Вторник, марта 19, 2024
Важное

Наталья Николаевна Карбаева – 5 № Республиканской клинической больницянь терапевтической отделениянь участковой медицинской сестра. «Эрзянь правдань» ловныцятне (весть минь уш сёрмалинек сондензэ) ды Натальянь пациенттнэ содасызь те мизолдыця мазый аванть, кода чевте седей, свал лезксэнь максомо бажиця, шожда обуця ломаненть.

 А стяко те иестэ Наталья изнясь «Лучший по профессии» весероссиянь профессиональной мастерствань конкурсонь «Лучшая медицинская сестра первичного звена здравоохранения» региональной этапсонть ды кучозель Мордовиянть пельде Московов федеральной этапов. Медицинской сообществань представительтне тедеде васенцеде невтизь ёрокчист те конкурссонть. Пелькстамось ютась октябрянь 20-21-це читнестэ Московонь Здравоохранениянь департаментэнь кадровой центрасо, участникекс кармасть минек масторонь 39 медицинской сестрат, ды тосто Карбаева велявтсь а берянь невтевкс марто – сон понгсь финалс ды икельдинзе ламо покш ошсто ды содавикс клиникасто сазь медсестратнень. Конкурсось мольсь колмо ёнкска: медсестратне ютасть тестирования компьютерсэ, невтизь содамочист практикасо ды мелявтовтыця тевень решамсто.

Наталья Николаевна марто вастовомсто сеске неяви, кода сон вечксы эсь тевензэ, кода мельспаросо ёвтни пелькстамодонть: «Минек мельга пштистэ вансть эксперттнэ, секскак весе заданиятнень эрявсь аволь ансяк теемс, эрявсь кортамс, мезе-кода теят. Мон шождасто ютыя конкурсонть, эдь весе задачатне монень содавикст, минь тейтяно неть процедуратнень, ловт, эрьва чистэ. Паро мельсэ кортнинь коллегатнень марто, вейкесь натой 9 част ливтясь Сахалинстэ, омбоцесь кавто чить ардсь поездсэ Дальней Востоксто, карминь содамо пельдест кой-мезе од, ёвтнинь эсень роботадо. Якинек экскурсияв эйкакшонь поликлиникав, покш ломанень клиникав ды «скорой помощень» станцияв. Мелезэнь весе тусь. Неия, кода тосо саить верь кедьстэ.

Ломанесь озавтови специальной креслас, ды медсестрась валдомты лампасо верьсантнэнь, штобу парсте сынст неемс. Пароль бу истят миненекак рамамс, эдь лиясто пациенттнэ сыть пек човине, а неявикс сан марто. Клиникатнесэ, ловт, косояк арасть медицинской картат, весе роботась ветяви электронной лувонть вельде».

Конкурсонтень анокстакшнось аволь ансяк Наталья Карбаева, весе больницясь лездась медсестрантень. Кода ёвтнесь прявт медицинской сестрась Светлана Дмитриевна Паршина, Московов ульнесть анокстазь Наталья Николаевнань роботадо видео, покш отчёт, ды сынь ве мельсэ «сэредсть» ялгаст кисэ. Светлана Дмитриевна кавто чить ульнесь Наталья Николаевнань марто, лездась ютамс пелькстамонть апак визде, валсояк-тевсэяк кармавтсь седе ёроковсто невтемс прянть ды а пелемс мездеяк.

Конкурсось прядовсь, Наталья Николаевнань таго ушодовсть важодема читне. Сон уш зярыя иеть «вить кедь» участковой врачонть Наталья Александровна Напалковань, конанть марто вейсэ изнясть коронавирусонь инфекциянть, ды сеть стака шкатнень арась мель ледстнемскак. Зяро кудот, квартират сестэ эрявсь ютамс – лецямс-оймавтомс тандадозь ломантнень – содыть ансяк сынсь. Наталья Николаевна ней тонавты ушодыця медсестратнень од специалистэнь школасо ды эштё сон – больницянь профсоюзной организациянь ды Мордовиянь Средней медицинской роботниктнень ассоциациянь член.

Наталья Карбаева чачсь Отяжелень райононь Аловелесэ, ков тетянзо-аванзо кучокшнызь пединститутонть прядомадо мейле тонавтомо школасо, ды вете иес кортась ансяк эрзянь кельсэ, а содыль вейкеяк рузонь вал. Саранскоев сазь, сон келенть стувтызе, мезень коряс ней янкси. Школанть прядомадо мейле Наталья якстере диплом марто прядызе Саранскоень медучилищанть, тонавтнесь фельдшерэкс. Те профессиянть тензэ шнызе авазо, кона, кортась, келя, медсестрась – свал эрявикс ломань, свал яки мазыйстэ ды ашо халатсо. Тейтерькась кунсолынзе превс путоманзо. 5 № больницясо сон важоди уш 25 иеть. Кото иеть тонавтнесь Медицинской институтсо, ансяк врачонь тевенть эзизе кочка, кадовсь медсестракс. Натальянь колмо эйкакшонзо – колмо цёранзо, ды вейке нуцькинезэ. Карбаева арси, паряк, веженсесь кочкасы врачонь профессиянть (келя, бажи улемс хирургокс), топавтсы сонзэ мелензэ ды поладсы медикень династиянть.

Марина Девятова

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».