Воскресенье, января 24, 2021
Важное

Кортыть, ёроков ломанесь ёроков эрьва мейсэ. Те ёвтамось пек лади неень шкань од ломантненень. Сынь превейть, эрязат ды колт эрьва тевсэнть. Сынь маштыть эрямо истя, штобу кенеремс эрьва ков ды эрьва мейсэ.

Истятнэнь юткс апак кавтолдо эряви кандомс эрзянь цёранть Валерий Исляйкинэнь. Сон – содавикс актёр, Московонь опереттань государственной академической театрань солист-вокалист, Мордовия Республикань заслуженной артист. Валерий Исляйкин чачсь-кассь Покш Березникень райононь Хониновка велесэ. Тесэ мелявкстомо ютась эйкакшпоразо, прядызе кавксо иень школанть ды тусь тонавтнеме седе тов. Кочкизе эсь мелень ды седеень коряс тевенть. Весемеденть жо мельга-мельцек.

Валерий Исляйкин – Московонь опереттань государственной академической театрань прявт солист. Лирической мазый теноронь кандтниця. Вайгель, конань ули мель кунсоломс ды марямс. Музыкальностесь ды тембрань лембечись ды истя жо покш репертуарось а кадыть мельтеме вейкеяк ломань, кона ульнесь те артистэнть концертсэ, конат ютавтовсть концертной эрьва кодамо площадкатнесэ кода минек масторсо, истя томбалеяк. Исляйкинэнь концерттнэ ульнесть Америкасо, Израильсэ, Япониясо, Австриясо, Франциясо, Германиясо, Бельгиясо. А стувтни артистэсь тиринь ёнксонзояк – Покш Березникень Хониновка веленть. Сеедьстэ кецявты эсь велень эрицятнень вадря, седейс токиця концертсэ.
Кода тешксты сонсь Валерий, морамонтень ёрокчись сонзэ уш эйкакшпингстэ саезь.

– Минек семиясо морасть весе, – ёвтни Валерий Исляйкин. – Тетянок-аванок, Лаврентий Дмитриевичень ды Матрёна Степановнань, минденек – эйкакштнеде – кавксо. Мон, зяро эсь прян содан, свал морылинь. Сестэ минь эринек Хониновка велинесэнть, кона ней уш ёмась масторлангстонть. Школав якилинек шабра Пермезь велев ялго. Эрьва чистэ савиль ютамс зярыя вайгельбеть. Кись ютыль пакся ды вирь трокс. Штобу ютамось улевель седе весёла, ды, апелемадонтькак, свал мезеяк морылинь. Минек шкатнестэ эдь школань эрямось лаказь лакиль. Свал молильть анокстамот кодамояк мероприятияс. Морсинек-киштинек аволь ансяк эсенек велень клубонь сценанть лангсо, ардтнинек Березникев, Саранскоев. Райононь ды республикань пелькстамотнесэ свал сайнилинь васенце таркатнень. Те ульнесь истямо каштанчи!

Секскак, паряк, эрямонь тевенть кочкамсто Валерий Исляйкинэнь кодаткак кавтолдомат арасельть. Кавксо класстнэнь прядомадо мейле цёрась мольсь тонавтнеме Л.П. Кирюков лемсэ музыкальной училищав. Тонавтнесь колмо курст. Седе тов жо лиссь апак учонь тев. Ялганзо марто сёксь порава цёрась мольсь Московов, совасть ГИТИС-эв, косо кармасть содамо: пурныть студентт Г.П. Анисимов профессоронть курсатнес. Од цёратне арсизь варчамс виест. Валерий морызе «Вдоль по улице метелица метёт» моронть. Сонзэ кунсолызь ды мерсть: «Минь тынк сайтядызь. Ванды кандынк документэнк».


– Мон талакадынь ды теке шкасто ульнинь пек уцяскав, – корты Валерий. – Ансяк вана средней специальной тонавтнемань заведениянь прядомадо дипломом арасель, училищанть прядомас кадовкшнось ие. Савсь мезеяк арсемс. Велявтынь Мордовияв, кандынь документэнь Саранск ошонь заводской чокшнень школав, экстерна максынь экзаментнэнь ды макссть средней образованиядо аттестат. ГИТИС-сэ тонавтнинь «Артист музыкального театра» отделениясонть.
ГИТИС-сэ тонавтнема шкастонть Валерий Исляйкин истя жо кармась тонавтнеме Московонь государственной консерваториясо.
– Шкань ютазь чарькодинь, консерваториясь те аволь монь. Ансяк ялатеке прядыя сонзэ ды 1994 иестэ сынь Московонь опереттань государственной академической театрав, косо покш мельсэ важодян течияк, – тешксты артистэсь.

Весе те шканть перть Валерий Исляйкин налксесь пек ламо эрьва кодат рольть. Сынст ютксо: Моцартонь – «Моцарт и Сальери» (Римский-Корсаков), Пигмалиононь – «Прекрасная Галатея» (Ф. Зуппе), Альфредэнь – «Летучая мышь» (И. Штраус), Эдвинэнь – «Королева Чардаша» (И. Кальман) опереттатнесэ ды ламо лият. Налксесь фильмасояк.

– Минек театрась гастроль марто ульнесь ламот мастортнэсэ. Ульнинек Америкасо, Израильсэ, ардтнинек Балтиянь мастортнэс. Ламоксть ульнинек Япониясо. Мон сован Япониянь культурной фондонть лувс (Токиосо). Эрьва ие анокстатано музыкальной проектт вейсэ Россиянь од музыканттнэнь марто. Нама, неень шкань пандемиянь зыянось те тевенть аламодо лоткавтызе, – корты Исляйкин.
Свалшкань тевтнень лангс апак вано, артистэсь сеедьстэ сакшны Мордовияв. Ды кода тешксты – тиринь моданть лангсо пурны шкинемантень од вийть.

– Эрьва ломаненть терди чачома-касома ёнксось. Монь туртовгак тиринь масторось – те весемесь. Пек берянь, а покшке веленек малав овсе чамсь ды эрямодо пештяви ансяк кизэнь шкасто. Ансяк кодат тесэнь мазычитне! Косо эзинь ульне, кува эзь саво ардтнемс, седе мазый таркат косояк арасть. Минь яла пурнавкшнотано эсенек кудос сазорт-ялакст семиянек, ледстнетяно эйкакшпоранть, икелень уцяскав шкатнень. Ды, нама, моратано оймень эждиця морот. Те тевенть, кода уш тешкстыя, семиясонок вечксызь весе, – ёвтни Валерий Исляйкин.

Исляйкинэнь, морамодонть башка, ули эштё вейке вечкемазо – шарко шляпатне. Сындест актёронть сядодо ламо, ды те пряс путомавтомонть цёрась а содавтни вейкеяк мероприятия. Теке марто цёрась яви мель бильярдсо налксемантень. Сон Б.А. Хмельницкоень ды А.Ш. Пороховщиковонь казнест лангс кинонь, театрань ды эстрадань тештетнень ютксо бильярдсо налксемань коряс чемпион.
2009 иестэ Валерий Исляйкиннэнь максовсь «Заслуженный артист Мордовии» лемесь. Мезень коряс сон ашти покш каштанчисэ. Ды ули мелезэ кецявтомс эсь республикань эрицятнень ды максомс концерт республикань Оперань ды балетэнь театрань сценанть лангсо.

Юлия Еремина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».