Воскресенье, марта 03, 2024
Важное

Ноябрянь 29-це чистэ «Мордовия» фирменной поездэсь тыц пешксель. Проводницась дивсесь, ков истя недлянь куншкане ардыть Саранскойстэ Московов эрицятне. Содавтынек, ванды, ноябрянь 30-це чистэ, «Россия» выставкасонть-форумсонть юты Мордовия Республикань чись ды тесэнь весе эрицятне бажить молемс ды кирдемс тиринь ёнксонть истямо ответственной чистэнть. Ды аволь ансяк сынь, Московсо ды весе  масторонть келес эрить ламо эрзят-мокшот, рузт, конатнень ундоксост истя жо Мордовиясто, ды неть ломантне истя жо капшасть те чистэнть ВДНХ-в.

Тешкстасынек, «Россия» выставкась карми важодеме 2024 иень апрелень 12-це чис.

75-це павильонось те чистэнть увнось теке мекшкудо. Вастовомат, кутморямот, морамот, киштемат… Мордовиянь стендэсь Ине покш тумонть марто весе инжетнень туртов теевсь шумбракстнемань ды вастовомань таркакс. Алкуксонь кенярксчи! Сон ушодовсь торжественной панжомастонть, конань шкасто покш экранстонть весе пурнавозтне мельспаросо ды виев цяпамосо вастызь Россиянь Президентэнть В. В. Путинэнь валонзо эрзятнень, мокшотнень ды шокшотнень превейчидест ды пингеде-пингень перть ялгаксчисэ эрямодост.

Панжизе промксонть ПФО-со Президентэнь полномочной представителесь Игорь Комаров. Сон тешкстась: «Мордовиясь выставкасонть невтеви Ине чувтокс, конань ундоксонзо – эрзянь-мокшонь масторонть историязо, тарадтнэ – те моданть лангсо эриця ломантне, лопатне – сынст паро тевест». Государственной Думасо «Единая Россия» фракциянь прявтось Владимир Васильев тешкстась: «Национальностесь – те покш вий, масторонь питнейчи. Теде кортась минек Президентэсь. Весе минь вечксынек Россиянть, вечксынек Мордовиянть. Мордва – тынь дока ды ине раське, тыненк весемесь топавтови!»

Мордовиянь Прявтось Артём Здунов республиканть презентациясо ёвтнесь седе, мейсэ ней эри регионось, сонзэ экономикадонть ды ине ломантнеде. Мордовиясь ней васенце таркасо ПФО-со инвестициятнень кастоманть коряс, келейгавтозельть «Рузаевка» ТОСЭР-нь границятне, панжови башка экономической зона республикань прявт ошсонть, минек «Биохимик» предприятиясь нолды 250 ламо лекарстват, тедеде тесэ панжозь фармацевтической субстанциятнень од производства, курок панжови Биотехнологиятнень федеральной центра, конань важодемась карми пек эрявикс Россиянь лекарствань безопасностень кирдеманть туртов. Мордовиясо эштё зярыя пек эрявикс предприятият, конатне нолдыть оптоволокна, светотехника, строить вагонт.

«Мордовиянть каштанчизэ – велень хозяйствась ды перерабатывающей промышленностесь. Тедеде пурназь сюронь рекордной норов – 2 миллиондо ламо тоннат. Республикась – органической земледелиянь лидер, масторсонть весемеде икеле цецянь кастомань коряс», – ёвтнесь Артём Здунов.

Минек каштанчинек истя жо модась, лейтне-лисьмапрятне, оймсема таркатне, панго ды ягода марто виртне-паксятне… Минек велетнесэ ванстовить койтне-кирдатне, кезэрень ярсамопельтне ды оршамопельтне. «Седеяк покш питнейчись – минек ломантне, важодицят ды икелев молицят, виевть ды ве таркасо а аштицят, сынь эрьвась а моли лия ёнов, ансяк эрьвась вечксы тиринь ёнксонзо ды Россиянть – аванть! – кортась Артём Здунов. – Мордовиянь моданть марто сюлмавозь ламо исторической ломантнень уцяскаст. Те а изнявикс адмиралось Фёдор Ушаков, Советской Союзонь Героесь лётчикесь Михаил Девятаев, скульпторось Степан Эрьзя, врачось-офтальмологось Владимир Филатов, историкесь Василий Ключевский, поэтэсь Александр Полежаев, содавикс морыцясь Лидия Русланова, философось Михаил Бахтин, татаронь поэтэсь Хади Такташ. Эрзянь-мокшонь ундоксонзо Никон Патриархонть, минек модатнень лангсо эрясь православиянь иневанькс Серафим Саровский.

Мон тердян весень минек мельстуиця республикав. Весть тей сазь, тынь карматадо бажамо велявтомс мекев. Весементь, мезенть минь теинек, топавтынек Пазонь лезксэнть вельде, минек Президентэнть  лездамонзо вельде. Пазось максозо, кадык Мордовиясь касы-виензы, кадык тей сакшныть инжетне ды кенярдыть!»

Торжественной панжомась поладозель «Келу» ды «Умарина» минек содавикс коллективтнень морамосо-киштемасо, «Варма» этно-арт-театранть раськень оршамопельтнень невтемасо. Седе тов весе инжетне тердезельть Мордовиянь выставканть ваномо, косо истя жо гайнесть морот, явшезельть казнеть, налксезельть минек ёнксов турпутёвкат. Мордовиянь Прявтось тесэ вастовкшнось Московсо эриця минек региононь студенттнэнь марто ды тердсь а кадномс тиринь ёнксонть ды мекев велявтомс важодеме кудов.

Региононь чись пек сюпаволь эрьва кодамо программасо: образовательной, культурной ды деловой. Артём Здунов якась экскурсияв СБЕР-нь павильонов, ульнесь «Здоровая Мордовия» конференциясо. А вана инжетненень те шкане ютавтозельть эрзянь-мокшонь ярсамопелень анокстамонть коряс  мастер-класст. Российской Кухнянь кудосо весе каванязельть сывелень прякинеде, пачалкседе, пача-бургердэ, сурань стерлядте ды овтонь лападо. Кинь ульнесь мелезэ саемс тантей каванямкат кудов, тердезельть фермерэнь ярмункав.

«Умарина» ансамблясь те шкане Россиянь Культурань министерствань стендэнть икеле невтизе «Мордовиянь колоритэнть» – тесэ ютась моронь, киштемань ды раськень оршамопелень фестивалесь. А Культурань кудосо теде мейле гайгезевсь «Шумбрат, Мордовия!» гала-концертэсь, конадонть мейле весе сыргасть эрзянь-мокшонь алкуксонь свадьбав. Те чистэнть мирдекс-никс кезэрень койтнень коряс теевсть Станислав Парчайкин ды Анна Платонова. Свадьбась ютась кода эряви: раськень оршамопельсэ, чиямо, рамамо марто. Ды, нама, кода Покш Кудавтомо! Мордовиянь Прявтось Артём Здунов казсь одтнэнень 300 тёжат целковойс сертификат, покш цецяпусмо ды серьгедсь: «Горько!».

Прядовсь региононь чись «Минь вейсэ!» концертсэ, конань невтизь Мордовиянь филармониянь артисттнэ ды «Разгуляй», «Росичи», «Мерема», «Торама», «Земляки» сехте содавикс ансамблятне.

Марина Девятова

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».