэнзэ кирдсь, зярдо васенцеде тердизь обкомонь бюров. А.И. Березинэнь эйстэ (сон сестэ Мордовиянь обкомонь васенце секретарель) пельсть теке толдо. Сельмензэ икелев седе паро ульнесь а понгонемс – истя “судрятанзат”, леметькак стувтсак. Тесэ – бюро! Зярдо Березин кевкстизе, кода молить тевест, Ишуткинэнь кутьмерева кельме ливезь тусь. Ялатеке мусь, мезе меремс: “Тевенек молить. Ансяк арась эсенек тарканок”.

«Чилисемань» прявт

Седе тов тевтне кармасть прамо лангозонзо ловонь пандо ладсо. Весементь эрявсь одс теемс-ладямс. Вейке ковс эрявсь пурнамс ды нолдамс од журнал (“Пионерэнь вайгель” журналонть таркас – “Чилисема”). Ушодсь, ловт, чаво таркасто. А кадрат-а мезть арасельть. Текень пес тандавтнесть эйсэнзэ: келя, косто саят сёрмадыцят? Сынь арасть. Васенцекс, мезе тейсь, кармась ардтнеме велева. Васня ськамонзо, мейле энялдыль яла С.М. Люлякинань икеле. Се а покшкавтницяль. Ков тердилик, тов молильгак. Транспортонь коряс пшкалесь образованиянь министерствав. Малав весе велетнень ютызь. Ишуткин кортыль, Люлякина морыль. Ды уш секе ковстонть журналонть лемс кармасть само сёрмат. Эйкакштне кучсть эсест стихест, ёвтнемаст. Сынь седеяк ламолгадсть, зярдо журналсо кармасть ютавтнеме эрьва кодат викторинат, пелькстамот.

Пурнась редколлегия. Тов совасть К.Г. Абрамов, А.М. Шаронов, Д.Т. Надькин, И.И. Карпов. Кодак пуромильть вейс, часонь-час кортнильть. Тесэ, Ишуткинэнь кабинетсэ, чачсь “Мастораваськак”.

Мейле тусть келень олимпиадатне. Сынст эйсэ пелькстыцятнень сёрмадовксост ванкшномо тердилизь эйкакшонь журналонь редактортнэньгак. Сехте вадря сочинениятнень кармасть макснеме эсест журналсо. Истя сынь эсест перька пурнасть од автортнэнь. Ламотнень туртов Н.П. Огарёв лемсэ МГУ-в ды лия вузов кись панжозель “Чилисема” журналсто. Сынь нейгак сёрмалить, кастыть шкинемань ёрокчист.

Курок “Чилисема” журналдонть кармить содамо аволь ансяк Мордовиясо, сонзэ томбальгаяк. Сонзэ ней ловныть малав весе сеть таркатнесэ, косо эрить эрзят: Татарстансо, Башкортостансо, Самарасо, Оренбургсо, Ульяновскойсэ ды истя седе тов. Теньсэ путовксозо васняяк сонзэ редакторонть Н.И. Ишуткинэнь. Сон свал ки лангсоль. Ардтнесь кода эсенек республикань, истя седеяк васолга аштиця велетнева, вастневсь школасо тонавтницятнень марто, ёвтнесь тенст журналдонть, тердсь эйкакштнень кучнемс эсест сёрмадовксост, артовксост.

Зярдояк эзизе стувтне сёрмадома тевенть

Весе неть мелявкстнэнь лангс апак вано, сон зярдояк эзь кадно сехте вечкевикс тевензэ – стихень сёрмадоманть. Ансяк весть савсь сондензэ стувтомс. Те ульнесь, зярдо тетянзо-аванзо марто лиссь покш зыян – палсь велесэ кудост. Кодат тесэ сёрмадомат, зярдо превсэ-мельсэ секеть арсематне, кода лездамс тетянстэнь-аванстэнь? Теиксэль тенст паро – ушодсь од кудонь стявтомо. Эзь кенере – кулось тетязо. Мейле тусь эрямосто Евгения Максимовна авазояк. Ишуткинэнь туртов те ульнесь а ёвтавияк кодамо покш ёмавкс. Зярдо туить ваксстот сехте малавикс ломантне – чами модамасторось. Поэтэсь свал седейсэнзэ кирди сындест ледстнематнень. Кортни мартост эсензэ стихтнень вельде. Эйсэст – мелявтома, седейризкс, паронь арсемат ды певтеме вечкема.

Зярдо монень стака эрси,

Ледстнян, тиринь авай,

эйсэть,

Зярдо ризксэсь керязь керси,

Тон эйсэнь эждят седейсэть... (“Аванень”)

Истямо видькстамодо пештязь поэтэнть весе творчествазо. “Чаво кудо”, “Седей марто кортамо”, “Косо зорясь сиянь валдо ацы”, “Умонь фотокарточкат”, “Пизёлтнэ таго кенерсть”, “Нусманячи”, “Велесэ”, “Учома” ды ламо лия стихотворениятне алтазь сетненень, кить тризь-кастызь, превс путызь, пильге лангс стявтызь ды ильтизь покш ки лангов. Весе, мезе ульнесь эйсэнзэ парось, саинзе сынст пельде. Оймень виесь, весемень цидярдомась састь тензэ покштянзо Максим Спиридонович Наумкинэнь пельде. Од порасто ютызе войнанть, печтясь ламо стакачить ды майсемат. Те весе а пичкиця сыявксокс кадовсь покштянзо седейсэ. Куломазонзо сон мейле ледстнесь оянзо-ялганзо, кить максызь эрямост ятонть каршо тюремстэ, ды “вень куншкане, матедеви зярдо, ченгезь килейтнень неи сон онстонзо” (“Раужо килейть”).

Ишуткинэнь эрямосояк эрьва мезть ульнесть. Войнань тол пачк эзь юта, тень таркас лия апарот, лия сэредькст сатокшность пря велькска. Истят сэредькст, кода сёрмадсь сонсь поэтэсь, “зярдо седейгат пеельсэ ютыть, зярдо толокс гувнозеви вереть, маряви, прок киськеть эйсэ лутыть... Истя эрси, зярдо аксун ломань ванькс оймезэть апак учне сельги” (“Марсить-арась истят сэредькст”).

Истят аксун ломанть вастневсть сонзэ кинзэ лангсояк. Сыненст паро теят, сынь а чарькодить, кежсэ пандыть, ансяк содыть келест човсить ды рудазсо валныть. Кеженть изнямс свал тензэ лездась седей виесь, конань казизе тензэ Пазось (“Седей вий”).

Ансяк вейке асатыксэм: а вечкан ламо кортамо”

Свал икелев бажамось, лиянень паронь арсемась – тетянзо-аванзо пельде. “Каст седе ламонь арсицякс, чевте седейкс, важодицякс”, – тонавтсь эйсэнзэ авазо (“Пазонь казне”). Ды сонзэ валтнэ топавтовсть. Кодамокс арсесь неемс цёранзо, истямокс сон лисськак. Тевень вечкицякс, седеймарицякс. Ломань ютксо пря эзь покшкавтне, эзь кочксе: сон паро, тон берянь. Сонзэ кияк эзизе некшне кежеекс, кода эзизь марсе казямосто кортамсто, музгордемстэ. “Ансяк вейке асатыксэм: а вечкан ламо кортамо”, – сёрмадсь сон эсь прядонзо. Седе видестэ а ёвтасак. Сон алкукс истямоль: чатьмоницяль (“Монень свал марявсь: чачиньгак “Чатьмониця” лементь марто”). Эзь вечке эцеме ломанень сельмс. Зярдояк а пракшныль лиянь валонь трокс. Васня кунсолосы, мезе мери тона, мейле ёвтасы эсензэ меленть.

Кодамоль сон, весемеде парсте тень ёвтасызь стихензэ. Эйсэст се, мезе эсензэ оймесэль, мезесь талновтсь, ризнэвтсь эсензэ поэтэнть. Весе седейга ацирьгалесь сень кувалма, мекс а вансттано пертьпельксэнть (“Кадозь умарь пире”, “Кеж”, “Ризкс”), мекс ёмамос пачтинек тиринь келенть (“Инже”, “Сёксень рузт”), мекс лоткинек кемеме вейке-вейке лангс (“Уцяска”, “Тонь сельметь нусманят...”, “Тон монь седейзэнь таго стукадить”). Весе апаротне стувтовить ды шлявить, кувать а нардави се сэредьксэсь, “зярдо седееть манясызь” (“Керязь рисьме”).

Сонсь поэтэсь весемеде пек а вечкиль “сэпей манчема, пелема, чаво валонь серьгелема” (“Седей марто кортамо”). Кода эрямосо валонзо а явкшныльть тевензэ эйстэ, истя стихсэнзэяк: невти сень, мезе оймесэнзэ, мезесь ютась седеензэ пачк.

“Улемс поэтэкс – те а коламс эрямонь видечинть, эсеть седей ёжомарямонь верьсэ вадяшамс ломань ойметнень”, – истя сёрмадсь С. Есенин. Неть валтнэ пек ладить Ишуткинэнь творчествантень. Сон зярдояк а колсиль эрямонь видечинть ды мезеяк лангс а микшниль оймень сюпавчинзэ. Лият сёрмадыть стихть, ловномстост авардят, мерят, сынст сёрмадынзе Пазонь ломань. Кармат седе парсте содамо эсензэ сёрмадыцянть, варштат оймезэнзэ, тосо чаво. Мезеяк а теят, истяяк эрси. Ишуткинэнь кодат стихензэ – валдот, ванькст, эйсэст арась манчема – истямо оймезэяк.

Мезе ули седе мазый, седе валдо ды седе талновтыця вечкемадонть башка? Сон – ине вий. Сонтемензэ эрямось, кода чопода менелесь, косо арасть тештеть. А стяко сонзэ туртов поэттнэ алтыть сехте вадря произведеният. Ишуткинэнь творчествасояк вечкеманть марто сюлмавозь пек ламо стихензэ. Эрьвасонть – се, мезесь кармавты талномо, кецнеме, ризнэме, пелеме. Вечкиця ломанесь анок весементь каземс сень туртов, кинь кочкизе сонзэ седеесь. (“Валтнэнь ёвтнемс а мезекс, зярдо кортазевсть седейть”). Ансяк эрямосонть сеедьстэ эрси аволь истя, мезес терди сон. “Минь вечктяно сетнень, кить минек а вечкить, конат вечксамизь, сетне а эрявкшныть”. Вечкемань эрькесь – потмакстомо. Ламонь сон ваявтсь, ламонь лепиявтсь. Теке марто сон ламонень сёлмоткак макссь. Лездась кепедевемс менель тёкшс. Кода, паряк, эстензэ Ишуткиннэньгак. Сон свал бажась тештень масторов ды тосто муемс эсензэ тештенть. Арсетяно, те тензэ удалась. Поэтэсь муизе эсензэ тештенть ды эйсэнзэ карми эждеме минек седейтнень.

Ишуткин чачсь тунда, зярдо “сэнь менелесь обед малав ваясь ульцянь чудикерьксэс”, зярдо лембелгады ды манейгады пертьпельксэсь. Эзь учово тензэ 2021 иень тундось. Тусь масторлангстонть. Кемтяно, поэтэнть оймезэ валдо тештекс кепедевсь менелентень ды карми паломо пингеде-пингес.

Ламо-аволь эряви тенек?

Теленть полавтоволь тундось.

Лакавольть бажамот мельсэнек

Ды аволь сезневе морось. (Н. Ишуткин)

Раиса ЩАНКИНА,

Россиянь Журналистэнь союзс совиця.

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».