Предпринимателенть Н.В.Кедяровонь парсте содасызь аволь ансяк Чаунзань районсо, сонзэ томбалеяк.
– Строятано ловсонь комплекст, эрямо кудот, – ёвтни Николай Васильевич. – Строятано парсте. Сялдыцянок арасть. Зярдо кундынек строямонь тевентень, икеленек аравтынек покштояк покш тев – мельде-валдо важодицят кирдеме а карматано.
Н.В.Кедяровонь строицятне валост кирдить кеместэ. Косо эзть важоде, эрьва косо лангаст кортыть ансяк паро валсо.
«Ремезенское» ООО-нь правлениясо вастовсть предпринимателесь Н.В.Кедяров ды хозяйствань прявтось А.Б.Ботайкин. Кортнесть Ремезенка веленть вандынь чидензэ, сонзэ теицятнеде ды, нама, сетнеде, кить эзть велявто Ине Отечественной войнасто, кить казизь тенек валдо эрямонть. А мекс а полавтомс, а мазылгавтомс кеврунгонть, кона ашти веленть куншкасо, веленть тёкшссо.
2020 иестэ тешкставить Ине Отечественной войнасо Изнямонь 75 иетне. Мерезь – теезь! «Комплексное развитие сельских территорий» государственной программанть лувсо теезель кеврунгонь проект.
– Кеврунгонть питнезэ – 2 миллионт 713 тёжат 210 целковойть, – видькстась Н.В.Кедяров предпринимателесь. – Ярмактне весе эзть са. Улезтнень лангс ламо теинек. Истя, кеврунгонть перька озавтынек чувтынеть, совамо тарканть ацынек плиткасо. Ней весе таркась валдомгавтови.
– Чокшне тия ютындерят, мельспаро теть тееви, – полады А.Б.Ботайкин. – Кеврунгонть кавто ёнга арсетяно путомс пушкат. РФ-нь Оборонань министерствасо сёрманок-энялдоманок получизь. Кеман, тенек а отказыть. Мраморонь плитас сёрмадовить Ине Отечественной войнань весе участниктне.
… Ютыть зярыя чить ды велень весе эрицятне сыть те мельстуиця кеврунгонть панжомо, валдо эрямонь кандоманть кисэ сюкпрянь ёвтамо.
Пётр ЗИНОВЬЕВ.
Чаунзань район