Февралень 15-це чись минек масторсо – ледстнемань чи ломантнеде, кить топавтсть служебной тевест масторонть томбале. 1989 иень те чистэнть советской войскатне ливтезельть Афганистансто. Тосо тюремась мольсь вейксэ иень перть. Мордовиясто саезельть малав колмо тёжат ломанть. Сынст ютксто 68 чавовсть ды вейке ёмась кулявтомо.
Тедеде топодсть 35 иеть, кода тосто ливтезельть войскатне. Тень коряс Республикань культурань кудосо ютась «Афганонь гайть» военно-патриотической моронь эрьва иень фестивалесь. Сон алтави минек воинтнэнь подвигест ледстнемга, кить идесть тиринь масторост, ульнесть тюремань паксятнесэ; од ломантнень духовно-нравственной ды военно-патриотической мелест кастомга. Фестиваленть ютавтыть МР-нь Культурань, национальной политикань ды архивень тевень министерствась, республикань Раськень творчествань кудось ды «Боевое братство» ветерантнэнь Весероссиянь вейсэндявксонь республикань отделениясь. Вастовомантень сакшность ветерантнэ, чавовозтнень доваст, школань тонавтницятне-кадеттнэ.
Лембе вал марто инжетненень пшкадсь МР-нь Прявтось Артём Здунов:
«Течи масторсонок вейсэ ледстнетяно сетнень, кить алкукс топавтсть служебной, воинской долгост Тиринь масторонть томбале, кить ульнесть кемевикст присягантень ды сёрмадызь эсь лемест Россиянь воинской славань историянтень. Эрьва ие яла седе васов туи Афганонь войнань гайтесь, ансяк Россиянь эрицятне зярдояк а стувтсызь воинтнэнь-интернационалисттнэнь ине тевест. Минь ёвтатано ризксэнь валт весенень, кить ёмавтызь те войнасонть малавиксэст, ялгаст, вейке полксо служицятнень. Течи минь сюконятано специальной военной операциянь участниктнень мужестваст, героизмаст, цидярдомачист икеле. Минек боецтнэ ванстыть Россиянь суверенитетэнть истя, кода 35 иеде икеле тень теиде тынь. Покш сюкпря тенк: тынь лездатадо минек цёратненень, кить ней туить СВО-в. Сынь кемить эсь прянтень ды молить изнямо. Ёвтан седейшкавань сюкпря весенень, кить поладыть важодеме ветеранонь организациятнесэ, ветить од ломантнень военно-патриотической, духовной лувсо тонавтоманть-превс путоманть, тонавтыть эйкакштнень вечкемс Тиринь масторонть ды улемс кемевиксэкс долгонтень».
Вал сайнесь Войнань, трудонь, вооруженной вийтнень ды правань ванстомань органтнэнь ветерантнэнь весероссиянь общественной организациянь минек республикань общественной вейсэндявксонь прявтось Иван Цыганок.
Общественной тевтнень парсте ветямост кисэ ды эйкакштнень военно-патриотической лувсо кастоманть-тонавтоманть кисэ «За заслуги перед Республикой Мордовия» медальсэ казевсь «Боевое братство» ветеранонь весероссиянь общественной организациянь минек республикань отделениянь исполнительной комитетэнь председателесь Фаиль Жалимов. «35 лет со дня вывода советских войск из Афганистана» медальсэ казевсь Афганистан Республикасо тюремань участникесь Вячеслав Лентов. Истя жо явшезь Мордовия Республикань Почётонь грамотат, Мордовия Республикань Прявтонь Благодарностть ды ледстнемань казнеть.
Коень коряс, «Афганонь гайть» фестивальсэнть гайгсть седейстокиця морот, ламонь эзть кирдеве сельведест. Сынь алтавсть минек ветерантнэнень, боевой действиянь участниктненень. Сцена лангс лиснесть Саранскоень ды районсто сазь морыцятне. Лембестэ вастозельть Саранскоень 26 № лицеень кадеттнэнь киштемаст. Парсте морасть Анатолий Чумаков, Артём Колядёнков, Вероника Чижова, Наталья Верещагина, Максим Васькин, Алексей Гагарин, «Умарина», «Торама» ансамблятне ды лиятне.
Татьяна Маторкина