Неть читнестэ Мордовия Республикань Кудосо ютавтовсь МР-нь Государственной Собраниянь колоньгемень ветеце сессиясь. Тов, депутаттнэде башка, сакшность МР-нь Прявтось Артём Здунов, МР-нь Прявтонь ды Правительствань аппаратс совицятне, республикань оштнень ды Мордовиянь муниципальной районтнэнь прявттнэ, министерстватнень ды ведомстватнень руководительтне ды лия ответственной ломанть.
Сессиянть панжизе ды ветясь МР-нь Госсобраниянь Председателесь Владимир Чибиркин. Чинь повесткас совавтозельть кемголмово кевкстемат. Сынст ютксто седе ламотнесэ кортавсь эрямонь социальной ёнкстнэде.
Васенцекс ванкшновсь организациятнень ули-парост лангс налогонь коряс законось. Кортамось мольсь деловой ды микшнемань куншкакуротнеде, истя жо тёжа кавонзазь метрадо седе покш помещениятнеде, косо панжозь офист, лавкат, кафеть, ресторант, мазычинь салонт.
«Ули-паронь объекттнэнь кадастрань питнест покшолгавтоманть пингстэ предпринимательствань субъекттнэнь лангс налогонь сталмонть сеске кастомань а нолдамонть туртов ёвтави мель кемекстамс налогонь преференция, конань коряс организациятнень ули-паронть лангс ловозь налогонь покшолмась кастови пельксэнь-пелькс.
2024 иестэ налогтне кастовить 40 %, те аволь седе ламо 2023 иенть коряс, 2025 иестэ – 30% 2024 иенть коряс ды 2026 иестэ – 30 % 2025 иенть коряс», – толковизе Мордовиянь Правительствань Председателень полавтыцясь Наталья Таркаева.
Мордовиянь Госсобраниянь депутаттнэ пшкадсть Россиянь Правительствань Председателентень Михаил Мишустиннэнь миграционной законодательствань одкстомтомань кевкстеманть коряс. Парламентарийтне домкасто ваннызь омбо масторонь эрицятнень рузонь келень содамост туртов питнень максомантень общественной организациятнень представительтнень тердемань лувонть ды документсэнть тешкстызь мелест-арсемаст.
«Те пек эрявикс кевкстема, Россиянь обществантень омбо масторонь эрицятнень совамось нежедезэ рузонь келентень, историянтень, законтнэнень ды минек масторонь эрямо лувонтень мелень явоманть лангс», – тешкстась МР-нь Государственной Собраниянь Председателесь Владимир Чибиркин.
Чинь повестканть лувсо ваннозь ламот кевкстематне – социальнойть. Сынст ютксо республикасонть эриця сельмень коряс инвалидтнэнень социальной лезксэнь максомась.
МР-нь Госсобраниянь Председателень полавтыцясь, Социальной комитетэнь прявтось Наталья Долматова пачтясь, эрицятнень те категориянтень эрьва ие кармить пандовомо 15 тёжат целковойть, те лезды идемс ютавтовкстнэнь сыненст лездыця кискатнень кирдемаст ды ветеринарной обслуживанияст лангс.
«Федеральной закононть коряс кемекстазь инвалидэнть правазо, конань ули кисказо, ракшанть кирдемань ды ветеринарной обслуживаниянь коряс ютавтовкстнэнь велявтоманть лангс. Компенсациясь пандови РФ-нь Социальной фондонь бюджетстэ. Тедеде сонзэ покшолмазо 35 тёжат целковойть. Мордовиясо сельмень коряс инвалидтнэнень лездыця кискатнень кирдемс ютавтовкстнэнь покшолмась – малав 50 тёжат целковойть. Неть ярмактне сатыть кискатнень кирдемаст туртов», – мерсь Наталья Долматова.
Парламентарийтнень мелест коряс ламо эйкакшонь триця семиятненень мереви республикань авань капиталонь ярмактнень ютавтомс квартирань эли кудонь витнемс. Теде башка, неть ярмактнень лангс истя жо мереви рамамс музыкальной инструментт эли лия оборудования эйдетнень туртов, конат яксить музыкальной школатнес.
Депутаттнэ сессиясонть ванкшность ламо лия кевкстематкак.
Сессиясонть ютазь иестэ топавтозь важодемадонть пачтямо марто пшкадсь МР-нь Счётной палатань прявтось Николай Ларьков. Ламо талновтыця кевкстемат, конат сюлмавозь сетнень марто, кинень эштё эзть топоде 18 иеть, ёвтась Мордовия Республикасо Эйкакштнень праваст коряс уполномоченноесь Наталья Юткина.
Меельцекс Мордовиянь Госсобраниянь Председателесь Владимир Чибиркин ёвтась поздоровт депутаттнэнень Россиянь парламентаризмань сыця чинть кувалма.
Валентина Юдина