Пятница, июля 30, 2021
Важное

Якшамковонь 25-це чистэ Рузонь Православиянь Церьковась ледстни Татиана Римская майсицянть (мученицанть). Татьянань чистэнть, 1755 иестэ Елизавета Петровна инязоравась тешкстась Московонь университетэнь панжомадо Указ. Самай се шкастонть саезь Иневанькс Татиана ловови студенттнэнь ванстыцякс, сыненст лездыцякс. 

«Татиана» кезэрень лемесь грекень кельстэ ютавтови кода «устроительница». Масторсонок Студентэнь чись тешкстави 2005 иестэ саезь, сестэ кемекстазель «О Дне российского студенчества» Президентэнь Указось.
Кода эрить ды тонавтнить неень шкань студенттнэ? Теде миненек ёвтнить редакциянь инжетне.

– Монь лемем Клементьева Алеся. Чачинь Орданьбуе ёнксонь Низовка велесэ. Тонавтнян Н.П. Огарёв лемсэ МГУ-нь филологиянь факультетэнь нилеце курссо. Васенце курссто саезь неень шкас улян эсень группань старостакс. Омбоце курссо кочкимизь филологиянь факультетэнь Студенческой советс, косо неень шкас топавтан Профориентационной секторонь прявтонь тевть. Теде башка, топавтан университетэнь студсоветэнь Профориентационной секторонь секретарень тевтнень.
– Алеся, кода моли тонавтнемась дистанционной лувсо?

– Неень шкась кармавты эйсэнек чарькодеме стака шканть, кона сюлмавозь пандемиянть марто. Кода бу минь а арсевлинек эсь тонавтнеманть ютавтомс вечкевикс тонавтыцятнень марто, сась шка тонадомс дистанционной лувонтеньгак. Арсян, стака аволь ансяк студенттнэнень, истя жо тонавтыцятнененьгак. Лия форматсо важодемась канды ламо стакачить. Васняяк, сон веши путомс ламо вийть, колынзе весе содавикс тонавтнема ды тонавтома лувтнень. Мельёжонок колавсь эсь тонавтыцянок ды ялганок а неемадонть. Нама, улить ламо платформат Интернетсэ, косо минь вастневтяно мартост, ансяк те а полавтсы эрьва чинь вастоманок, зярдо вастневинек эсь аудиториятнесэ вечкевикс университетэнь факультетсэ.
Те тонавтнеманть ули лия ёнксозояк. Минь аштетяно кудосо, лембе таркасо, эсь малавиксэнек ютксо. Од шкась максы тенек ламо икелепельксэнь арсемат. Минь панжтано эсенек туртов од кить-янт, тонавтнетяно тевс нолдамо цифровой од технологият, те шкастонть мереви путомс эрямозонок весементь, мезесь ули эли ульнесь мельсэнек.

– Кода тонь туртов ютыть студентэнь иетне?

– Арсян, те кевкстеманть лангс эрьвась максы эсензэ каршо вал. Монь арасть нусмакалема чинь. Студентэнь иетне ютыть весёласто, покш важодемасо, тонавтнемасо ды ламо вастовомасо. А лововитькак, зяро мероприятият савсь неемс, кой-конатнень улемс ютавтыцякскак. Мон теевинь содавиксэкс ламо ломань марто. Муинь ламо оят. Лиясто шкам а саты весементь теемс, кенеремс. Тонавтнема тевень мик кадовить теемс вензэ лангс. А стяко кортыть: «Студентэнть туртов весе весь икеле, ды сон кенери весементь анокстамс сы чинтень!» Истя эзь маряво шкась, кода васенце курссто уш пачкодинь нилецес. Те иестэ карман прядомо тонавтнемам.

– Алеся, кодат улить изнявксот? Косо невтик прят тонавтнема шкасто?
– Весе мельс-превс а ледстявитькак, зяро, косо ульнинь ды косо ютасть кодат пелькстамот. Ламо мезе ульнесь тонавтнема ким лангсо. Аволь весть невтния прям «Огарёвские чтения» научной конференциясо, ульнинь олимпиадань, шкинемань конкурсонь участникекс. Васенце курссо сайнинь изницянь таркат «Звездопад» конкурссо. Васенце покш изнявксокс лован омбо масторов тонавтнеме молеманть. Малав кавто тарго юткот кизна тонавтнинь Венгриясо. Омбоце курссо ульнинь Йошкар-Оласо «Богатство финно-угорских народов» финнэнь-угрань студентэнь раськеютконь форумсо. Колмоце курссо тонавтнемстэ макссть тень МР-нь Прявтонь од сёрмадыцянь литературань премия. Весе тонавтнема иень пештязь Университетэнь «Голос» газетанть марто важодемадо. 2020 иестэ макссть тень «Медиаличность года – 2020» лем. Монь туртов те покштояк покш казне.

Те иесь седеяк келейгавтызе ояксчинть финнэнь-угрань студенттнэнь марто. Ушодынек од тевть вейсэнь куронь важодемасонть. Ансяк те тевесь – од ушодкс студенттнэнь эрямосо, секскак веши пельденек ламо арсевкст ды бажамот.

Татьяна Маторкина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».