Вторник, ноября 30, 2021
Важное

Таштамковонь 23-це чистэ региононь руководителесь Артём Здунов ульнесь кенярксчинь промкссонть, конась алтазель «Эрзянь правда» ды «Мокшень правда» кулялопатнень юбилеентень. 2021 иестэ республикань газетатне тешкстыть 100 иетнень. Вастовомась ютавтовсь Республикань Кудонь Покш залсонть санитарно-эпидемиологиянь весе вешематнень топавтозь.

 

Артём Алексеевич ледстизе, 100 иеде икеле таштамковонь 24-це чистэ Московсо эрзянь ды мокшонь кельсэ лиссь «Якстере теште» кулялопань васенце номерэсь.

«Сядо иетне ливтязь ливтясть. Ды течи мереви ёвтамс, весе те шканть перть кулялопатне сюлмазельть Мордовиянь историянть марто. Пингень перть тынь ультядо тиринь ёнксонь социально-экономической, политической, культурной эрямосонть. Тынк кулялопатне тейсть покш путовкс раськень литературанть ды искусстванть кастомантень-кепетемантень. Эрзянь-мокшонь ламот сёрмадейтне шкинемань кист ушодызь тынк газетатнесэ», – мерсь сон. Республикань руководителесь тешкстызе просветителенть, общественной деятеленть Захар Фёдорович Дорофеевень важодевксэнзэ, истя жо Леонтий Петрович Кирюков композиторонть васенце моронзо васняяк лиссть газетасонть. Артём Здунов мерсь, пек вадря, кулялопатне улить Интернетсэяк. «Тов туи ловныцясь. Тосо сы шкась, – тешкстызе сон. – Теке марто печатазь кулялопатне, конатнень минь сайтяно кедьс, свал седе малавикст седеентень. Ды ламот эштё куватьс а туить тень эйстэ. Тенень минь карматано явомо башка мель».

Теде башка, республикань руководителесь тешкстызе регионтнэнь ютксо ялгаксчинь сюлмотнень кемекстамонь эрявиксчинть. «Кортамось а лиси, бути а ули печатной издания. Диаспоратнень марто вастовоматнесэ ламо кортави вейсэнь тевтеемадонть, минек сюлми печатазь валось, – тешкстызе республикань руководителесь. – Тынь свал вейсэндятадо перьканк ёроков од ломантнень, важодицятнень ды велень корреспонденттнэнь. Раськень кадратне анокставить тынк лезксэнк вельде!»

Артём Здунов тешкстызе, Мордовиява важодемань коряс ардтнемстэ мельс кадовить газетань корреспонденттнэнь марто вастовоматне, сетнень, кить сеедьстэ кортыть республикань районтнэсэ эриця ломантнень марто. «Те сехте мельстуиця вастовомат, редявить весе тевтне, конат молить муниципальной образованиясонть, башка велесэнть, – тешкстызе сон. – Видьстэ меремс, минденек мейле ютыть эштё сядо иеть. Весемесь, мезе минь теинек, кадови сёрмадовкстнэсэ. Ды минденек кармить кортамо сень лангс ванозь, мезе эйстэденек сёрмадсть, кодамо питне тенек макссть. Истямо ответственностень саеманть туртов эряви вадря образования, перьканок молиця тевтнень лангс вановт ды ломантнень икеле башка ответственность».

Мордовиянь руководителесь ёвтась сюкпря кулялопатнень теицятненень кочкамонь кампаниясонть лездамонь кисэ: «Арсян тенк кеме шумбрачи, шкинемасо изнявкст, од мельстуиця мельть-арсемат ды тевть, истя жо Интернетсэ. Свал кемеде государстванть пельде лезксэнть лангс».

Тиринь кельсэ лисиця кулялопатненень 100 иетнень топодеманть кувалма Артём Здунов явшесь газетань теицятненень наградат ды ледстнемань казнеть. Истя, «Эрзянь правда» газетань прявт редакторось Марина Девятова тешкставсь Мордовия Республикань Прявтонь Благодарностьсэ, фотокорреспондентэнтень Эдуард Ретунскийнень максовсь «СМИ-нь заслуженной важодиця» лемесь, художественной редакторось Галина Табаева, культурань, образованиянь ды социальной тевтнень отделэнь прявтось Юлия Еремина, специальной корреспондентэсь Татьяна Маторкина ды корреспондентэсь Раиса Щанкина тешкставсть Мордовия Республикань Правительствань Благодарностьсэ.

Газетатнень теицятненень ды ветерантнэнень ёвтась поздоровт ды явшесь казнеть МР-нь Госсобраниянь Председателесь Владимир Чибиркин. Сон тешкстызе, тешкставиця юбилеесь ашти покш тевекс аволь ансяк редакциятнень важодицятнень туртов, весе национальной журналистиканть туртов.

«Газетатнень васенце номерэнть лисема шкасто саезь тынь кадовтадо келей аудиториянтень виде информациянь максомань кеме юрокс. Течи «Эрзянь правданть» ды «Мокшень правданть» тёжат ловныцяст. Сынст вечксызь ды учить аволь ансяк Мордовиянь оштнесэ ды велетнесэ, истя жо Россиянь лия регионтнэсэ. Автортнэнь эрьва материалось ашти минек республиканть эрямонзо невтемакс», – мерсь Владимир Чибиркин. МР-нь Государственной Собраниянь Почётной грамотат максовсть корректоронтень Нина Сапунованень ды бухгалтерэнтень Елена Антонованень.

Истя жо «Эрзянь правдань» ды «Мокшень правдань» теицятненень поздоровт ёвтась Мордовиянь Прявтонь ды Правительствань Администрациянь Руководителень полавтыцясь – Пресс-службань руководителесь Елена Башкирцева. Сон казсь газетань теицятненень кулялопатнень васенце номертнэстэ вейкенть архивень копиянзо.

 

Юлия Еремина.

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».