Вторник, марта 19, 2024
Важное

ТЕ ФОТОГРАФИЯСОНТЬ ВАЛЕНТИНА ИВАНОВНА ВИШНЯКОВА. ТЕ МАЗЫЙ, ПРЕВЕЙ, ЧЕВТЕ СЕДЕЙ ЭРЗЯНЬ АВАСЬ ЭРИ УЛЬЯНОВСКОЙ ОБЛАСТЕНЬ ИНЗАБУЕНЬ ОСЬКИНА ВЕЛЕСЭ. СОН КОЛОНЬГЕМЕНДЕ ЛАМО ИЕТЬ ВАЖОДСЬ МЕДИЦИНАСО. УШ ВИШКА ШКАСТО САЕЗЬ ВЕЧКСЬ ЛЕЗДАМО ЛОМАНТНЕНЕНЬ, ТЕЕМЕ ПАРО. ТЕЕВТЯНО МАРТОНЗО СОДАВИКСЭКС!



Зярдо сеедьстэ ардтнят командировкав те эли тона ёнксов, тосонь ломантне теевить теке малавиксэкс. Мельспаро тагояк вастовомс мартост, кортамс эрямосо полавтоматнеде, од кулятнеде. Монь туртов истямо ломантнень ютксо ашти Валентина Ивановнаяк. Эрямосонзо кикс-янокс сон кочкизе фельдшерэнь тевенть. Школань прядомадо мейле тонавтнесь Ульяновской областень Карсунонь медицинской училищасо. Тов кучнизь совхозонть пельде, секскак прядомадонзо мейле учость эйсэнзэ тиринь велесэ. Тейтересь тонавтнесь вадрясто, тензэ пандсть паро стипендия.

Тетязо, Иван Михайлович, ульнесь пек паро механизаторокс. Армиядо икеле кепедсь целина, мейле 47 иень перть важодсь эсест велень совхозсо. Важодеманзо кисэ зярыяксть казевсь покш наградасо. Вейкесь эйстэст – Трудовой Якстере Знамянь Орденэсь. Теде башка, сонензэ максозель Почётной доноронь лемесь. Икелень шкатнестэ совхозось кучнесь весень верень максомо, явиль транспорт. Авазо, Тамара Григорьевна, важодсь совхозсо учётчицакс ды складонь прявтокс. Мирдензэ марто чачтсть-кастсть колмо эйкакшт. Вейке тейтерест (Валентинань патязо) эри Мордовиясо, важоди аптекасо фармацевтэкс. Ялаксост роботась велень хозяйствасо, ансяк ней арась ютксонок. Вишка шкасто саезь сынь ламо важодсть, лездасть тетяст-аваст туртов, зярдояк эзть орголе тевтнеде. Валентина тейсь сень, мезе авазояк: потявтсь скал, котьмиль пиресэ, пурныль тикше. Школасояк тевензэ мольсть парсте. Тейтересь мельспаросо ваныль, кода медпунктсто школав сакшныль фельдшерэсь Вера Васильевна Ждакаева. Истя лиссь, мейле сынь малав 30 иеть вейсэ важодсть! Те авась кармась сонзэ васенце тонавтыцякс, превс путыцякс, паро лездыцякс.

Оськинась – покш веле, тесэ эрить 1400 ломанть. Ормат, зыянов тевть, уколт-мезть… Ковгак ломантнеде а кекшат. Эряви лездамс, кортнемскак, оймавтомскак, бути эряви, ускомс больницяв. 31 иень перть Валентина Ивановна чинек-венек свал пильге лангсо. А лововияк, зяро апак удо веть, зяро чийнесь ормалгадозтнень ланга, макссь тенст лезкс. Ломантне пиштевтить седеень орматнеде, кузи-валги давлениясь. Меельце шкане сеедьстэ вастневить онкологиянь орматне. В. И. Вишняковань валонзо коряс, эрицятнень марто свал ветить профилактической робота. Кармавтыть ютамс диспансеризация, флюорография.

Лисезь эрьва зыянонть савкшны ютавтомс седеень пачк. Нама, ульнесть кулыцяткак, кинь кенерсть идеме, кинь эзть… Пеель мартояк мельганзо чийнесть, зярдо идесь сисем ковонь эйкакш. Сон пек мелявты весень кис. Колмошкаксть ульнесь судсо, косо тетятнень-аватнень сайнесть праваст. Бажат идемс сынст (эдь алтасть лоткамс симеме, стямс виде ки лангс), теке марто арсят эйкакштнеде, кода сыненст седе паро. Лиясто эйдетне сынсь туевельть симиця тетятнеде-аватнеде, конат а ваныть мельгаст, а андыть эйсэст. Ды кинь те шкане идемс, кинь кисэ аштемс? Те сонзэ туртов сехте ризнэвтиця, зярдо эйкакштнень явить тетяст-аваст марто. Кадык сынь симицят эли тапавсть эрямосост, эйдест зярдояк а мерить беряньстэ тетядост-авадост! Аштить кисэст ды секе-тев кортыть: «Монь авам сехте паро».

– Мельсэнь кодаяк а стувтови вейке тев, кона лиссь зярыя иеде икеле. Весть сан веть 2 чассто ормалгадозенть кедьстэ. Ардан састыне велосипедсэ (минек медпунктсо ули транспортонок). Велявтынь эсень проулкантень. Ды ванан, кавто чувто юткова моли-кевери палкине марто вишкине ломань. Теке мерят, ёвкссо, прясонзо паця. Мон, нама, сеске псилгадынь. Ломань эли аволь? Моли састыне, кедьсэнзэ вишка ведрыне. Монь видьс пачкодезь, сон лоткась, варштась ёнон коня алга. Пек тандадынь! Ардан седе тов, пелян удалов варштамояк. Пряван эрьва кодат мельть ютасть: те ведун эли салыця? Моли лавканть ёнов, паряк, салыцясь истя оршась? Паряк, гайневтемс лавкань азортнэнень?
Мейле омбоце чистэ кортазевинек аватнень марто. Истя карминь содамо, те ульнесь минек велень ськамонзо эриця сырькайне, кона сокор, а соды, ушосонть чи эли ве. Сон кадовсь, тапавсь ды якась велеванть валскес. Бути чоподасонть содавлия – саевлия кедте ды ветявлия кудов, истя тейнинь аволь весть, – ёвтни минек героинясь.
2020 иестэ масторлангонтень сась коронавирусось. Сон эзь юта Оськина веленть вакскаяк. Валентина Ивановна, кода свал, лездась велень эрицятненень. Сон кортась, кода улемс, кода ванстомс прянть, кода ковгак а яксемс ды киньгак марто а вастневемс. Эйсэнзэ кунсолость. Секскак велесэст ве шкане ламо сэредицят арасельть. Валентина Ивановнанень эзь ванстово эсь прязо. Пек ормалгадсь. Аштесь госпитальсэ. Эсь сельмсэ неизе, мезе моли, эсь рунгосо маризе, кода пиштевтить ломантне, кода лавшоми шумбрачись. Мейле сонськак ютась санаториясо лецямо. Истямо шкане вакссонзо свал ульнесть малавиксэнзэ.

Мирдензэ Александр Фёдоровичень марто сынь содасть вейкест-вейкест вишка шкасто саезь, эрясть ве куринкасо. Тевесь кода ульнесь? Васня сонзэ редизе атявтозо. Сон секе-тев шнась тейтеренть цёранзо туртов. Ды кода а шнамс? Мельганзо ваномояк а кенерят, кода чинь перть куроксто ды шождасто велявтни тикшенть, чокшне, теке мерят, эзь сизеяк, чии клубов. Вишняковтнень семиясо кавто эйкакшт. Алексей цёраст – Северной флотонь военнослужащей. Виктория тейтерест тонавтни М. Е. Евсевьев лемсэ МГПУ-нь филологиянь факультетсэ. Эйкакштнень коряс аштить каштанчисэ. Сынь парсте тонавтнесть школасо, невтсть пряст ды изнясть эрьва кодамо конкурссо, олимпиадасо. Паро мельсэ варчнесть виест художественной самодеятельностьсэ. Музыкантень ды моротненень вечкемась ютась тенст аваст пельде. Валентина Ивановна школасо тонавтнемстэ саезь морсесь, медучилищасояк, мейле – велень ансамблясо.

Неень шкане Валентина Ивановна Вишнякова зярс-бути кадызе фельдшерэнь тевенть. Эрявить пурнамс вийть, оймамс, лекстямс ды – тагояк эскелямс икелев. Оськинасо федеральной программань коряс кармить стявтомо модульной ФАП. Тенень явозь 11 млн целковойть.
Медицинасо важодеманзо кисэ В. И. Вишнякова казезь райононь прявттнэнь, областень губернаторонть пельде казнесэ, тешкстазь эйкакшонзо парсте трямонть-кастоманть кисэяк. Ансяк сехте питнейть – ломантнень пельде лембе ды сюкпрянь валтнэ.

Татьяна МАТОРКИНА

ВЕЧКЕВИКС ЭРЗЯНЬ АВАТ!

Минь, Вишняковтнень семиясь, весе седейстэ ёвтатано тенк покш поздоровт тундонь, авань кенярксчинть марто! Кадык тынк оймесь свал эри моразь, чамастонк а тукшны мизолксось! Эрямосонк карми ансяк кенярдома, уцяска, шумбрачи! Кадык вакссонк свал улить вечкевикс эйкакшонк, ялганк, малавиксэнк. Кадык топавтовить
весе меленк-арсеманк!

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».