Суббота, сентября 18, 2021
Важное

Россиясо те кенярксчись теевсь зярыя иеде икеле, кадык ушодксонзо саи кезэрень шкасто. Сон алтазь сокицянь-видицянь тейтеренть Феврониянь ды чинязонть Петрань ледстнемга. Социальной а вейкетьксчинть лангс апак вано, Феврониянь ды Петрань ютксо вечкемась истямо виевель, кона цидярдынзе весе манчематнень ды пансематнень.


2008 иенть самс Петрань ды Феврониянь ледстнесть ансяк православной христиантнэ. Церковатнесэ ютавтсть службат ды озномат. Ней те кенярксчись государственной уровнясо совавтозь Россиянь событиятнень ковкерьксэс. Сон ловови Семиянь, вечкемань ды кемемань чикс.
Седе пек тешкстыть эйсэнзэ Муромсо. Самай тосо, Свято-Троицкой авань монастырьсэ, ней ванстовить ине мирденть ды нинть уловтнень кадовкстнэ. Куломадо мейле сынст калмизь вейке кандолазсо. Петр ды Феврония кулость вейке чистэ ды вейке шкасто.
Неень шкасто кенярксчитнень ютксо улить кавто чить, конат алтазь семиянтень, вечкемантень ды кемемантень. Те маень 15-це чись ды июлень 8-це чись. Васенцесь ловови Семиянь раськеютконь чикс. Сонзэ 1993 иестэ кемекстызе ООН-нь Генеральной ассамблеясь. Эрьва кодамо масторсо те кенярксчистэнть ютавтовить акцият, кругловой стольть семиятненень лездамга, ламо иень перть вейсэ эриця семиятненень явшевить казнеть. Те кенярксчинть масторлангонь келес покш общественно-политической смустезэ.
Россиясо Семиянтень, вечкемантень ды кемемантень алтазь кенярксчись кемекстазь июлень 8-це чистэ. Сонзэ яволявтызь Муромонь Петрань ды Феврониянь ледстнемга. Лувонь коряс, сон седе пек моли омбо масторонь содавикс Иневанькс Валентинэнь чинть енов. Июлень 8-це чистэ сеедьстэ эрсить ламо венчицят-урьвакстыцят, покш оштнесэ ютавтневить келей эрьгелемат, мирдтненень-нитненень, конат вейсэ эрить аволь вейке кементь иеть, казевить ледстнемань медальть.
2008 иестэ Государственной Думась официальна кемекстызе ледстнемань чинть. Сон лемдезель Семиянь, вечкемань ды кемемань чикс.

Муромонь Петрань ды Феврониянь чинть историязо

Кенярксчинь чись путозь чинязонть Муромонь Петрань ды сонзэ нинть Феврониянь вечкемадо ды куломадо легенданть коряс. Эйстэст материалтнэнь кармасть пурнамо ансяк меельце 20 иетнестэ, куш иневаньксэкс сынст кармасть ловомо эште XVI пингстэ. Петра ульнесь Муромонь чинязокс, Феврония жо лецясь ломанть. Сон лецизе сы шкань мирдензэ стака ормадо. Теде мейле Петра энялдсь тейтерентень лисемс экшезэнзэ мирденень. Бояртнэ кармасть молеме те свадьбанть каршо, секс мекс одирьвась аволь сюпав семиясто. Мирдентень ды нинтень савсь цидярдомс ламо пансемат ды лия зыянт.
Феврония зярдояк эзь кортне казямосто ды эзь пелькста Петра марто. Сон свал валанясто-соланясто малавгавтылизе мирдензэ виде мельтнес-арсематнес. Петра жо нинть превейчинзэ неезь, эзь лово берянь тевекс сонзэ превс путоматнень топавтоманть.
Ламо иень ютазь Петр ды Феврония саизь мелест туемс монастырев ды сюлмамс эрямост Пазонть марто. Сынь ульнесть аволь вейке монастырьсэ, кучнесть вейке вейкест туртов сермат.
Мирдесь ди нись кулость вейке чистэ. Кезэрень сёрмадовкстнэсэ ледстневи истямо тамашань тев: Петрань ды Феврониянь кавто монастырьсэ калмамс анокстазь уловтне кода-бути понгсть вейке кандолазс. Самай те шкастонть саезь Петра ды Феврония лововить Муромонть кис аштицякс. Сынст уловтнень кадовкстнэнень сакшныльть сюконямо государственной деятельтькак ды истяк ломантькак.
Революциядо мейле иневанькстнэнь кувать шкас стувтокшнызь. Ансяк ютазь пингень пестэнть кармасть таго эйстэст ледстнеме. Васня тень кармасть тееме Муромсо. Тосо састь мельс Ошонь чинть тешкстамс июлень 8-це чистэ, самай те чистэнть евтнемань коряс кулость мирдесь ды нись Петра ды Феврония. 2002 иестэ Муромонь эрицятне путсть ушоткс Петрань ды Феврониянь чинть масторонь келес тешкстамонтень. Те меленть кирдизь религиозной организациятне ды общественной деятельтнеяк.

Тешкстамонь койтне-кирдатне

Семиянь, вечкемань ды кемемань кенярксчинть прявт событиятне ютавтовить иневанькстнэнь Петрань ды Феврониянь тиринь ёнкссо – Муром ошсонть. Ошонь эрицятнень ды инжетнень туртов июлень 8-це чистэ ютавтневить эрьгелемань, театрализованной мероприятият, ярмункат ды кедьчелькев ломантнень мастер-класст, спортонь пелькстамот. Пазнэнь кемицятне содавтыть иневанькс таркатнень ды озныть эсь семиятнень шумбра эрямост кис.
Россиянь эрицятнень туртов те кенярксчись – тувтал пурнавомс семиянек ды ютавтомс вейсэ шканть. Од цератнень ды од тейтертнень ютксо паро коекс ловови те чистэнть тетятнень-аватнень кедьстэ вешемс баславамо семиянь пурнамонтень. Ламот од ломантне те чистэнть венчить-урьвакстыть.
Ловови, июлень 8-це чистэ урьвакстыцятне-венчицятне кармить эрямо уцяскавсто ды уличисэ пингень перть. Венчамотне-урьвакстоматне тешкставить ансяк ЗАГС-со. Церьковасо венчамот те шкастонть а ютавтовить. Тевесь сеньсэ, июлень 12-це чис моли Петровонь постось. Тень кувалма, венчамотне кандовить лия шкас.
Ошонь парктнесэ ютавтневить эйдень каляскань парадт – кона экипажось седе мазыйстэ наряжазь. Ошонь прявт площадтнесэ ютавтневить эстрадань тештетнень ды творческой самодеятельностень коллективтнень концертт. Телевидениява невтить кенярксов передачат ды масторонь прявттнэ ёвтыть поздоровт те кенярксчинть кувалма.
Кой-кона семиятне семиянь кемекстамонь ды эйкакштнень трямонь-кастомань кис казевить «Родительская слава» орденсэ.
Кезэрень шкасто саезь славянтнэ ловсть июлень 8-це чисэнть ули ведунонь вий. Тейтертне те чистэнть орожиясть эстест однасумт. Калонь кундыцятне ды моряктне кемсть, те чистэнть ведьаватне туить ведь потмаксос. Секс сынь сыргильть васоло иневедьга укшномо ды эзть пеле понгомс апаро вийтнень кедьс.

Содамга:
Семиянь кенярксчинь тешксэкс кочкизь пйдельканть. Истямо мелесь аволь стяконь. Пейделькась ваньксчинь ды чевтечинь тешкс. Сонзэ вечксызь эрьва кодамо иень ломантне.
Кенярксчинь оргкомитетэсь 2008 иестэ кемекстась «За любовь и верность» медаль. Эрьва иень июлень 8-це чистэ казненть макснить мирдтненень-нитненень, конат вейсэ эрить 25 иеде ламо ды аштить невтемапелекс лия кеме семиятненень. Медаленть вейке ено артозь пейделька, омбоцесэнть – иневанькстнэ Петр ды Феврония.
Муромонь иневанькстнэнь истя жо ловсть рузонь инязортнэнь кис аштицякс. Сынст уловтнень кадовкстнэнень сюконямо сакшность Иван Грозной, инязоравась Ирина Годунова, Петр I, Екатерина II, Николай I, Александр II.
Россиясо семиянь правась теезель Петр I пингстэ. Сон мель явсь эсь олясо венчамонтень-урьвакстомантень. Женихенть ды одирьванть малавикстнэнень эрявсь максомс присяга, косо кортавсь, што сынь а кармавтыть од ломантнень семиянь тееме.
Сурксонь кандтнема коесь сась кезэрень Египетстэ. Вечкеманть тешкстамга церась ды тейтересь полавтылизь тростникстэ кодазь сурксост. Те коесь ванстовсь гректнень ды римлянтнэнь ютксо. Римсэ одирьванть ладямсто церась казиль тейтеренть тетянтень-авантень кшнинь суркс, истя сон невтсь, што сы шканть нидензэ мелявксонть саи эсензэ лангс.

Лопанть анокстызе
Надежда Кеняйкина
Фототне саезь
интернет-источникстэ:culture.ru

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».