Вторник, марта 19, 2024
Важное

«Республика Мордовия» ВКонтакте пабликенть вельде виде эфирсэ МР-нь Прявтось Артём Алексеевич Здунов макссь каршо валт республикань эрицятнень кевкстемаст лангс.


ЦУР-нь студиясонть кортамось ушодовсь Мордовиянь экономиканть виевгавтомадо толковамосто. МР-нь Прявтонть валонзо коряс, Мордовиянь весе отраслятнесэ редяви тевтнень паролгавтомась, невтевкстнэнь касомась. Ледстязель эрямо таркань теемань рынкантень лезксэнь максомась, икелепелев те кевкстемантень седе покш мелень явомась.

Неень шкане малав весе эрицятнень талновтыть эйгажа китне, ламот пеняцить аволь весе таркатнесэ сынст ванськавтоманть лангс. МР-нь Прявтонть валонзо коряс, те стакачинть витемс эряви сатышка техника. Невтемакс, неень шкане Саранск ошсо эйстэдензэ 112 единицат, эряви жо кавтосядто а седе аламо. Кода мерсь Артём Здунов, тень коряс важодемась ветяви, техникась рамави. Теке шкасто пштистэ ашти кадрань коряс кевкстемась.

Артём Алексеевич кармавтсь покш мель явомс аволь ансяк Саранскоень куншкакуронтень, эрямонь лия районтнэсэяк витемс те тевенть. Истя жо пшти вановт алов саемс эрямо кудотнень, школатнень, спортонь объекттнэнь ды лия учреждениятнень перька таркатнень.

Виде эфирсэнть ульнесь кевкстема бюджетэнь сферасо важодицятненень зарплатань кепедемадо. МР-нь Прявтось ледстизе те кевкстеманть коряс РФ-нь Президентэнть Владимир Путинэнь аволь умонь кармавтоманзо. Теке шкасто толковизе, кода аштить тевтне минек республикасо. Васняяк тешкстызе велень хозяйствань предприятиятнесэ 15-30 процентс зарплататнень кепедемаст. Лиякс аштить тевтне промышленной предприятиятнесэ, косо а сатныть важодицятне. Ледстязель «Рузхиммаш» покш предприятиясь, косо неень шкасто 800-900 вакансият. Содазь, бюджетниктнень зарплатаст ламодо ашти экономиканть виевгадомадонть, налогтнень пурнамодонть. Кода мерсь МР-нь Прявтось, неень шкане покш мель явома СПО-тненень, од ломантнень важодемань профессиятнес тонавтомантень, тень туртов эрявикс оборудованиянть рамамонтень.
Нама, эзь кадово ве ёнов спецоперациясо минек ёнксонь цёратнень улемась, сынст малавикс ломандест Мордовиясо мелявтомась.

Мобилизациянь программадонть кортамсто Артём Алексеевич тешкстась, васень читнестэ, зярдо те тевесь ансяк яволявтозель ды алтазель максомс лезкс мобилизованнойтнень семиятненень, кевкстематнеде ды энялдоматнеде тензэ ульнесть ков седе ламо. Мейле жо, кода панжозельть лезксэнь максомань гуманитарной пункттнэ ды тевенть эсест вановт алов саизь райононь администрациянь прявттнэ, пшкадематне киртявсть. Тень лангс апак вано, кодамо районов бу аволь сырга МР-нь Прявтось, сон свал содавтни истят семиятнень, кевкстни, кодамо лезкс тенст максомс.

Истя жо сон пачтясь, кодамо мель явови Ульяновск ошсо боецтнэнь анокстамонь таркасонть, ков сон пачколесь аволь умок.
Тешкстасынек, Мордовиянь эрицятнень талновтсть эрямонь эрьва кодат ёнкстнэ, конатнень ютксо республикасонок спортонть, туризманть виевгавтомась, общественной транспортонть асатомась, уроз эйкакштненень эрямо таркань максомась, од школатнень стявтомась, Светотехстрой эрямонь райононть паролгавтомась, Од иентень анокстамось ды ламо лият.

Нурька шкас весемезэ максозельть 360 кевкстемат, эрьванть коряс, конань эзть кенере ванкшномс виде эфирсэнть, карми улеме анокстазь каршо вал. Ули кемема, ламотнень юткстост эсест вановт алов сайсызь республикань райононь администрациянь прявттнэ ды сеть министерствань ды ведомствань руководительтне, кинь эйстэ ашти те эли тона стакачинть витемась.

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».