Августонь 21-це чистэ Пресс-центрасо ютавтовсь пресс-конференция «Ассоциация финно-угорских народов Российской Федерации» Общероссийской общественной движениянь прявтонть, Российской Федерациянь Президентэнть юрсо межнациональной отношениятнень коряс Советэнь членэнть, РФ-нь сенаторонть Пётр Тултаев ды МР-нь Культурань, национальной политикань ды архивень тевень коряс министранть Светлана Баулина марто.
Тувталось тенень ульнесь кенярксов. Сон алтазель республикасонок ютавтозь покш тевентень: Финнэнь-угрань раськетнень форумонь ды «Минь вейсэ!» фестивалень цётамотненень.
Финнэнь-угрань раськень Весероссиянь II-це форумось Мордовиянь прявт ошсо мольсь августонь 17-18-це читнестэ. Экспертэнь сообществантень совицятне, конатнень ютксо ульнесть политикть, тонавтыцят, учёнойть, важодемань программанть пингстэ кортасть аволь материальной этнокультурной сюпавчитнеде, регионтнэнь вейсэнь важодемадонть. Самай теде пресс-конференциясонть журналисттнэнень пачтясь Пётр Тултаев.
«Весе задачатнень, конатнень аравтынек икеленек, топавтынек! Форумонтень сакшность 35 регионтнэстэ, истя жо Казахстансто. Кортамось мольсь эрьва мезде: культурадонть, кельтнеде, наукадонть ды истя седе тов. Башка толковазельть финнэнь-угрань кельтнень Интернетсэ улемадост кевкстематне. Течи те пек эрявикс тев. А седе аламо мель явовсь од ломанень политикантень. Невтемакс, ули арсема маласо шкасто Финнэнь-угрань раськень од ломанень весероссиянь форумонть ютавтомадо ды таго Мордовиясо. Тешкстама, Саранскойсэ Форумонть ютавтомадо меленть ёвтакшнызе Мордовия Республикань Прявтось Артём Здунов. Сон вадрясто чарькодсь сонзэ ютавтомань эрявиксчинть. Участниктне тешкстызь минек ёндо парсте вастомо маштоманть. Мордовиясь икеле ладсо кадови финнэнь-угрань куншкакурокс. Весе стакачитнень лангс апак вано, минь ванстынек лиятнень ёнов а молиця культуранок, келенек ды сынст свал виевгавттано», – мерсь Пётр Николаевич.
Омбоце покш событиякс кармась од ломанень «Мы вместе!» раськень культурань весероссиянь фестивалесь. Сон Мордовиясо ютавтовсь августонь 18-19-це читнестэ Культурань инициативатнень Президентэнь фондонть вельде. Мероприятиясонть ульнесть Россиянь вейксэ регионтнэстэ од ломанень коллективть, конатнень ютксоль Донецкой Народной Республикась.
Фестивалень панжома чистэнть вейс пурнавкшность 15 тёжат участникть ды инжеть. Кенярксчись ютавтовсь аволь ансяк Саранскойсэ, истя жо республикань районтнэсэяк.
«Алкукскак, кенярксчись лиссь пек покшокс. Ули мелем ёвтамс сюкпря эйсэнзэ весе важодицятненень – те покш команда, конатнень виест сатотсть важодемс эрьва кодамо участкасо. Вейке куншкакуросо ламо ёроков ломанть, сынст прявтсольть кавто главной режиссёрт – Владимир Шарапов ды Оксана Вишнякова», – мерсь МР-нь Культурань, национальной политикань ды архивень тевень министрась Светлана Баулина.
Светлана Никитовна тешкстась, РФ-нь Культурань министранть пельде Мордовияв сась тердема невтемс ёрокчинек исторической театрализованной представления марто «Россия» раськеютконь выставкасонть-форумсонть, конась невтезель «Минь вейсэ!» фестиваленть панжомсто. Сон пачтясь, выставкась панжови Московонь ВДНХ-со те иень ноябрянь 4-це чистэ ды карми ютамо апрелень 12-це чис.
«Минь сынек мельс, фестиваленть эряви поладомс. Кадык сонзэ несызь ков седе ламо ваныцят. Тень кувалма августонь 31-це чис кучтано яволявтома Культурань инициативатнень Президентэнь фондонтень «Минь вейсэ!» од ломанень шкинемань коллективтнень Весероссиянь марафононть ютавтомадо. Аравтлувтнесэ – исторической театрализованной представлениядонть башка эштё невтемс сеть коллективтнень ёрокчист, конат сакшность Саранскоев. Те проектэсь лезды невтемс аволь ансяк эсенек, истя жо лия раськетнень культураст Московсо «Россия» выставкасонть. Мон истя жо ёвтан покш сюкпря Мордовиянь Прявтонтень Артём Алексеевич Здуновнень минек отраслянтень лезксэнь максоманть кисэ», – мерсь Светлана Баулина.