Суббота, сентября 18, 2021
Важное

Сергей ды Валентина Баркаевтне вейкест-вейкест содасть эште школасо тонавтнемстэ. Икелепелень мирдесь-нись тонавтнесть Покш Игнатовань райононь Андрейвелень средней школасо. Чарькодьксчись жо, вейкесь омбоцевтементь а эряви, сась ансяк иень ютазь.


Валентина эйкакшокс улезь уш содась – карми важодеме правоохранительной органтнэсэ. Икелепелень юстициянь капитанось эзь яво мель налксематненень ды мейлеяк, седе касозь, эзь вано од цёратнень лангс, истя жо Сергеень лангскак, конась свал кандтнесь тензэ пейделькань пусмот, лездась школасто самсто кандомс книгадо ды тетрадте пешксе портфеленть. Тейтеренть талновтсь ансяк вейкесь – тонавтнемась ды кеместэ мольсь икелензэ путозь бажамонтень.

Школанть прядомадо мейле кармась тонавтнеме Нижегородской МВД-нь академиясо. Истямо стака тевень кочкамонть Валентина толкови истя: ульнесь покш мелем аштемс авидечинть каршо.
Вете иеть тонавтнесь зыянов тевень панжомань башка ёнкстнэнь. Те шканть перть Сергей кенерсь прядомс строительной колледженть ды туемс армияв. Ансяк мельстэнзэ-превстэнзэ зярдояк эзть тукшно кувака черьбуло, мазый ды вечкевикс тейтерденть арсематне. Цёрась сась мельс васенцекс теемс эскелькс ды сермадсь Валянень серма, конасонть ёвтнесь солдатонь-срочникень а шожда эрямодонть. Истя од ломантнень ютксо ушодовсь вейке-вейкенень сёрмань кучнемась, конась мейле пачкодсь уцяскав вейсэнь эрямонтень.

Шкань ютазь диплом марто следователесь велявтсь тиринь Ташто Чамза велев, косо сонзэ учось Сергей. Ансяк, ризксэнтень, вечкевикстнэнень савсь явомс – Валянь кучизь служамо Рузаевкань муниципальной районганть Россиянь МВД-нь отделс. Кувать апак арсе, од ломанесь Валянень ёвтызе эсь мелензэ – саемс сонзэ никс. Валя каршо эзь моле ды свадьбанть налксемадо мейле мирдесь тусь нинть мельга а содавикс ошов. Эзь тандадо апак учонь стакачитнеде, а содавикс таркадонть ды ломантнеде, эдь прявтось – вакссот вечкевикс ломанеть. Рузаевкасо важодемань аразьчинть коряс стакачить арасельть. Се шкастонть, зярдо Валя кучнесь судс саламотнеде, лия зыянов тевтнеде чумондомат, Сергей важодсь тосонь машиностроениянь заводсо. Шкань ютазь органтнэсэ службань романтикась совась сонзэ мельс-превскак. Ды вана уш омбоцеде тусь нинть мельга – кармась важодеме полициянь секе жо отделсэнть дежурной частень машинань ветницякс. Тевензэ топавтсь вадрясто. Ансяк тосонь прявттнэ неизь церасонть точной наукатненень мелень явоманть, ды шкань ютазь аравтызь информационной технологиянь, сязень ды информациянь ванстыця инженерэкс.

Вейке отделсэ важодезь, мирдесь-нись чуросто вастневсть. Валентина кабинетсэ кевкстни чумондовицятнень ды зыянов тевень неицятнень, эли дежурямсто следственно-оперативной группантень совицятнень марто ванкшны зыянов тевень таркатнень. Сергей жо ваны полициянь отделэнь связенть ды весе техниканть вадрясто роботамонзо мельга.

Сергей ды Валентина Баркаевтне свал арсесть покш семиядо, эсест кудодо, конась карми пешксе эйкакшонь уцяскав вайгельде, пейдемадо. Секс 2012 иестэ сынст чачсь цёрынест – Павлик, колмо иень ютазь уцяскав семиясонть чачсь вечкевикс тейтернест – Маша. Вейсэ ютавтомс шканть лисни аволь сеедьстэ: вант, аваст дежурствасо, лиясто, мекевланк, тетяст кирдеви важодема таркасо. А уш бути понгить вейс, сестэ ютко шканть бажить ютавтомс эрязасто оймсезь: ардтнить велосипедсэ, яксить турпоходов, косо удсить палаткасо – весемесь топавтови ды изняви, зярдо семиясонть ули вечкема ды вейке-вейкень чарькодема.

Анокстызе Т.Водясова

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».