Вторник, марта 19, 2024
Важное

 

Кочкурбуень Семилей велев сыргамсто свал арсезеван, мезе од ды лиятнень ёнов а молиця редятано «Норов» Аграрно-производственной фирмасто. Течи сонзэ прявтсо неень шкань эрямонть парсте содыця, ламо тевс чарькодиця генеральной директорось Дмитрий Поздняков.

Кунсолат Дмитрий Александровичень ды арсезеват: эдь кодат талновтыця ды эрявикс кевкстемат минек сы шкадонть кепси. Ловт, сонзэ талновты весемесь, велень хозяйстванть туртов кадратнень анокстамодо кевкстеманть эйстэ саезь семиянь питнейчитнес ды сехте пек неень шкань эрямо лувось. Эдь бути эрьвась юткстонок течи карми арсезевеме неть ды ламо лия кевкстематнень коряс, сестэ ков седе паро ёнов полавтови эрямось, кода велетнесэ, истя жо оштнесэяк. Весемесь ашти эсенек эйстэ, эрямонть лангс варштавкстонок. Мезесь кенярдовты, те эрзянь цёрась аволь ансяк теде мазыйстэ ёвтни, сон стамбарнэ бажи весе паро ёнкстнэнь совавтомс тиринь Семилей велесэнть, «Норов» Аграрно-производственной фирмасонть.

Иневанькс Троицясь – «Карнайсэ»
Республикань малав весе велетнесэ Иневанькс Троицянь кенярксчись теевезь коень коряс тешкстави чачома таркасо. Те православной коесь ванстовсь Кочкуровань Семилей велесэнтькак. Икеле мелень витемань тевтне ютавтовсть социально-культурной досуговой центрасо ды те зданиянть маласо мазылгавтозь таркасонть. Те эрзянь кезэрень велентень те иестэ топодить 397 иеть. Самай истямо датантень ды Троицянь кенярксчинтень алтавсь мелень витемань покш чись.
Ней сонзэ арсизь ютавтомс, кода кортыть, панжадо менель ало, «Карнай» оймсема базасонть. Аравтозь шкантень те таркантень ломантне кармасть пурнавомо: кить эсест автомобильсэ, кинь жо сон арась, пачтизь тенень икелепелев анокстазь автобустнэсэ.
Те ёнксонь эрицятне ды ве ёндо сыця инжетне ламот састь семиянек. Кода мерсь «Норов» Агрокомпаниянь группатнень прявтось Александр Ильич Поздняков, те базанть анокстамодо икеле арсезель теемс семиянь оймсема тарка, ков васняяк савольть сынст велень хозяйствань предприятиясо важодицятне, те ёнксонь ды республикань весе эрицятне, кинень мель сы оймсемс вейсэ эйкакшост ды нуцькаст марто. Содазь, оймсемась, весе паро ёжомарямось, вейсэ пурнавомась свал малавгавты ломантнень, бути те тевенть теемс арсезь ды чарькодезь.


Тесэ жо, «Карнайсэ», неть весе вешематне топавтовить. Невтемакс, зярс эштё эзь ушодово покш чинь мелень витемань программась, тов эрьва сыцясь мусь эстензэ вечкевикс тев. Ломантне жо пурнавкшность пек ламо, весемезэ колмосядт! Кие-бути стамбарнэ якась леенть чирева, вансь покш веденть лымбакстнеманзо лангс, теньсэ витсь ёжонзо, кенярдовтсь оймензэ. Спортонь вечкицятне кундасть футболсо налксеме, тантейстэ ярсыцятне вейке-омбоце мельга аштесть мороженой ды лия ярсамопелень микшнема таркасонть.
Кенярксчисэнть пурнавозтненень шумбракстнемань вал марто пшкадекшнесь «Норов» Агрокомпаниянь группатнень прявтось, МР-нь Госсобраниянь депутатось Александр Поздняков. Сон тешкстась, те таркантень пурнавсть васенцеде, ды ёвтась кемема паро ушодксонть коекс теевемадо. Истя жо пачтясь пурнавозтненень икелепелень аравтлувдонть. Александр Ильичень валонзо коряс, те таркасонть стявтови кудо (сонзэ теемазо ушодовсь), козо тееви алкуксонь каштом. Сонзэ эйсэ кармить пидеме-панеме истямо ярсамопельть, кодат анокстасть кезэрень шкасто минек покштятне-бабатне. Теде башка, тосо теевить эштё мелень витемань ламо таркат, конат вечкевить тей оймсеме сыцятненень.
Седе тов пурнавозтненень поздоровт ёвтась Кочкуровань муниципальной райононь прявтонь полавтыцясь Светлана Тимошкина. Светлана Николаевна покш мель явсь кенярксчинть тешкстамонтень, сетненень, кинь вийсэ ванстовить ды виевгавтовить неень шкане сынст ёнксонь велетне. Кода паро невтемакс ледстинзе Семилей ды маласо уликс велетнень. Сынст вейсэндинзе ды тосо эриця ломантненень максы важодема «Норов» Аграрно-производственной фирмась.
Алкукскак, теньсэ покш путовксост тетят-цёрат Александр Ильич ды Дмитрий Александрович Поздняковтнень, кить течи пек ламо теить велетнень виевгавтомга, ломантненень важодема таркань максомга.

Лезкс – кажос понгозтненень
Аволь ансяк эсест ды маласо велетнесэ эрицятнеде «Норовсо» седейшкава мелявтыть, истя жо невтсть алкуксонь седеймарямо Луганской ды Донецкой республикатнесэ эрицятненень ды тосо спецоперациянь ютавтыцятненень.
Неть читнестэ сынь тов ильтясть эсест велень хозяйствасо нолдавиця эрьва кодамо продукция. Текенень поладсынек, сынь лавкасто рамасть тосо эриця ломантненень эрьва чистэ эрявиксэнть. Малав кавтосядт тёжат целковоень питнес ули-паронть эсест транспортсо ильтизь спецоперациянь ютавтомань границянть видьс.
Невтемакс, ЛНР-нь Красный Луч ошонь эрицятне, Гимблерэнь семиясь, кинень савсь туемс тиринь таркасто, «Агрофирма «Норов» ООО-со мусть эстест важодема ды эрямо тарка. Кудазоравась Наталия Алексеевна кармась «Норовонь» администрациясо хозяйственной пельксэнь коряс заведующеекс, Антон цёразо – МТМ-нь мастерскойсэ подсобной важодиця, Анастасия урьвазо – АЗЭ-нь складонь прявт, вете иесэ нуцькаст Никита яки эйдень кужов. Те семиясь мусь эстензэ истямо тарка, косо ламось тееви ломаненть лезэс, косо теить весементь, штобу стувтомс апаро шканть, конань савсь цидярдомс мейсэяк а чумо ломантненень.

«Норовонь» чилисемат»
Истя лемдеви чувтосто керсицянь раськеютконь васенце фестивалесь, конась минек республикасо ютавтови Кочкуровань муниципальной райононь «Карнай» оймсема базасонть. Тосо вете чинь перть, июнень 20-це чистэ саезь 25-це чис ёрокчист невтьсызь кедьчелькев мастертнэ: Чувашиясто – Евгений Акимов; Марий Элстэ – Владимир Алманов, Владимир Антропов; Удмуртиясто – Юрий Конюхов, Сергей Назаров; Московонь ёнкссто – Николай Итьмон; Пенза ёнкссто – Александр Туркичев; Самара ёнкссто – Владимир Илюшин.
Минек республиканть пельде ёрокчист невтить Вирь Тавлань керсицятне: Пётр, Александр, Максим Рябовтне ды Евгений Миронов.
Кедьчелькевтне важодеме ушодсть фестивалень васенце чистэнть саезь, сынь кармасть тееме скульптурат «Ёвксонь кужо» арт-объектэнть туртов. Минек республикасо сынь ульнесть а весть, ялатеке, важодемадост башка, сынст содавтсызь Кочкуровань райононь Вирь Тавласо Владимир Ромашкин лемсэ «Этно-кудо» ды С. Д. Эрьзя лемсэ изобразительной искусствань музейтнень марто.

Фестивалень участниктнень анок скульптураст ваномо весе
тердевить июнень 25-це чистэ «Карнай» оймсема базантень. Сынст невтемаст ды изницятнень лемест ёвтамось ушодови 14 чассто. Кие те чистэнть тов сы,арсетяно, янксеме а карми!

Валентина Юдина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».