Вторник, марта 19, 2024
Важное



А. С. Пушкин лемсэ Национальной библиотекась таго кармась федеральной грантонь саицякс. «Культура» национальной проектэнь «Творческие люди» федеральной проектэнть лувсо «Мордовиянь од вайгельть» республиканской литературной фестивалесь лиссь изницякс. Проектэнть ушодыцятне-арсицятне – «Некоммерческое партнерство «Национальный спектр» издателень ассоциациясь ды «Национальная библиотека А. С. Пушкина» ГБУК-сь.



Те проектэнть прявт бажамокс ашти од талантонь мукшномась, сыненст лездамось, содавикс писательтнень ды поэттнэнь марто вастовомань, од автортнэнь марто тонавтыця занятиятнень ютавтнемась.

«Мордовиянь од вайгельть» проектэнь программантень совавтозь ламодояк ламо мероприятият. Неть: литературань коряс пелькстамот, семинарт, тренингт, лекцият, интерактивной занятият, писательтнень марто республикань районтнэва ардтнемат. Конкурсонь итогтнень коряс нолдави «Молодые голоса Мордовии» вейспурнавкс. Проектэнть прядовомсто ютавтовить литературно-музыкальной фестиваль ды научно-практической конференция.

Литературной конкурсось яволявтозь, литературной лабораториясь панжозь, сонзэ площадканть лангсо уш мольсть зярыя мастер-класст, лекторийть, тренингт.

Ней башка аламонь-аламонь ёвтнетяно эрьвадонть.

«Литература Мордовии: от истоков до современности» лекториенть ютавтызе педагогической наукань докторось, профессорось, МР-нь высшей школань заслуженной роботникесь Александра Михайловна Каторова.

«Основы стиховедения: основные стихотворные размеры в русскоязычной поэзии Мордовии» мастер-классонть пурнакшнызе филологиянь наукань докторось, Н. П. Огарёв лемсэ МГУ-нь профессорось Светлана Петровна Гудкова.

«Реализация творческого замысла по эрзянскому стихосложению» мастер-классонть мельстуевиксстэ ютавтызе эрзянь поэтессась, «Сятко» журналонь ответственной секретаресь Мария Левщанова. Сон ёвтнесь эрзянь стихень сёрмадомань лувтнеде, вешематнеде, эсь творчествадо, тешкстызе «ВАЛ» эрзянь автортнэнь литературной вейсэндявксонть эрявиксчинзэ. Пурнавозтне мельспаросо кунсолость стихензэ, эйкакштне варчнизь эсь ёрокчист эрзянь кельсэ ловномасонть, истя жо стихтнень рузонь кельс ютавтомасонть.
Те мероприятиянтень библиотекань раськень ды краеведениянь литературань отделэнь важодицятне анокстакшность «Живой родник поэзии» выставка.

МР-нь народной писателенть А.М. Доронинэнь творчестванзо коряс «Поэт, романист, наставник» лекториенть ютавтызь филологиянь наукань кандидатось, М. Е. Евсевьев лемсэ МГПУ-нь тиринь келень ды литературань кафедрань доцентэсь Светлана Николаевна Маскаева ды те вузонть филологиянь факультетэнь студенттнэ. Светлана Николаевна ёвтнесь писателенть творчествадо, тешкстызе сонзэ исторической романтнэнь лиятнеде явовиксчинть, макссь питне сёрмадыцянть поэтической произведениятненень ды романтнэнень. Эсь ванкшномань-тонавтнемань важодевксэст марто кортасть М.Е. Евсевьев лемсэ МГПУ-нь филологиянь факультетэнь студенттнэ, конатнесэ сынь тейсть анализ писателенть жанрань-тематикань коряс явовиксчинтень, тейсть домка характеристика сонзэ художественной произведениятненень.

Писателень мастерствань коряс тренингенть ютавтызе мокшонь поэтессась, «Мокша» журналонь прявт редакторось Марина Аникина. Сон пурнавозтненень ёвтнесь эсь творчествадо, сёрмадомань салаваксчитнеде, ловнось мокшонь кельсэ стихензэ.

Мероприятиясонть истя жо кортасть мокшонь поэтессась Наталья Садомская, журналистэсь, поэтессась, блогерэсь Оксана Белкина. Сынь ёвтнесть литературань ёнкссонть эсь важодемадост.

Тренингсэнть ловнозельть мокшонь поэттнэнь стихест, пурнавозтне макснесть тенст кевкстемат. Истя жо библиотекань раськень ды краеведениянь литературань отделэнь важодицятне анокстакшность мокшонь поэттнэнь ды писательтнень произведенияст коряс презентация ды теекшнесть «Поэтэнь вайме» книгань выставка.

«Кода кармамс писателекс» тренингенть ютавтызе эрзянь поэтессась, МР-нь Писателень союзонь правлениянь председателесь, «Чилисема» эйкакшонь журналонь ответственной секретаресь Татьяна Мокшанова. Пурнавозтненень сон ёвтнесь творчествадонзо, кода ушодсь сёрмадомо, невтинзе поэзиянь вейспурнавксонзо, ловнось эсь стихензэ. Ломантнень башка мелест явовтынзе «Оймамо тарка» стихень вейспурнавксонзо лангс, конась лиссь 2022 иестэ. Авторось лови, те сонзэ сехте покш изнявкс литературань тевтеемасонзо.
Тренингсэнть гайгсть Татьяна Петровнань рузонь, эрзянь ды мокшонь кельтнесэ стихензэ. Мероприятиянтень библиотекань важодицятне тагояк анокстакшность эрзянь ды мокшонь писательтнень ды поэттнэнь произведенияст коряс презентация ды «Поэтическая летопись Мордовии» книгань выставка.

Краснослободскоень, Зубова-Полянань, Темниковань муниципальной районтнэсэ эриця од автортнэнь марто ютавтозель вастовома-семинар, конань пурнакшнызь МР-нь Писателень союзось, «Слобода» литературной вейсэндявксось ды А. С. Пушкин лемсэ Национальной библиотекась.

Краснослободскоень библиотекантень пурнавкшность од автортнэ ды сынст наставникест. А.С. Пушкин лемсэ библиотекань важодицятне ёвтнесть проекттэнть, сонзэ тевс совавтомга ютавтовиця мероприятиятнеде. «Слобода» литературной вейсэндявксонь прявтось Н. П. Трушкина нурькинестэ пачтясь тевтеемадост. Сон невтинзе книгатнень, конатне лиссть сынст лезксэст вельде, сындест жо 50 ламо экземплярт. Вейсэндявксонтень совицятне, содавикс писательтне ды поэттнэ, ветить покш важодема, конадонть пачтявкшны республиканской ды районной СМИ-тнесэ.

Семинарсонть гайгсть поэзиянь ды прозань жанрасонть од сёрмадыцятнень произведенияст, конатненень питне путсть наставникест. Мероприятиянть прядовомадо мейле семинаронь участниктненень максозельть сертификатт.

«Народные сказители мордвы: Ефимия Петровна Кривошеева» лекториенть ветясь Россиянь Писателень союзонтень совицясь, Писателень интернациональной союзонь кандидатось, МР-нь Эрзянь этнокультурной наследиянь фондонь правлениянтень совицясь А. В. Горбунова.

Анжелика Владимировна, кода Ефимия Петровнань нуцька, ёвтнесь Кривошеевань эрямодонзо ды творчествадонзо, тешкстась, келя, ёвтамонь творчествань тонавтницятне-ванкшныцятне сонзэ произведениятнень аравтсть масторсонть истят содавикс сказительтнень-импровизатортнэнь ваксс, кода С.Стальский, М. Крюкова, Д. Джабаев ды лиятнень.

Лекториенть важодемасо ульнесть сказительницанть малавикс раськензэ: Ефимия Петровнань цёранзо, содавикс поэтэнть – Илья Кривошеевень тейтерезэ Ольга Ильинична Горбунова, праправнуцьказо М. Мурюмина, Ицялонь М.Н. Тарасов лемсэ краеведениянь музеень предметтнэнь прявт ванстыцясь, экологиянь просветителесь Н. М. Зубова. Мероприятиянтень анокстазель «Сказительские традиции мордвы» выставкась.

Проектэнть лувсо ульнесь вастовома Рузаевкань муниципальной райононь од автортнэнь марто. Ютавтыцятне – А.С. Пушкин лемсэ Национальной библиотекась, МР-нь Писателень вейсэндявксось, «Scriptor» од ломанень литературной студиясь, Рузаевкань «Библиоэкспресс» модельной библиотекась.

Библиотекантень пурнавкшность од автортнэ, сынст наставниктне, прозань ды поэзиянь вечкицятне. Сыненст истя жо пачтязель «Мордовиянь од вайгельть» проекттэнть, кода сон совавтови эрямос. МР-нь Писателень союзонть пельде инжетненень шумбракстнемань вал марто пшкадекшнесь Россиянь Писателень союзонтень совицясь Татьяна Маланьчева.

Библиотекань важодицятне ёвтнесть Рузаевкань райононь писательтнень ды поэттнэнь творчествадост.
Рузаевкань райононь сёрмадыцятнень пельде кортась П. В. Громов. Сон пурнавозтнень содавтынзе «Scriptor» литобъединениянть тевтееманзо ды од автортнэнь марто, конатне ловность эсь произведенияст. Елена Соломанина поэтессась аволь ансяк ловнось эсь стихензэ, истя жо невтсь эсензэ арсевкст музыкальной номерт. Вастовомасонть ульнесь «Ковчег» журналонь прявт редакторось Н. А. Шестакова, кона ёвтнесь Рузаевканть литературной эрямодонзо.
Мероприятиянтень А. С. Пушкин лемсэ библиотекань раськень ды краеведениянь литературань отделэнь важодицятне анокстакшность «Писатели – наши земляки» книгань выставка, конасонть невтезельть Рузаевкань райононь писательтнень произведенияст.
«Молодые голоса Мордовии» проектэсь поладови седе товгак, сонзэ лувсо ютавтовить ламо мельстуиця мероприятият.

Надежда Бочканова,
А. С. Пушкин лемсэ Национальной библиотекань
раськень ды краеведениянь литературань отделэнь прявт.

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».