Суббота, мая 25, 2024
Важное

Одсто юткстонок аламот кить арсить, кодамо карми сыречись, кие карми мельгат якамо стакасто сэредемстэ. Неень шкась кармавты ломаненть ламо важодеме, допрок полавтовсть эрямонть лангс вановтось, вейке-вейкенень мелень явомась.

Бути икеле ламот сэредиця ломантнень мельга куломозост якасть сехте малавикстнэ: нись эли мирдесь, эйкакштне, урьватне, – ней жо, паряк, кой-кить улевельтькак анокт мазылгавтомс тетятнень-аватнень сыречист, ансяк эдь тенст эряви эштё кувать важодемс пенсияв лисемга. Текенень поладсынек, одтнэньгак покш мелявксост эрямо таркань коряс (ипотекат пандыть). Паро, ней улить лецямонь ды сыречинь коряс мельга якамонь истят таркат, косо эрьвантень явови сатышка мель.
Течи ули меленек ловныцятнень теевтемс содавиксэкс Чаунзань райононь Комсомольской ЦРБ-нь Покш Березникень паллиативной отделениянь медсестранть Надежда Аношкина (тейтерьксэнь – Самаркина) марто. Те эрзянь авась пингензэ алты медицинантень, неень шкасто стака ловомс, зяро ломанень эрямот сон идесь, зяронень казсь шумбрачи.

Масторонть лангсо улить ломанть, кить сы шкань профессияст кочкить эштё эйкакшокс улезь, весе виест путыть сенень, штобу аволь ансяк те арсемась топавтоволь, шкань ютазьгак тунь а янксемс весть кочказь тевенть коряс. Нама, истятнэнь юткс минь бу апак кавтолдо совавтовлинек медицинской сестранть Надежда Аношкинань. Сонзэ чачома-касома таркась – Покш Березникень райононь Шугурова велесь. Эйкакшчизэ ютась ламо эйкакшонь триця семиясо. Тетязо-авазо, Василий Степанович ды Анастасия Фёдоровна, трясть-кастсть вете тейтерть, кинь коряс вестькак визьксчамасо эзть аште. Сынь весе кассть трудонь вечкицякс, ломань марто ладямо маштыцякс. Васенце тейтерест Татьяна умок уш Московсо. Мирдензэ марто трясть-кастсть ниле эйкакшт, эрить покш ояксчисэ, ней ваныть нуцькат. Мельганзо чачсь Анна, кона эрямонь тевекс кочкизе медицинанть, эри Москов алонь Зеленоград ошсо. Валентина (колмоце тейтерест) кадовсь эрямо тиринь Шугурова велес, сон ламо иеть якась тетянзо-аванзо мельга, весе седейлембензэ максызе вечкевикс ломанензэ перька якамонтень. Июлень меельце читнестэ топоди ие, кода кулось аваст – Анастасия Фёдоровна, тетяст умок уш тусь эрямосто. Се парось, конань мирдть-нить теизь эйкакшост туртов, ламоксть велявтсь эстест.
Галина (веженсь тейтерест) истя жо эри ды важоди тиринь Шугурова велесэ. Кода вере ледстинек, Надежда, нилеце тейтерест, эштё вишкапингстэ арсесь эрямонзо алтамс медицинантень.

– Монень ульнесь кинь пельде тонавтнемс. Аня патям сестэ уш важодиль медсестракс, лангозонзо ванозь ды тевдензэ кунсолозь, седеяк покш мелем касыль улемс медикекс. Эйкакшокс весе налксематне тенень алтазельть. Ледстневи, кода-бути муинь ташто шприцт ды авань эйстэ салавинька допрок пельния резинасто грелканзо. Истя тонавтнинь уколонь путомо, – ёвтни Надежда Васильевна.

Школасо тонавтнемстэ сон кармась ломанень лецямо алкукс, эзь пеле путомо уколт сынст велень вейке сыре ломаннень.
Эрьва ков кенерсь кизэнь каникулатнестэ од тейтерькинесь. Вейсэ сазорканзо марто топавтсть кудоютконь тевтнень. Эдь покш патятне тукшность эрямо Мордовиянь томбалев, тетязо ды авазо важодсть колхозсо, секс кудоютконь тевтне пракшность сынст лангс. Ульнесть шкат, скалтнэде мик колмо прят кардазсост ульнесть. Надежда Васильевна семиясост цёрынень таркасоль, сон кодамояк стака тевде эзь пеле. Тонадсь тикше ледеме, пенгень лазномо, сока мельгаяк снартнесь якамс, мезенть, нама, эзь шна тетязо. Тешкстасынек, те сонзэ пельде сон тонадсь мик лишмень кильдеме-нолдамо.
Видькстатано, неть тевтне велень аволь эрьва цёрынентень топавтовикст, Надежда жо эрьва мезес тонадсь ды зярдояк эзь пеле кодамояк роботадо. Нать, секс Саранскоень медучилищанть прядомадо мейле сеске велявтсь тиринь велев, куш кучокшнызь важодеме лия таркав.

Ютазь пингень 80-це иетнестэ эрицятнень ламочист коряс Шугурова велесь Покш Березникень районсо сехте покшоль. Те шкантень строязель колмо этажсо од школа, конась пешксель эйкакшто. Теде икеле таштосонть мик кавто сменасо тонавтнильть. Школанть эйстэ аволь васоло стявтозель кавто этажсо административной зданиясь, косо явозель тарка фельдшерско-акушерской пунктонтень. Самай тосо 1987 иестэ трудонь пингензэ ушодызе Надежда, сестэ эштё Самаркина, теке жо иень сёксестэнть лиссь мирденень эсест велень цёранть экшс.
1989 иестэ чачсь Юлия тейтерькинест. Ансяк одтнэнь эрямост эзь ладяво. Тень лангс апак вано, явомадо мейлеяк мирдть-нить вейке-вейкень лангс покш кеж эзть кирде. Надежда тейсь истя, штобу тейтерест парсте содавлизе тетянзо, эрявольть ояксчисэ ды тетянзо ёндо сырькаензэяк вечкевлизе. Нама, неень шкасто истямо тев чуросто вастневи.

Теке шкасто Надежда Васильевна сонськак явсь мель икелень мирдензэ семиянтень. Важодема таркасо васень шкасто сонзэ аравтызь прявтокс. Фельдшердэнть башка тосо важодсть эштё колмо ломанть. Те шкас паро валсо ледстни тонавтыцянзо – акушерканть Любовь Семёновна Бояркинань ды эйкакшонь медсестранть Анна Ивановна Бояркинань.

Надежда Васильевна аволь ансяк фельдшерско-акушерской пунктсонть чевтестэ ды лембестэ вастсь ормалгадозтнень, сеедьстэ пачколесь тенст кудовгак, топавтсь врачтнень кармавтомаст. Кодамо шкасто бу сонзэ аволизь терде, свал аноколь лездамс сэредицятненень.
Ульнесть шкат, зярдо Вейсэ посёлкасонть (сон истя жо сови Шугурова велень поселениянтень) арасель фельдшер. Зярдо тензэ мерсть саемс эсензэ лангс те участканть, каршо молеме эзь карма. Содась, тосо эрить сыре ломанть ды сондензэ башка тенст а кинень ульнесь максомс медицинской лезкс. Таркась аволь маласо: зярдо ялго ютась, зярдо велосипедсэ ардсь...

Васенце таркас сон свал аравтсь орманть видестэ лангс ливтеманть. Содамс, кодамо врачнень ильтямс сэредицянть. Эдь теде ашти ломаненть седе эрязасто пичкамозо. Ормаменькстнэньгак эсензэ лангс саилинзе, штобу велень эрицятненень аволь саво ардомс райцентрав, ламонть сонсь тенст пачтилизе.

Вана истя: чистэ чис, иестэ иес (малав колоньгемень иеть) тиринь велесэ топавтсь вечкевикс тевензэ. Мезденть седе шождаль, те кода тиринь велень эрицятне сонзэ парсте содасызь, истя жо сонгак сынст. Эдь улить истят ормат, конат ютыть малавикстнэнь пельде эйкакштненень. Нама, сындест содась фельдшерэсь, секс орманть седе шождаль тензэ лангс ливтемс.

Шкань ютазь Надежда Васильевна тевензэ поладызе Покш Березникень Сыре ломанень ды инвалидэнь кудосо-интернатсо. Виде, тосо савсь тензэ важодемс ансяк стакасто сэредицятнень марто, кинень истя жо макссь седейлембензэ. Кода маштсь, шождалгавтсь сынст эрямост, ды аволь ансяк лецямопельсэ лездась, чевте валсояк. Шкань ютазь Надежда Васильевнань тердизь важодеме Чаунзань райононь ЦРБ-нь Покш Березникень паллиативной отделенияв медицинской сестракс. Сон каршо эзь моле. Тов самсто коллективесь вастызе парсте, важодить прок вейке семиясо. Надежда Аношкинань валонзо коряс, теньсэ покш путовксозо сынст отделениянь прявтонть Марина Александровна Кумакшевань.

Надежда Васильевна куш бажась эрьва ков кенеремс: важодеме, тетянзо-аванзо туртов лездамо, эсензэ кудонзо ваньксстэ кирдеме, Юля тейтеренстэнь мелень явомо, – ялатеке а шождаль цёравтомо.
Эрямосо эрьванть эсензэ уцясказо. Нать, сонсь Пазось кучсь тензэ эрий ялга. Зярдо Юля тейтерензэ туртов топодсть кото иеть, пшкадсь тензэ эсест ульцянь эрицясь Николай Фадеев, истя вейсэндявсть кавто ськамост эрицятне. Юля тейтерензэ туртов Николай Павлович теевсь малавикс ломанекс, конась тризе-кастызе. Ламо иеть те семиясь эри покш кенярксчисэ: вейке-вейкенень лездазь ды чарькодезь. Ансяк вана апак учонь кажось, конась лиссь Николай Фадеевень марто, кандсь покш седейризкс. Вейксэ иеде икеле важодема таркасо сонзэ пек томбавомадо мейле врачтне эзть ёвта оймавтомань валт…

Нолдамс кедтнень жо аволь Надежда Васильевнань обуцясо. Сон тейсь весементь, штобу велявтомс эрямонтень вечкевиксэнзэ, ков ансяк эзь яка, кинень ансяк эзь пшкале лезкс мельга. Весе виензэ путозь ды Пазнэнь ознозь, идевсь Николай Павлович... Надежда Аношкина мари прянзо уцяскавокс, сон свал важодема таркасто капши кудов, косо тензэ пек кенярды мирдезэ. Юля тейтерест умок уш прядызе тонавтнеманзо Саранскоень Кооперативной институтсо (ней – университет). Лиссь мирденень, казсь тенст кавто нуцькинеть, кить сеедьстэ эрсить инжекс Шугуровасо ды вечкить кортамо эрзянь кельсэ. Андрей Беськаев содамост истя жо седейшкава сакшны нинзэ семиянть содавтомо, эрьва тевсэ тенст лездамо. Вана истя, эрьвась юткстонок мусы эсь уцясканзо. Эдь кода минь печтясынек эрямонь стакачитнень, ламось ашти эсенек эйстэ.

Валентина Юдина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».