Вторник, марта 19, 2024
Важное
Чачсь од морокуро


А ёвтавияк, кодат ёжомарямот печтясть весе, кить маень 27-це чистэ сакшность «Луч» Культурань кудов концертэнь ваномо. Сонзэ анокстызь ды невтизь «Вармава» ансамблясо морыцятне. Те – од морокуро, конась чачсь аволь умок. Эйсэнзэ ниле тейтерть. Ды весе сынь моронь вечкицят. Те вечкемась тердинзеяк сынст самс тонавтнеме Н. П. Огарёв лемсэ МГУ-нь Национальной культурань институтов. Кавто морыцятне – Светлана Гарцева ды Мария Майорова – тонавтнемаст уш прядызь, кенерсть морсеме лия ансамбля мартояк.

Од морокуронь теемадо мелеськак васня сась сынст превс. А вана кавто Настятне, Азоркина ды Митрофанова, зярс нейгак тонавтнить. Теке марто мукшныть шка сакшномс од ансамбляв морсеме.
Сынь кармасть пуромкшномо аволь пек умок. Тень лангс апак вано, кенерсть уш невтеме эсь пряст аволь ансяк Саранскойсэ ды республикань буетнесэ, аволь весть пачколесть Мордовиянь томбалевгак. Ды эрьва косо вастыть эйсэст пек лембестэ ды седейшкава. Лиякс а кодаяк. Истя, кода морыть неть тейтертне, аволь эрьва косто муят. Сынь эсест моросост кунсолыцятнень оймес сыремтить кода ризнэмань, истя талномань ды, нама, кенярдомань ёжомарямот.

Кода парсте ладясть неть ниле тейтертнень вайгелест, невтизе ютазь концертэськак. Меремс, «сон ютась парсте» – те мезеяк а меремс. Концертэнть молеманзо перть кунсолыцятне эзть лотксе цяпамодо ды «бравонь» пижнемадо. Эрьва морось – те мезе-бути од ды тантей. Ламотнень эйстэст (сынст ютксо ульнесть эрзяньгак) кунсолыцятне маризь васенцеде. Сынь пек кезэрень. Моравитькак седикелень ладсо. А стяко сонсь концертэськак лемдезель «Из прошлого в настоящее…». Весемева неявсь, «Вармава» ансамблянь тейтертне седе пек вечксызь сеть моротнень, конатнень морсесть минек покштятне-бабатне. Секс васенце бажамост – вешнемс ды одов вельмевтемс сетнень, конатне умок уш лововсть «калмазекс». Саемс «Вай, верьга, верьга» эрзянь моронть. Сон истя жо стувтозель. Од эрямо тензэ сась аволь пек умок. Эсест репертуарс те моронть совавтызь «Вармава» ансамблясо морыцятнеяк. Концертсэ сон гайгсь «Ламзурь» ансамблянть марто вейсэ.

Эрьва моронть марто киштемат. Косо киштсть сынсь морыцятне, косо тенст лездамо лиснесть «Пилигрим» ды «Антарес» ансамблятнесэ киштицятне. Кой-кона моротне невтезельть театрализованной путовкс ладсо. Те кармавтсь весень учомс, мезе карми седе тов.

Концертэсь ютась виде-паро вейке лексемасо. Сонзэ прядомадо мейлеяк ваныцятнень ды кунсолыцятнень мелест арасель лисемс «Луч» Культурань кудонь покш залстонть ды кувать эзть нолда «Вармаванть» сцена лангсто. Ламот видькстасть, келя, од ансамблянть моронзо минек туртов – те казне, конань арась питнепезэ.
Истя улияк. Кезэрень моротне аволь ансяк ледстнить миненек ютазь шкадонть, сынь кандыть певтеме кеняркс ды максыть эрямонь вий весенень, кить эйсэст кунсолыть. Секс эряви весементь теемс сынст ванстомга ды сы шкань эрицятненень кандомга.

Концертэнть ушодкссо невтезель видеоневтема, кона макссь чарькодема, мекс морокурось лемдезель «Вармавакс». Вармавась – те варманть лангсо азорава. Сон эрси лембекс, сэтьмекс, теке марто сеедьстэ невтнесы эсь виензэ ды норовонзо. Вармаванть эйстэ а сайсак сеньгак: сон а пели мездеяк, а ашти вейке таркасо, свал ки лангсо, свал вешни-мучки од таркат ды од тёкшт. Обуцянь истят ёнкст улить «Вармава» ансамблянь тейтертненьгак. Сынь одт, оймесэст-седейсэст лакить васов тердиця вийть. Секс ули кемема, сынст тевест туить верев, ды те морокуронть лемезэ карми гайгеме аволь ансяк Мордовиясо, весе масторонок келес ды сонзэ томбалеяк.

Уледе содавикст:

Светлана ГАРЦЕВА – «Вармава» морокуронь прявт. Чачсь ды кассь Нижней Новгород ёнксонь Шатковской буень Архангельской велесэ.

Мария МАЙОРОВА – «Вармава» морокуросо морыця, верьга вайгелень таргиця. Чачсь-кассь Чаунза буень Репакуж (Репакуши) велесэ.

Анастасия АЗОРКИНА – «Вармава» морокуросо морыця. Чачсь Кочкур буень Ташто Мурза (Ст. Турдаки) велесэ.

Анастасия МИТРОФАНОВА – «Вармава» морокуросо морыця. Чачсь Саранск ошонь Луховка посёлкасо.

Раиса Щанкина
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».