Пятница, апреля 19, 2024
Важное

Мезе сон алты ломантненень?



2024 иень азорось – Чилисема ёнксонь ковкерьксэнь виев ракшась – Чувтонь Пиже Драконось. Минек эйсэ учи лия ёнов а молиця, пек ламо покш тев марто мельстуиця ие. Пиже тюсось корты одксчиде, свалшкань эрямодо ды ёлганячиде... Мезе эштё эряви содамс те иень прявт тешкстэнть?
Тешксэнть обуцядонзо
Драконось – мелень вановтыця ракша, Китаень инязоронь властень тешкс. Сон вастневи Китаень ламо строявкстнэнь ды лия предметтнэнь лангсо.

Кезэрень шкатнестэ простой ломантненень токшемскак эзь мереве Дракононть, тень кисэ сынст пек кежейстэ чумондсть. Ансяк, кода иень тешкс, Драконось – допрок аволь истямо кежей. Ловови, те тешксэнть ало иесь эрси уцяскавокс. Вана сыця Дракононь иенть эйстэяк эряви учомс ансяк паро: вадря полавтомат, вастовомат, мелявксонь-стакачинь изнямот. 2024 иесь истямокс кармияк! Эдь тесэ покш тарка саи пиже тюсось. Чилисема ёнксонь культурасо сон тешксты сэтьмечи, машты лисеме куш кодамо стака тевстэ эстензэ берянень апак кандо. Теде башка, пиже тюсось символизирови весе народонть. Те жо корты седе, Драконось масторлангонь аволь сюпав ломантненень пек лезды.

Кода тердемс уцясканть кудозот

Эрьва иенть эряви вастомс парсте. Мезесь жо кецявтсы Чувтонь Пиже Дракононть? 2024 иесь сюлмави чувтонть марто. Ды тень экшсэ ламо смусть. Кода чувтось касы верев, истя жо минекак, ломантнень, кармить улеме виенек кастомс эсенек ёрокчинек, содамочинек, ансяк эряви тейнемс виде эскелькст. Истя жо а эряви стувтнемс, бути а мелявтомс чувтодонть, сон коськи.

Сыця иесь сюпав эрьва кодамо «уцяскав» ули-паронь кочкамосо, конатне кандыть парочи. Васняяк эряви мезеяк рамамс чувтыне ёнов молиця. Тесэ ёнкстнэде пек ламо: эрямо тарканть мереви мазылгавтомс бонсай вишка чувтынесэ эли жо путомс вишкине «лопине-фоторамкине» марто декоративной чувтыне, конатнес аравтовить малавиксэнк фотографияст. Кода аватненень, истя цёратнененьгак мереви рамамс, невтемакс, кулон, конась моли ламо тарад марто чувтыне ёнов. Эдь самай ламо тарадтнэ ды лопатне кортыть шумбра ды парсте касыця чувтодонть. Истя жо нупальтнес мереви понгавтнемс Дракононь чачо марто ковкерькст, вачкамс тодовт, ацамс пледт. Столенть лангс истя жо мереви путомс сонзэ артовкс марто бокалт, салфеткат, тарелкат ды истя седе тов.

Косо ды кода седе вадря вастомс Од иенть

А стяко кортыть, кода иенть вастсак, истя ютавтсакак. Дракононть, кода Китайской лия тешкстнэньгак, улить эсензэ вешеманзо. Бути иень азоронть вансак мелензэ, сон кадови мельспаросо.
Драконось пек вечки, штобу вановольть мелензэ. Секс сонзэ тешкс марто Од иенть вастомаськак улезэ лия ёнов а молицякс. Сыця Од иенть, мезе эрси чуросто, мереви вастомс аволь кудосо: кафесэ, ресторансо эли молема инжекс. Кинь арась мелезэ ковгак молемс, вастынк кудосо. Прявтось – видестэ анокстамс.

Мезе оршама
Драконось вечки якстере ды сырнень тюст. Кочкама питней коцт: атлас, бархат, парсей, шифон. Вадря карми оршамс кода платия, истя жо брюка марто костюм. Цёратне, паряк, якстере пиджакт ды брюкат а оршить, ансяк лангсост якстере эли сырнень тюс ёнов молиця мезеяк улезэ. Невтемакс, якстере панар, сырнень галстук, якстере носкат. Бути жо якстере эли сырнень тюсонть тынь а вечксынк, оршадо мезеяк пиже. Кенярксонтень, пиже тюсонть пек ламо оттенканзо: малахитэнь, мятань, лаймань, нефритэнь ёнов молицят… А стувтомат аксессуартнэньгак: запонкат, пилекст, заколкат – весе сынь улест сырнень тюсонь!

Мезе путома столенть лангс

Столесь – кенярксчинь прявт тарка. Столешникенть кочкатано ашо эли якстере тюсонь. Столесь улезэ мазыйстэ пурназь. Лангсонзо улест мазый штатолт, лентат, салфеткат.
Каванямопельтнеде улест ламо ды тантейть, 12 блюдадо а седе аламо. Ярсамонть ушодынк ямсто. Менюсонть седе тов улест рис марто каванявкст. Прядомс ярсамонть эряви пиже чайсэ. Илинк стувто путомс сырнень тюсонь фруктатнень: апельсинт, мандаринт, хурмат.

Мезе казнема Дракононь иестэнть

Лезэв казнетнень кадынк мейленень – ней жо шка дивавтницятненень. Кармавтынк пряудеменк арсеме. Паро карми, бути казтядо кудонь кодаткак мазылгавтомапельнеть, оршамопель... Кода цёратненень, истя аватнененьгак мереви каземс билетт спа-салонов эли массажс. Творческой ломантнень кецявтсызь артовксонь, мозаикань, флористикань коряс мастер-класстнэ. Эйкакштне кецить лазертагонтень, тирэнтень эли пейнтболонь сеанстнэнень.

Мезе учома сыця иестэнть

Мезе анокстась тенек сыця иесь? Дракононть пек паро обуцязо, секс сыця иесь канды уцяска, сюпавчи, эсь вийтнес кемема. Ломантненень, конатне кеместэ ютыть эсест бажамотнес, тень удалы топавтомс. Кавтолдоматнень, кумажатнень сорноманть ды пелеманть эрявить изнямс. Ансяк тень весе теема апак капша, аравтлувонь арсезь.
Масторлангонь весе культуратнесэ пиже тюсось невти сэтьмечи, одкстомтома, касома. Од иестэ минек учить ламо мельстуиця тевть: эйкакшонь чачома, кувать сёвномадо мейле мирямо, сюпалгадома.
Ялатеке илядо стувтне, Драконось машты кежиявтнемеяк. А эряви лангсонзо нарьгамс, манчемс ды манчезь налксемс. Тень сон пек а вечки.
Чувтонь Драконось – эсензэ лелятнень-ялакстнэнь ютксо ояксчинь сехте пек вечкиця. Сон миненек лезды лисемс стакачитнестэ.

«Дракононть лексемазо» салатось

Саевить: 300 г саразонь ашо сывель, 150 г корейской морков, 150 г корейской модамарь, 150 г аволь салтозь куярт, 80 г майонез, 1 ламбамо якстере перець, 1 сурпря сахар, салось танстень коряс.
Модамаренть таркас мереви каямс маринованной сельдерей.
Кастрюлясо лавровой лопа марто лакиця ведентень путынк саразонь сывеленть, пидинк 20–25 минутань перть ды мейле кельмевтинк. Куяртнэнь керсинк човине палнэсэ. Лангозост почодынк сахаронть ды салонть, човоринк ды кадынк 10 минутас, мейле эйстэст лепштяма соконть.

Кельмевтезь сывеленть сезнинк панксонь-панкс ды ацынк тарелка лангс. Ланганзо каинк майонезэнть. Мейле путынк куяронть, таго ваднинк майонезсэ. Путынк модамаренть эйстэ седе покш пельксэнть, ды тееде толгелень форма. Лангозонзо путынк морковонть, истя жо толгель ладсо, ды путынк кадовозь модамаренть. Якстере переценть эйстэ керядо зярыя палнэть ды путынк салатонть алов «толонть виевгавтомга». Салатось анок.

Анокстызе Мария Яксяргина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».