Коень коряс, июнень 1-це чистэ А.С.Пушкин лемсэ парксо, Эйкакшонь ванстомань чистэнть, «Саранский» ЛВЗ» ООО-сь эйкакштнень ды покштнень туртов ютавтсь кенярдовтыця программа. Ютавтозельть эрьва кодат конкурст, пелькстамот, викторинат. Эйкакштнень марто налксеме сакшность ёвксонь геройтне: Фрекен Бок, Карлсон ды Малыш. Сынь вейсэ морсесть, киштсть ды арсесть содамоёвкстнэнь лангсо. Изницятненень казевсть «лимонадинкат», конатне полавтовсть казне лангс. Эйкакштнень чамаст артокшнызь аква-гримсэ ды велявтокшность ривезькекс, кискинекс, псакинекс ды нимилявнекс.
Сехте мельстуиця пельксэкс ульнесь кизэнь васенце пси чистэнть лимонадонь ды «Инзера» минеральной ведень дегустациясь. Эйкакштненень ды покштненень пек вечкевсть «Буратинось», «Дюшесэсь» ды «Колокольчикесь».
Весень мельс тусь покш някась, конась оршнезель «Инзера» ведень бутылкакс. Эйкакштне снимсесть мартонзо, токшнесть ды кутморясть эйсэнзэ. Вейкеяк ломань те чистэнть паркстонть эзь туе казневтеме, эдь ликёроводочной заводонь продукциясь лади весенень: лимонадтнэсэ ды ведтнесэ арасть кодаткак консервантт, сынь пек тантейть ды лезэвть. «Саранский» ЛВЗ» ООО-сь эсензэ чачома чистэнзэ 120 иетнень тешкстамонтень анокстась эштё ламо акцият ды мельстуиця мероприятият.
Марина Девятова