Свал, кода ансяк яволявтови Мордовия Республикань заслуженной артистканть Вера Каяцкаянь сцена лангс лисемазо, залсонть ваныцятнень ютксо сеске тееви каштмолема ды весе, теке мерят, апак лексе учить команда – ваномс пштистэ ды мельспаросо.
Паряк, Россиянь Военно-Морской флотонь Центральной концертной образцовой оркестранть сценической картинась максы ваныцятненень а ёвтавикс вий, эли оркестрань дирижёронть, 2-це рангонь капитанонть Валентин Лященконь чевте мизолксозо, конась свал налкси чамасонзо, зярдо лиси музыканттнэнь ды ваныцятнень икелев, ансяк залсонть аштиця ломантне видемтьсызь рунгост, сэтьмелгадыть ды оймеёжосо марить: ней ушодови войнской моронь ды музыкальной доблестень шкась.
Самай неть минутатнестэ сценанть лангс лиси рузонь ды теке марто эрзянь авась, морыцясь Вера Каяцкая. Виде рунго, прянзо кирди каштансто ды, теке шкастонть, панжадо ды малавикс. Сонзэ гайтев вайгелезэ эштё а гайги, а седицятнень лангс ванозь, чарькодеви – чокшненть перть весень марто карми кортамо тиринь тейтерь-авась. Моросо весень марто карми кортамо аванок ды сазоронок, козяйканок ды вечкевиксэнек. Минек марто ды минденек моросо карми кортамо Тиринь масторось.
Прянь апак покшкавтне, апак мазылгале, цяпамонь апак веше, аламодо мизолдозь, чевтестэ, теке тиринь ава, ушоды сэтьместэ кортнеме залсонть эрьва седеенть, варштавксонть, эрьва лексеманть марто седе, мезесь малавикс ды талновтыця, мезесь ашти кекшезь ойменть потсо – вечкемадо, кемечиде ды ёмавкстнэде. Кортнеме седе, мейсэ эри ломанесь, мезе сон вечки ды кинь кисэ ризны седеезэ.
Россиянь Военно-Морской флотонь Центральной концертной образцовой оркестрась пурназель 82 иеде икеле, ды тензэ эрявсь улемс коллективекс, конась карми российской воинстванть виензэ кемекстыцякс. Сон истямокс кармаськак. Оркестрась вейс пурнынзе музыканттнэнь-«духовиктнень», конатне маштыть седямо гайтень коряс виев седямопельтнесэ – инструменттнэсэ, конатне кепедить вечкеманть ды кемевиксчинть, тердить вадря ушодкстнэс.
Ды вана те оркестрань виев гайтьсэнть пек вадрясто ды мазыйстэ маряви Вера Каяцкаянь тиринь раськень вайгелезэ. Улезэ те раськень моро эли авторонь, конась сёрмадозь раськень лувсо, эрьвась гайги седе виевстэ ды чевтестэ.
Комсь иеде икеле иневедень музыканттнэ маризь Вера Каяцкаянь лиятнень ёнов а молиця вайгелензэ. Сестэ саськак тенст мелесь мазылгавтомс оркестрань музыканть теке тиринь авань, тейтерь-авань вайгельсэ. Музыканттнэ Вера Ивановнань тердизь варчамс вейсэндямс раськень моронть виев музыканть марто, ды малав сеске чарькодсть – тейсть видестэ: оркестрань виевчинтень ды келейчинтень пек ладясь морыцянть чевте вайгелезэ. Секс ней военно-морской оркестранть арась малав вейкеяк программазо, конасонть аволь «ливтне», аволь «аварде» ды а пейдевель раськень морыцянть вайгелезэ.
Вера Каяцкая тешксты: алкукскак, минь экипаж – вейке семия:
– Мон содан, сцена лангсо мартон пек культурной ды профессиональной музыкантт. Чевте седей ды виев ойме марто ломанть. Сынь важодить весе шкань ды виень максозь. Миненек удалась вейсэ теемс-арсемс мельстуиця репертуар, конасонть улить маршт, классической произведеният, военной, раськень морот, ули джаз ды, нама, ламо морот иневедтенть.
Ледстневи, кода мелят Крештениянь кенярксчистэнть Россиянь Писателень союзсонть Вера Ивановнанень максозель «Имперская культура» премиясь. Залонтень пурнавкшность Россиянь сехте содавикс писательтне ды поэттнэ, кинодокументалисттнэ, театрань ды кинонь деятельтне, меценаттнэ, художниктне. Каяцкая морызе «Гляжу в озёра синие» моронть. Военно-Морской флотонь оркестрань седямодонть (фонограммасо) премиянь лауреаттнэ ды кенярксчинтень пурнавозтне, теке мерят, лексезевсть вейке лувсо, а морыцянть келейдеяк келей ды чевте вайгелезэ лоткавтынзе чавомодо седейтнень. Те вайгельсэнть ульнесь тиринь масторонть, малавикстнэнь, оятнень кис покш каштанчи. Ды «Имперской культурань» кенярксчись теде мейле теевкшнесь тиринь масторонь праздникекс. Ломантне мизолдсть ды авардсть. Ульнесь седейтнень вейсэндявома: минь виевтяно, мельсэ кирдтяно весементь, минь а изнявиця нация.
Эряви тешкстамс, Вера Ивановна Каяцкая, Россиянь Военно-Морской флотонь Центральной концертной образцовой оркестранть марто важодемстэ, раськень репертуардонть башка, арсесь-тейсь моронь лиятнень ёнов а молиця масторнэ. Нама, музыканттнэнь марто вейсэ. Каяцкаянь туртов оркестровазь ламо морот, кода морскойть, истя жо раськень. Те патриотической башка репертуар, конасонть аволь вишкине тарка явови вечкемантень. Мезть уш кортамс: моряктне – лиятнень ёнов а молиця ломанть. Сынь виевть, вейсэндявозь Россиянтень вечкемасо, ды, теке шкастонть, сынь простой ломань ютксто лисицят, кемевикст, конатне маштыть вечкеме, кеняркшномо, бути эряви, макссызь лиятнень кис эрямосткак.
Секс, косо бу аволизь невте ёрокчист оркестрась ды Вера Каяцкая, эрьва косо сынст вастыть мельспаросо, виев цяпамосо. Вана ледстясынек ютазь иень гастрольтнень.
Кенярксчинь колмо концертт максозельть Каспийской флотилиянь 300 иетненень. Эли ледстямс Мурманскойсэ военной музыкань ды морской моронь кенярксчинть. А кода музыканттнэнь мельспаросо вастокшнызь Печенга велесэ, косо ютась «Мир без нацизма» лиятнень ёнов а молиця концертэсь. Эйсэнзэ ваныцятнень ютксо ульнесть военнослужащейтне ды сынст семиятне.
Эли ледстямс Архангельскоенть, косо тешкстызь Ине Петрань 350 иетнень. Военно-Морской флотонь оркестравтомонть, Вера Каяцкаянь вайгельтементь те кенярксчись аволь юта бу истя ледстневицясто ды мазыйстэ.
– 2022 иесь монь ды оркестранть туртов ульнесь лезэвекс. Минь топавтынек покш робота, – тешксты Вера Ивановна. – Ульнинек гастрольсэ Мурманскойсэ, Архангельскойсэ, Астраханьсэ, Махачкаласо, Каспийскойсэ, Туласо, Санкт-Петербургсо. Эрьва косо эйсэнек учость ды вастсть вечкезь. Те шкас тень а стувтови Санкт-Петербургонь военной госпитальсэ СВО-со вейке ранявозенть марто вастовомась…
Вера Ивановна ледстнесь, кодамо талнома марто сон мольсь од ломантнень марто вастовомантень, арсесь, мезе тенст мери, мезе моры, кода сынь вастсызь музыканть ды моронть седе мейле, мезе лиссь мартост.
– Зярдо вастовомась прядовкшнось, вейке од цёрынесь тень энялдсь: «Морак тенек, авай, эштё». Ды Вера Каяцкая морась. Морась Лидия Андреевна Руслановань, Людмила Георгиевна Зыкинань, конань марто вейсэ важодсь «Россия» государственной академической ансамблясонть, морост. Морась сеть моротнень, конатнень марто кассь эсензэ эрзянь-мокшонь велесэнзэ.
Военно-Морской оркестранть марто эрьва концертэнть Мордовия Республикань заслуженной артисткась Вера Каяцкая прядсы «Я люблю тебя, Россия!» моросонть. Эйсэнзэ сон видьксты тиринь Масторонтень, ёроков, виев ды превейдеяк превей ломантненень вечкемадонть. Ды ломантне пандыть тензэ истямо жо вечкемасо.
Неень шкасто Вера Ивановна Каяцкая мизолдозь ледстни, кода сон талнось иневедень оркестранть марто васенце концерттнэсэ, ней жо, валонзо коряс, эсь эрямонзо допрок а неи сонстемензэ.
– Оркестрань кодгемень седицятне теевсть тень малавикс ломанекс, – корты Каяцкая. – Валентин Лященко ды Марат Гаянов дирижёртнэнь марто вейсэ сынь пек парсте чарькодить монь морамонь лувонть: козонь мон лоткан, кодамо интонациям. Мерят, весементь минь уш икеле вейсэ репетировинек, сядоксть морынек, ансяк свал, кода лисян ваныцятнень икелев, морось теке одс чачи. Ды пек уцяскаван сень кувалма, оятне-музыканттнэ ды дирижёртнэ те одс чачоманть каршо а молить. Сынь чарькодьсамизь, мон кецнян тенень, а сехте эрявиксэсь – ваныцятне минек чарькодить, кецязь вастыть эйсэнек ды теевить вейсэнь тевень топавтыцякс. Ломантне морыть мартонок, те шкастонть ёми-нардави раськень вайгеленть ды духовой оркестранть ютксо пирявксось – весемесь вейсэндяви вейке лувс.
Иван ЧУРКИН,
писатель, «Имперская
культура» Россиянь Писателень союзонь премиянь лауреат.