Вторник, марта 19, 2024
Важное

 

Декабрянь 6-це чистэ Орданьбуень Орозбие велень эрицясь Екатерина Ивановна Маторкина тешкстынзе 90 иензэ. Те чистэнть сонзэ кудос пурнавкшность малавиксэнзэ, конат ёвтасть аваст ды бабаст туртов лембе валт. Совсесть велень администрациясто ды казсть РФ-нь Президентэнть В.В.Путинэнь ды Орданьбуе ёнксонь прявтонть А.Н.Антиповонь пельде паронь арсемат.

Катя баба а вечки ледстнеме эйкакшпингедензэ. Сон рана кадовсь урозокс. Колмо иеть ульнесть тензэ, кода кулось одсто Наста авазо. Кавто иень ютазь Иван тетязо урьвакстсь омбоцеде. Чачсь сазорказо. Кавтошка иеть эрясть, ды тетяськак апак учне тусь эрямосто… Александра од авась кармась ськамонзо трямо кавто тейтернетнень. Сеедьстэ Катянь эйсэ трясть-вансть Кеченьбие шабра велесэ, костонь ульнесь тиринь авазо. Тосо эрясь васолбодязо, конань ульнесть кавксо эйкакшонзо. Истя, аванзо сазортнэ, васолпатятне трясть Катянь.

– 1930-це иетнестэ ломантнень кудосто пансесть, кучнесть эрямо лия таркав. Мезень кис? Буто сюпавчинь кисэ, кодамо сюпавчи сестэ? Вете стенас кудонок ансяк ульнесь. Ёвтнесть, кода састь тенек, ружиясо леднесть каськас, арсесть, тозо кияк кекшсь. Мон лавсьсэ ульнинь, кармасть лавсьсэнть сокарямо, истя ярмакт вешнесть ды мезеяк эзть муе… Кудосто панимизь, велестэ – эзимизь. Тетянь ёндо роднятне-раськетне весе кулсесть-ёмсесть, Сергей ялаксозо ваясь, Фёдор ды Семён чавовсть войнасо. Ансяк мон кадовинь эрямо, ськамон пиштевтеме… кажонь шка ульнесь, Паз илязо мере истя эрямс, – сельведь марто ледстни Катя баба.

Школав сон эзь яксе, содасынзе букватнень ды аламодо ловны, сёрмадомо а машты. Тень лангс апак вано, Екатерина Ивановна валдо превсэ, мельсэнзэ кирди ламо мезенть, мельспаро кунсоломс, зярдо ушоды кортамо валмеревкссэ, ледстнеме икелень шкань эрямодонть.

Од шкастонзо вейке ие якась Свердловскоев торфонь таргамо. Се шкане велень малав весе тейтертне ардтнесть те стака важодемантень. Васня усксть мартост шальть, мейле – коцт.

1949 иестэ Екатерина Ивановна лиссь мирденень. Ве кудосо эрясть ламонест: атявт-ававт, мирдензэ кавто ялакст. Аламо шкань ютазь Андрей мирдензэ саизь армияв. Колмо иеть сон служась пограничникекс. Зярдо сась армиясто – васенце тейтернест Настянень топодсть малав ниле иеть. Весемезэ чачсть кавксо эйкакшост: вете тейтерть ды колмо цёрат. Ней сынь эрить эрьва кодамо ошка.

– Мейле карминек стявтомо эстенек кудо. Те шкане эринек ломань кедьга ды шабрава. Кода ютась се стака шкась, а ледстявияк… ансяк маряви, сестэ ломантне ульнесть чевте седейть, паронь арсицят, эрьва кудосонть малав кемень эйкакшт, киньгак арасель сюпавчизэ. Парт понгонесть Маша ды Таня киялон (мирдензэ ялакстнэнь нитне), конат ульнесть тень сазорокс ды ялгакс. Вейкенень-вейкенень лездазь эринек, пурнынек-ютавтынек эйкакштнень свадьбатнень, ильтинек ды вастынек цёранок армиясто,  – ледстни Екатерина Ивановна.

Сон важодсь колхозсо, школасо шлицякс-нардыцякс, Алатырь ошсо, пекарнясо. Малав 40 иеть, кода тусь эрямосто Андрей мирдезэ. Эри цёранзо ды урьванзо марто.

«Авам а вечки аштеме тевтеме, а вечки, зярдо лиятне аштить ды мезеяк а теить. Кизна сон чоп котьми-ози пиресэ. Ярсамояк а совавтови, мери ансяк кандомс тензэ симемс ведне. Мон сёвноса, а мерян тензэ роботамс. Тельня коды понань носкат ды варьгат. Сельмукштомо. Сонсь мельспаросо ёвтни, кинень алтавить кодавкстнэ. Коды эрязасто, кода важодияк, мельганзо а кенерят ваномо, ве чокшнес варьгатне анокт. Эрьва оймсема читнестэ ды покш читнестэ свал якиль церьковав. Иензэ лангс апак вано, нейгак постови», – ёвтни Валентина урьвазо.

Екатерина Ивановна пек ризны эйкакшонзо, нуцьканзо ды сынст эйдест кисэ. Соды, кинь кода молить тевензэ. Сонзэ 12 нуцьканзо ды 10 правнуконзо, конат а стувтнить, сакшныть варштамонзо. Неть нуцькатнень ютксо улян монгак. Катя бабам эри мартонок. Сон вакссонок свал ды эжди лембесэнзэ, максы превть ды арси ансяк паро. Сюкпря теть, бабай, ульть минек марто седе кувать! Кеме шумбрачи теть!

Татьяна Маторкина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».