Воскресенье, июня 23, 2024
Важное

Саратовань областень Петровской райононь Оркина эрзянь велев ардомась байтяк, Саранскойстэ малав 4 част. Ансяк минек делегациянтень, конась ардсь тов «Шумбрат» мокшонь-эрзянь раськень фестивалев, сон эзь марявояк. Раськень моротне, пеедькшнематне киртизь кинек. 

Мордовиясто Саратовань областев мельспаросо якасть Эрзянь-мокшонь раськень регионъютконь общественной организациянь прявтось Юрий Мишанин, Равчирень раськетнень культурань куншкакуронь отделэнь прявтось Валентина Дыдыкина, «Ламзурь» ансамблясь, конань прявтсо «Литова» эрзянь аватнень вейсэндявксонь кирдицясь Раиса Щанкина вейсэ библиотекаренть Вера Пронина марто, Рузаевкасто «Тяштеня» ансамблясь, «Сияжар» редакциянь корреспондентэсь Александр Данильчев ды «Умарина» морамонь ды киштемань государственной ансамблясь.

Вармав, пиземев чись эзинзе тандавто киньгак. Оркинась вастсь эйсэнек лембе мизолкссо, тантей каванямкасо ды морамосо-киштемасо. Эрзянь-мокшонь национальной центранть икеле, конась кандтни сонзэ панжицянть А. С. Кузнецовонь лемензэ, сравтозель ярмунка, косо эсест теевксэст, ставксост-кодавксост, пидевксэст-паневксэст невтизь Петровской, Советской, Ершовской, Татищевской районтнэнь эрзятне-мокшотне ды лия раськень ломантне. Кодашка уцяска варчамс кезэрень эрзятнень тантейкатнень: курникенть, дураккуяр потсо суронь кашанть, овтонь лапанть, рестазь калонть, морков ды манка марто икранть, сюкоротнень, якстерькаень позанть… Келеть нильсак!

Инжетнеде кенярксчинтень пурнавкшность пек ламо, ютксост ульнесть РФ-нь Федеральной Собраниянь Государственной Думань депутатось Виктор Кидяев, Саратовань областень Раськень политикань коряс министрась Наталья Трошина, тосонь Правительствань ды Общественной палатань представительтне, Петровской райононь администрациянь прявтось Александр Гречихо, сакшность Челябань, Свердловскоень, Пензань областтнень эрзятне ды мокшотне. Весень седейшкава вастсть Саратовань областень «Шумбрат» эрзянь-мокшонь раськень автономиянь прявтось Валентина Кривошеева ды Оркинань Культурань кудонь сотрудниктне. Центрань фойесэнть ютавтозельть сёвонень налкшкень теемань ды чувтосто керсемань коряс мастер-класст, невтезельть раськень оршамопельть, весень тонавтсть киштеме ды панкссто някань-ванстыцянь тееме. А мейле инжетне пелькстасть пиксэнь ускомасо: тейтертне цёратнень каршо. Нама, цёратне максызь изнямонть масторлангонь «лавшо пельксэнтень».

«Шумбратось» ушодовсь Оркина велень эрицятненень, конатне чавовсть Ине Отечественной войнасо, памятникентень цецянь путомасо. Мейле весе сюконясть эсь велень героентень, кандсть цецят А. С. Кузнецовонь мемориальной лазонтень. Александр Сергеевич – те се ломанесь, конась ульнеськак Оркинань культуранть кирдицякс, сонзэ вийсэ панжозель Раськень центрась, «Кучугуры» эрзянь моронь ансамблясь, косо сон ульнесь прявтокс ды баянистэкс. Культурань кудосонть невтезель эрзянь-мокшонь культурань ды эрямо лувонь музеесь, А. С. Кузнецовонь лемс панжозель од выставкась, конанть пурнызь низэ ды тейтерезэ.

А мейле весе пурнавкшность Культурань кудонь залонтень, конась эль кельгстинзе весе пуромозтнень. Панжизе торжественной пельксэнть «Умарина» ансамблясь «Вейсэнь Россия» моросонть. Весенень пачтязельть поздоровтне Россиянь Финнэнь-угрань раськетнень Ассоциациянь прявтонть Пётр Тултаевень пельде. Седе тов Оркинань сырькаесь Нина Лаврентьевна Шнякина озномадо мейле кирвазтизе раськень штатолонть. Покш инжетне явшесть казнеть ды Сюкпрянь коневт Оркина велень ды Саратовань областень эрицятненень, конатне ванстыть эсест тиринь келест, коест-кирдаст ды культураст, бажить а ёмавтомс сюлмотнень минек республиканть марто. Тень невтизе концертэсь, косо киштсть ды морасть «Кучугуры», «Лисьмене» ансамблятне, Павел Леонтьев баянистэсь, шабра регионтнэстэ сазь «Яксярочкась», «Ламзуресь», «Тяштенясь»… Весемезэ невтезельть 30 номерт!

«Шумбратось» невтизе, кода тошнакадсть тосонь эрицятне истят вастовоматнень кисэ, кодашка вейсэнь вий ды лембе марявсь те покш кенярксчисэнть. Палкине марто покштятнеяк-сырькайтнеяк капшасть кунсоломо моротнень, тиринь кельсэ кортамотнень, ламотнень эзть кирдеве сельведест. Секскак, «Шумбратонтень» – кувака эрямо ды ансяк икелев!

Марина Девятова

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».