Среда, августа 17, 2022
Важное


1941-1945 иетнень военной ды трудовой подвигень мемориальной музейсэ ютавтозь «Памятень ды Славань книгань» «И один в поле воин» 5-це изданиянь презентациясь.
Од книгадонть нолдазь 1 тёжа экземплярт.
Книгань анокстыцятнень эйстэ вейкесь – 1941-1945 иетнень военной ды трудовой подвигень мемориальной музеень директорось, Мордовиянь «Поиск» республиканской патриотической вейсэндявксонь директорось Н.А.Кручинкин ёвтни:

– Войнасо сеедьстэ эрсесть тевть, зярдо солдатось кадновиль ськамонзо ды сонензэ савкшнось максомс прянть полонс эли тюремс ятонть каршо семс, зярс виеть сатыть. Минек боецтнэ кочкилизь омбоценть ды немецко-фашистской захватчиктнень каршо бойсэ тюрсть лиясто ськамост. Покш важодема ютавтынек, тенек удалась пурнамс малав кавтосядт геройтнеде-воинтнэде дивань историят, конатне казезь бойсэ смелчинь невтемань кисэ.

– Главноесь – аволь казнесь, – полады Николай Андреевич. – Ули подвигесь, ули кие сонзэ теизе. Геройтнень ланга сёрмадозь книгат, снимазь кинофильмат. А вана кой-конатнень ланга аламо мезе сёрмадозь. Минь ней лангаст сёрмадынек.
Пусмосонть ёвтнемат аволь ансяк Мордовия Республикань эрицятнеде, истя жо лия региононьгак. Книгасонть весе информациясь алкуксонь. Сон саезь воинтнэнь каземань листтнэстэ, конатнень сёрмадсть сеске, тюремадо мейле, командиртнэ.

«И один в поле воин» ветеце нолдавксонть презентациясонть Н.А.Кручинкин ловнызе воинэнть Яков Михайлович Василькинэнь эрямо кинзэ. Яков Михайлович – сержант, 77 стрелковой дивизиянь 207 стрелковой полконь 45 мм пушкань батареянь наводчик. Чачсь 1924 иестэ МАССР-нь Дубенкань райононь Поводелесэ.

1944 иестэ Прага ошонть кис бойтнесэ, орудиянть ваксс ськамонзо кадовозь, леднесь фашисттнэнь лангс. Зярдо орудиясь яжавсь, сон сайсь ятонь пулемёт ды маштсь немецень кемень солдатт. Тень кисэ солдатось казезь Славань колмоце степенень орденсэ.

1945 иень январень 23-це чистэ ятонть каршо тюремстэ смелчинь невтеманть кисэ Я.М.Василькин казезь Славань 2 степенень орденсэ.
Презентациясонть ульнесь Ине Отечественной войнань участникенть род-племастонзо малавиксэзэ. Сон ёвтнесь: «Яков Михайлович войнань а шожда китнеде-янтнэде эзь ёвтне. Кенярксчитнестэ тенек сакшныльть кавто ялаксонзо. Сынь истя жо войнань участникть. Кортнильть мирной эрямодо, масторсонок молиця тевтнеде. Яков Михайлович кувать эзь эря. Кулось 1981 иестэ».

«Памятень ды Славань книгань» «И один в поле воин» 5-це изданиясь лиссь Российской Федерациянь граждантнэнь патриотической воспитаниянь мероприятиянь ютавтоматнес явозь субсидиятнень лангс, конат кемекстазь «Патриотическое воспитание граждан Российской Федерации на 2016-2020 годы» государственной программасонть.

Пётр ЗИНОВЬЕВ
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».