Неть читнестэ Саранск ошонь Культурань кудосо «Литова» эрзянь аватнень вейсэндявксось ютавтсь промкс, конась алтавсь «Кезэрень модань од моро» регионъютконь фестивалентень. Теварсевксэсь лиссь изницякс Россиянь Президентэнь Культурань инициативань фондонь пелькстамосо. Фестиваленть арсеви ютавтомс ноябрянь 25-це чистэ. Эйзэнзэ тердевить Россиянь раськень кельтнесэ морыцятне.
«Сень, што минек проектэсь те иестэ лиссь Культурань инициативань фондонь изницякс, мон лован покш казнекс организациянок туртов. Эдь тедеде миненек топодить 25 иеть», – тешкстызе проектэнь арсицясь ды ветицясь, «Литова» эрзянь аватнень вейсэндявксонь правлениянь председателесь Раиса Щанкина.
Проектэнть юрсо ютавтови «Кезэрень модань од моро» регионъютконь фестивалесь. Сонзэ участникекс кармить тиринь кельсэ морыцятне ды творческой коллективтне аволь ансяк Мордовия Республикасто, истя жо сеть регионтнэстэ, косо эрить эрзят ды мокшот.
Теде башка, проектэнть юрсо арсеви нолдамс «Песенник. Моронь керькс» пусмо, козо совить лия раськетнень кельтнестэ эрзянь ды мокшонь кельс ютавтозь моротне.
«Те ёнкссонть издателенть марто важодемась уш ветяви. Минь пурнатано моротнень, вешнетяно лия кельтнестэ моротнень ютавтыця автортнэнь. Миненек эряви невтемс эсь прянть вадря ёндо. Ды учотано те тевентень мелень явицят», – тешкстызе Раиса Борисовна.
Проектэнть тевс нолды «Литова» эрзянь аватнень вейсэндявксось вейсэ «Дворец культуры городского округа Саранск», «Дом культуры «Луч» МБУК-нть марто.