Пензань областень Даньшино велентень субутасто сакшность весе масторстонть эрзянь-мокшонь землячествань представительтне, истя жо Мордовиянь Прявтось Артём Здунов ды Пензань областень Губернаторось Олег Мельниченко. «ДаншиноФЕСТ» весероссиянь историянь-культурань фестивалень программанть лувсо ютавтовсь «ДаншиноFashion» эрзянь-мокшонь покш модань невтемась.
Чембар леенть чиресэ кезэрень Даньшино велесь теезель XVII пингестэ Мордовиянь Инсаронь районсто лисезетнень вийсэ. 18 пингенть куншкасто саезь маласо эрзянь-мокшонь велетнестэ эрицятнень туртов сон кармась Иневанькс Троицясто эрьва иень кенярксчинь пурнавома таркакс. Шкань ютазь велесь чамсь, эрицятне кармасть тукшномо покш оштнев.
Велесэ чачозенть Николай Пиксинэнь ушодксонзо коряс 2010 иестэ ушодсть вельмевтеме кезэрень эрзянь-мокшонь койтнень-кирдатнень Иневанькс Троицянь чистэнть. Те лездась вейсэндямс Пензань областьсэ эриця раськетнень эрзянь-мокшонь культуранть ды койтнень ванстомань мельсэнть. Зярыя иетнень перть Даньшинось теевсь этно-культурной куншкакурокс. Весе те кассь «ДаншиноФЕСТ» весероссиянь историянь-культурань фестивалекс. 2018 иестэ фестивалентень максозель регионъютконь статусось, сестэ пурнавкшность 3000 ламо инжеть, 2020 иестэ кармась весероссиянь.
Умарьковонь 26-це чистэ Даньшино велесь одс вастсь инжеть – тесэ ютась «ДаншиноFashion-2023» Эрзянь-мокшонь покш модань невтемань V Этно-арт-шоусь.
Тедеде модань невтемань программанть лувсо важодсть выставкань площадкат, ваныцятне виев цяпамосо казизь «Воронежские девчата» ансамблянь артисттнэнь. Кенярксчинь прявт тевекс кармась этно-костюмонь коллекциятнень дефилесь, конатнень невтизь Россиянь эрьва кодат регионтнэ – Пензань, Саратовань, Воронежень областтне, Нижней Новгородось ды Мордовиясь. Ваныцятненень пек тусь мельс Саранскоень «VARMA» этно-арт-театрань невтемась. Этно-композициятнень теемстэ автортнэ нежедсть археологиянь, этнографиянь, мифологиянь материалтнэнь лангс.
Фестивалень участниктненень пшкадемстэ, Мордовиянь Прявтось Артём Здунов тешкстась: «Сюкпря весенень, кить путсть покш ойме те фестиваленть ютавтомантень, тейсть башка ёжо – тесэ сеске марят: сыть тиринь ёнксов! Неян, инжетненень Даньшинасо вечкеви!»
Артём Здунов ёвтась сюкпря Олег Мельниченконень Пензань областьсэ эрзянь-мокшонь культурань ванстоманть кисэ ды евтась седе тов вейсэнь тевдеемань лув: «Мереви ютавтомс истят фестивальть кавксть – Пензань областьсэ ды Мордовиясо, тердян весень миненек инжекс!»
«ДаншиноФЕСТ» фестивалесь – те Пензань областенть башка ёнксозо, региононь картанть лангсо культурань прявт тевтнень ютксто вейкесь. Пензань областень эрицятнестэ покш пельксэсь ашти эрзятнестэ ды мокшотнестэ. Минь бажатано ванстомс койтнень-кирдатнень, келенть, пачтямс од поколениятненень Сурской енксонь раськетнень историянь ды культурань содамочитнень», – тешкстась Пензань областень Губернаторось Олег Мельниченко. Эрзянь-мокшонь лия енов а молиця культуранть ды койтнень-кирдатнень ванстомантень ды виевгавтомантень покш путовксонть кисэ Мордовия Республикань Прявтонь Сюкпрянь сёрма максозь «ДаньшиноФЕСТ» историянь-культурань фестивалень прявтонтень Николай Пиксиннэнь.