Вторник, марта 19, 2024
Важное

Тедедень маень 9-це чистэ тешкставить Ине Отечественной войнасо Изнямонь 77 иетне. Те войнась сайсь пек ламо эрямот ды кадсь а стувтовикс тешкс ломантнень седейс. Ютыть иетне ды яла седе аламолгадыть сеть, кить тюрсть минек масторсо сэтьмечинть кис, кие казсь миненек маней чить ды валдо менель.


Фёдор Филиппович Еремин чачсь 1924 иень панжиковонь 28-це чистэ Орданьбуе ёнксонь Кеченьбие (Жабино) велесэ. Армияв саизь 1942 иень ожоковстонть, зярдо тензэ топодекшнесть 18 иеть. Нама, васняяк од цёрынькатнень туртов ульнесть од боецэнь курсат. Зярыя ковонь перть Канаш ошсонть сынь тонавтовсть армиянь койтненень. Ансяк вана тевтне мольсть пек стакасто, фашистэнь ятось лепштясь эрьва ёндо ды тонавтомань туртов шкась ульнесь пек аламо. Секскак 1943 иень даволковстонть Фёдор Филипповичень лия оянзо марто кучизь фронтов, понгсть Смоленск ёнов. Самай тесэ ульнесть виев тюремат ды зярыя шкань ютазь, эйзюрковонь васенце читнестэ, од цёрась ранязель, понгсь госпиталев, косо лецявсь 1943 иень ацамковонть самс. Госпитальденть мейле эсь службанзо сон поладызе 24 танковой механизированной бригадасонть. Вейсэ те бригаданть марто ульнесь Белоруссиянть ды Восточной Пруссиянть олякстомтомасо, ульнесь Опеленть маласо тюрематнесэ. 1944 иень эйзюрковсто таго понгсь ятонь пулятнень алов ды ранязель. Кавто ковт одс савсь ютавтомс госпитальсэ. Лецямодонть мейле велявтсь 24 бригадав ды поладызе службанзо. Те шкастонть минек войскатне уш пачкодильть Берлинэнть малав. Зярыя шкань перть сон истя жо примась участия сонзэ саемасо. Ансяк мейле кучизь Праганть кис тюрематнес, косо сон вастызеяк Изнямодо кулянть. Войнанть марто Фёдор Филипповичень службазо эзь прядово, армиясо сон ульнесь эштё кавто иеть. Ды 1947 иестэнть демобилизовазель.

Демобилизациядонть мейле велявтсь тиринь велев, лиятнень марто вейсэ ушодсь ладсеме войнадо мейлень эрямонть, пурнась семия ды весе эрямонзо перть роботась колхозсо, тиринь масторонзо лезэс.

Масторонть олякстомтоманть кисэ казевсь Якстере Тештень орденсэ, Отечественной войнань I-це степенень орденсэ, Изнямонь медальсэ, Праганть олякстомтоманзо кис медальсэ ды ламот лия наградатнесэ.

Кулось Фёдор Филиппович Еремин 2016 иень ожоковонь 23-це чистэ.
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».