Воскресенье, июля 25, 2021
Важное

Тонавтыця, воспитатель, лециця, полицейской, башнянь кранонь машинист, троллейбусонь ветниця, сварщик – ды весе те сынь, эрьва кодамо профессиянь аватне, конатненень Раськеютконь тейтерь-авань кенярксчинть каршо поздоровт ёвтась Мордовиянь Прявтонь тевтнень топавтыцясь Артём Здунов.

Кенярксчинь промксось ютавтовсь эйзюрковонь 5-це чистэ И. М. Яушев лемсэ музыкальной театрасонть, санитарно-эпидемиологиянь весе вешематнень топавтозь. Мизолкст, цецят, вадря ёжо ды ламо-ламо лембе валт – весе те казевсь залонтень пурнавозь республикань тейтерь-аватненень.

«Весе содыть, авась кази эрямо, кази лембе сехте вишка шкатнестэ саезь, – пшкадсь МР-нь Прявтонь тевтнень топавтыцясь. – Тынь пештятадо минек эрямонть мазычиде. Весемесь юты аванть пельде, мейле поладови вечкевикс нитнесэ, минек тейтертнесэ, нуцькатнесэ. Тынь кемевттядо, весе тевтне, конатнень топавттано, ютыть эсенек пельде. Эрьва цёрась, кода покш венчень капитанось, велявтни штурвалонть витев-кершев, максы командат, алкукс жо, сонзэ вишка венчесь ашти мазый аванть кедькуншкасо: ков велявтсы, истя улияк».

Артём Здунов ёвтась сюкпрянь валт весе аватненень, конат топавтыть профессиянь долгост цёратнень марто вейсэ. «Сюкпря весенень, кить мартонок вейсэ бороцить пандемиянть каршо, важодить эйкакштнень марто. Тетятне-аватне чарькодить, кода стака тень теемс. Сюкпря волонтёртнэнень, социальной важодицятненень, весенень, кить важодить производствасо, шкинемань индустриясо, театратнесэ ды лездыть кеняркс ды вадрянтень кемема марто цидярдомс тень. Покш сюкпря тенк! Нама, ули покш мель, печтямс неть стакачитнень, виевгадозо минек республикась. Аволь умок яволявтозель кадрань проектэнть ушодомадонзо, сон лезды неемс мелень явиця ломантнень, конат покш кемема марто ваныть вандынь чинтень».

Те кенярксчистэнть явшевсть государственной покш казнеть.

РФ-нь Президентэнть Указонзо коряс ламо иень перть вадря важодеманть кисэ «За заслуги перед Отечеством» II степенень орденэнь медальсэ казезь Вера Семенова – Орданьбуень светотехникань заводонь контактной сваркань машинань сварщикесь.

«Заслуженный работник социальной защиты населения Российской Федерации» почётонь лемесь максозь Валентина Суханованень – Ельникень кемгавксово иесэ седе вишкинетнень туртов социально-реабилитациянь куншкакуронь воспитателентень.

«Заслуженный журналист Российской Федерации» почетонь лемесь максозь Наталия Грановскаянень – «Всероссийская телевизионная и радиовещательная компания «Государственная телевизионная и радиовещательная компания «Мордовия» ФГУП-нь филиалонь прявтонтень.

РФ-нь Президентэнь Почетонь Грамотасо казезь Полина Рябочкина – Н. П. Огарёв лемсэ МГУ-нь общей физикань кафедрань профессорось.

Славань III степенень орденсэ казезь Марина Маркина – Чаунза ёнксонь «Мордовский бекон» ЗАО-нь прявт бухгалтерэсь.

«Заслуженный учитель Республики Мордовия» почетонь лемесь максозь Оксана Крюкованень – Саранск ошонь 43 № лицеень историянь ды обществознаниянь тонавтыцянтень.

Здравоохранениясо изнявкстнэнь ды COVID-19 каршо бороцямосонть покш путовксонть кисэ «Заслуженный врач Республики Мордовия» почетонь лемесь максозь Наталья Супрякованень – Ковылкинань центральной районной больницянь анестезиологиянь-реанимациянь отделениянь прявтонтень, врачонтень анестезиологонтень-реаниматологонтень.

Весе аватненень казевсть мазый цецят МР-нь Прявтонь тевтнень топавтыцянть пельде. Кенярксчинь чокшнесь прядовсь республикань шкинемань коллективтнень пельде мазый концертсэ.

 

 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».