Воскресенье, июля 21, 2024
Важное
Врачтнень, конатне лецить минек «вишка ялгатнень» ды истя жо кудонь ды велень хозяйствань ракшатнень, лемдить ветеринарокс. Самай те службань специалисттнэ теить прявт тевенть кудонь ды идем ракшатнень педиця орматнень а нолдамга, конатне зыяновт ломаненть туртов.


Минек республикасо ломантнень ды ракшатнень шумбрачист ванстоманть мельга пштистэ ваныть «Мордовская республиканская станция по борьбе с болезнями животных» ГБУ-нь важодицятне. Аволь умок минь ульнинек тосо инжекс, вастовкшнынек ветеринарной врачонть Дмитрий Андреевич Бойко марто. Сон ёвтнесь ветеринаронь профессиядонть ды эсь пациенттнэде, конатнень чарькоди валтомо.
Дмитрий Бойко чачсь-кассь Киргизской АССР-нь Иссык-Кульской областень Чолпон-Ата ошсо. Прядызе Аламединской райононь Васильевской средней школанть ды мольсь тонавтнеме К. И. Скрябин лемсэ Киргизской аграрной академияв (ней Киргизской Национальной Аграрной университет). Тонавтнесь тосо кото иеть. Ды сонзэ прядозь, сеске кундась тевс – кармась ветеринарной врачокс. Зярсыя роботась эсь тиринь ёнкссонть. 2014 иестэ од цёрась сась эрямо Мордовияв. 2015 иестэ кармась роботамо «Республиканская психиатрическая больница» ГБУЗ-нь подсобной хозяйствасо ветеринарной врачокс. Мейле ютась «Мордовская республиканская СББЖ» МР-нь ГБУ-в. Ды 2016 иестэ саезь важоди тесэ.

Зярдо Дмитрий Андреевичень кевкстинек, мекс кочкизе ветеринарной врачонь тевенть, сон мерсь, келя, те весемесь ютась Средней Азиясто.
– Тосо ломантне пек кеместэ сюлмавозь кудонь ракшатнень трямонть марто. Тень вийсэ сынь эрить, – корты Дмитрий Бойко. – Тосо арасть покш предприятият ды заводт. Секскак весе кирдить хозяйства. Монь тетям-авам свал эрясть истя жо. Кудонь ракшатнеде кирдильть ды нейгак кирдить ламо, а вана ветеринарной врачонть муемс свал ульнесь пек стака. Лиясто скалось веть кармиль вазыямо, лисильть кодаткак стакачить, лездамс жо а кинень. Скотинанть савиль ансяк печкемс.

Тень весементь неезь, Дмитрий школасо тонавтнемстэ эсензэ туртов кемекстызе, карми ветврачокс.

– Нама, васняяк покш мелем ульнесь молемс тонавтнеме врачокс. Ансяк зярдо карминь содамо, зяро тосо тонавтнеманть кисэ пандома, бажамон сеске стувтовсть. А вана ветеринарокс тонавтнемась Бишкексэ сестэ ульнесь сехте а питнеекс. Молинь тов ды а янксян. Профессиясь кармась монь туртов эрямонь тевекс.
Кода мерсь ветврачось, пациенттнэ сынст эрсить эрьва кодат. Лиясто ансяк прививка путомо пшкалить, сеедьстэ савкшны стака операцияткак тейнемс. Седе сеедьстэ ломантне пшкалить вана мезень коряс: кудонь ракшаст синдизь пильгест-лапаст, мезе-бути нильсть, педиця ормасо ормалгадсть. Весе кода ломантнень. Ветеринарной клиникань врачтне лецить псакатнень, кискатнень, сюракшов ракшатнень, нармунтнень, идем ракшатнень.

– Ветеринарной врачось леци весе ракшатнень, аволь ансяк кискатнень ды псакатнень. Миненек кандыть метьказткак, черепахаткак, порицяткак (грызуны), нармунтькак. Лиякс меремс, кандыть весень. Кие кодамо ракша кудосо кирди, сонзэ ормалгадомга пшкадить миненек, – тешксты Дмитрий Бойко. – Ломанесь, нама, ёвтасы, косо ды кода сэреди, ракшатнень марто весемесь лиякс. Минь ванкшнотано сынст, сайтяно анализт, тейтяно УЗИ, рентген, ЭКГ. Ды тень весементь ваннозь, путови диагнозось, кемекстави лецямось. Тагояк тешкстаса, ракшатнень малав некеть жо орматне, кода ломантненьгак. Сынст истя жо эрсить педиця ормат, пуярмонь язват, пекеормат ды ламо лия мезе.
Ней вана мейн-кун породань псака усксть, а чарькодеви, мезе мартонзо. Саинек верь, тейтяно анализ. Ванносынек, мезе сон невти.
Азортнэнь жо кармат кевкстнеме, мезде псакась ярсась меельце кавто-колмо читнень перть. Кармить арсеме, а содытькак лиясто. А эдь муемс ракшань орманть пек стака. Весементь эряви ванномс, токшемс. Мон тагояк пшкадян кудонь ракшатнень азортнэнень, инескеть, андодо эйсэст видестэ, илядо максне, мезе а мереви. Тесэ вана капельница ало ашти эштё вейке псака мейн-кун породань. Ансяк левксыязь псаканть азоравась андызе паштеттэ. Корты, ярсамопелесь анокстазь вадря продуктасто, сынськак варчизь. Паряк, паштетэсь алкукскак вадря, ансяк сон лавкань, эйсэнзэ кирдевить эрьва кодамо специят, човорявкст. Ломантнень туртов те мезеяк, ансяк вана псакатненень истямодо ярсамс а мереви. Мон свал кортан, эли эсь ракшатнень андодо вадря, алкуксонь ярсамопельде – пидеде сывель, кашат, човорядо парсо пидезь эмеж марто. Эли жо рамадо специализированной вадря ярсамопельть. Ды андодо эйсэст тешкстазь инструкциянть коряс. Бути чинзэ перть ёвтазь максомс зярыя граммат, зняро максомаяк. Аволь пештямс псаканть чакшонзо ды туемс. Кадык ярсы зяро мелезэ. Сон ярсави ламо ды ушодовить мелявкст.
Кода тешксты Дмитрий Андреевич, седе сеедьстэ азортнэ сынсь чумот кудонь ракшатнень марто зыянтнэнь лисемасонть. Ракшась ормалгады, сынь шканть таргсить, сеске ветклиникав а пшкадить. Ютыть уш кавто-колмо чить, кискантень, псакантень эли лия ракшантень карми уш овсе берянь, сынь чиить лезкс мельга. Ды бути те лезксэсь ракшанть уш а идесы, чумондыть весемесэ ветврачонть.

– Эрьва ракшанть эсензэ эрямонь лувозо, эсензэ пингезэ. Ламот ломантне тень а чарькодить, – корты Дмитрий Бойко. – Вана тенст кортат, зярдо раматадо кодамояк ракша, икелепелев ланганзо ловнодо-кевкстнеде. Эдь, невтемга, бути раматадо машина, тынь жо ланганзо ловнотадо весе информациянть, характеристикатнень, лия ломантнень мелест-арсемаст – мезесь седе сеедьстэ калады, мезенть савкшны полавтнемс. Интернетсэ течи те весемесь ули, ансяк иля нузялдо. Ракшатнень марто эдь истя жо. Зярдо тынь раматадо псакат «мейн-кунт», «британецт» эли «шотландецт», ловнодо лангаст – мезде андомс, кода мельгаст якамс. Бути саиде эстенк вишка оине, уледе ответственнойкс.

Истя жо ветеринарной врачось пачтясь, меельце шкастонть пек ламо кандыть питней, вадря породань ракшат, конатнень азорост ёртызь ушов. Ютксост улить абиссинской, бенгальской породань. Ломантне ёртыть эйсэст секс, што а содасызь сынст историянть, а содыть, кода мельгаст якамс. Дмитрий Андреевич корты, те сехте стака важодемасонть. Ёртозь ракшатне уш а кемить ломантненень, а максыть эсь пряст лецямс.

Нама, истят ракшатнень лангс ванозь, седеесь ризны. Ансяк, кода мерсь Дмитрий Бойко, ветеринарной врачонтень эряви улемс кемекс. Эсь тевентень эряви кандовомс кельме седей марто, штобу весементь теемс видестэ ды парсте.
Ветеринарной клиникасо важодемань иетнень перть Дмитрий Бойконь туртов седе малавиксэкс кармась травматологиясь. Те тевенть сынь топавтыть вейсэ клиникань прявт ветеринарной врачонть Сергей Вячеславович Трифонов марто.

– Зярдо эринь Средней Азиясо, ламо важодинь сюракшов ракшатнень марто, тейнинь операцият. Тосо велень хозяйствась – прявт ёнкс, секскак ошсояк кирдить сюракшов ракшат – скалт, букат, сеят, реветь, – ёвтни Дмитрий Бойко. – Тесэ миненек практикас сеедьстэ сакшныть студентт, мон тенст свал кортан, ветеринарокс важодеманть эряви ушодомс колхозсо, сюракшов ракша марто. Зярс тынь а якатадо хозяйстватнева, а варчасынк сюротнень ды ракшань пильгетнень вачкодеманть, мезескак а тонадтадо. Ветеринарной врачонтень маштома лецямо весе ракшатнень. Ёвтнян эсь эрямосто тевде. Зярдо тонавтнинь аграрной академиясо, минек группасонть ульнесть арабт.

Ды зярдо практиканок ютыль тувонь фермасо, сынь отказыльть молемс. Ды кона арабось отказыль, тердевиль тетязо ды мартонзо кортыльть тонавтыцятне. Ульнесь минек тонавтыцянок, врачось-хирургось Николай Васильевич Подгорный. Вейке арабонть тетянстэнь сон мерекшнесь истя, врачонь тевсэ религия арась. Сонзэ тевезэ – лецямс весе ракшатнень. Бути те аволь меленк коряс, саинк документэнк ды тонавтнеде эсенк ёнкссо. Арабонть тетязо весементь кунсолызе, лиссь ды мерсь цёранстэнь – ковонь перть тон ютат практика тувонь фермасо. Тонь кияк а кармавты ярсамс сывельде, лецямось жо – теветь. Ды те арабось ардтнесь минек марто практикав.
Меельцекс Дмитрий Бойко тешкстызе, важодемасонть эрси эрьва мезе, ансяк бути вечксак эсь теветь, сестэ топавтат сонзэ покш мельсэ, оймень путозь ды эсь пациенттнэнь чарькодят валтомо.

Юлия Еремина
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».