Пятница, апреля 23, 2021
Важное
Тедедень эйзюрковонь 9-це чистэ В.Г. Белинский лемсэ музейсэнть-усадьбасонть панжови РФ-нь Артыцятнень союзонь, Европань заслуженной артыцянть Дмитрий Мотовонь выставказо. «Даньшино – территория возрождения» лементь ало экспозициясь невти «ДаншиноFest» – «ДаншиноART» Весероссиянь историко-культурной IV фестивалень программанть юрсо шкинемань од проект.


Невтемась пурназь живописецэнть Дмитрий Мотовонь мелензэ коряс Пенза ёнксонь Белинской райононь Даньшина велесэ чачозенть, «ДаншиноFest» Весероссиянь историко-культурной фестивалень прявт арсицянть ды меценатонть, «Пиксин и Партнёры» (Москов ош) адвокатонь бюронь управляющей партнёронть Николай Пиксинэнь лезксэнзэ вельде.

Экспозициянть прявт тевезэ – невтемс, кода минек сельме икеле одс вельми Даньшина мокшонь кезэрень велесь, кона теезель XVII-це пингенть прядовомсто. Мезе невти те велинесь Сурской краень событийной туризмань картасонть? Кода энтузиастонть ды патриотонть Николай Пиксинэнь «оймень вишка масторозо» тееви эсь региононь эрицятнень, шабра республикатнестэ сыцятнень ды натой омбо масторонь инжетнень туртов вечкевикс таркакс?

Артыцянть веленть лангс вановтозо пек вадрясто невтеви картинатнесэ. Стака а редямс артыцянть кенярксонзо велень свалшкань кудынетнестэ, конат тердить эсь сэтьмечисэнть, теске жо одкстомтозь Луговой курось, неень шкань кудотне… Мазыйдеяк мазый чувтонь лопатнень пачк неявиця церьковань цивтёрдыця сырнень куполось, кенярдовтыть сельметнень эрьва кодамо тюсонь цецянь кумботне, укшныця ашо ды раужо мацей марто келей ды сэтьме эрькесь… Вейке картинась невти минек таркатнесэ овсе а вастневикс ракшатнень – зубратнень, райской поместьянь сюпав заповедникень виев эрицятнень.
«Даньшино – территория возрождения» невтемась явови эштё сеньсэ, сон кармась васенце проектэкс веленть вельмевтемасо ды Пензань областьсэ внутренней туризманть виевгавтомасо.

Васенце истямо невтемась, Д. Мотовонь мастер-классонть марто, ульнесь «ДаншиноFest» Весероссиянь историко-культурной III-це фестивалень «Культурное многоголосье Пензенского края» шкинемань лабораториянть юрсо, кона пурназель ютазь иень таштамковсто.
Тедедень даволковсто Пензань областень Законодательной собраниянь Исторической залсонть ютавтозель истямо жо вернисаж. Невтеманть панжомсто ульнесть региононь парламентэнь вице-спикертнэ Юлия Лазуткина ды Владимир Полукаров, Белинской райононь Даньшина велесэ чачозесь, «ДаншиноFest» Весероссиянь историко-культурной фестивалень прявт арсицясь ды меценатось Николай Пиксин ды лиятне.

Артыцядонть:
Дмитрий Мотов – артыця-живописец, Россиянь Артыцянь союзонь ды ЮНЕСКО-нь изобразительной искусствань раськеютконь ассоциациянь член, Европань заслуженной художник. Лия ёнов а молиця живописень стилень теиця, персональной арт-проекттнэнь пурныця ды эрьва кодамо выставкань участник. Дмитрий Мотовонь роботанзо улить ламот государственной музейтнесэ, Светлана Медведевань ды Нурсултан Назарбаевень коллекциятнесэ. 1000 ламо роботатне – Россиянь ды омбо масторонь галереятнесэ ды частной пурнавкстнэсэ.

Артыцясь яви мель пленэртнэнень, полады рузонь реалистической школань койтнень. Лия ёнов а молиця сюжеттнэнь тешкстамга, артыцясь сеедьстэ якси путешествияв – Архангельскоев, Ивановав, Карелияв, Комив, Крымев, Равонть чирева оштнева.

Дмитрий Мотов чачсь 1975 иень сундерьковонь 22-це чистэ Пензасо. Прядызе К.А. Савицкий лемсэ Пензань художественной училищанть ды В.Г. Белинский лемсэ Пензань государственной педагогической университетэнть.

Анокстызе Юлия ЕРЕМИНА
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».