Вторник, марта 19, 2024
Важное

 

Ёвтамось: «Од ломантне – минек вандынь шканок» – кармась сёлмов валмеревксэкс. Ды тень каршо а молят. Ансяк а эряви стувтнемс, од ломантне – те минек неень шканокак, эдь самай сынь обществань сехте ёроков ды эряза пелькс. Сынь свал арсить мезе-бути од, вешнить куш кодамо мелявксонь изнямонь седе вадря кить-янт. Ды государстванть касомазо-виевгавтомазояк ламосо ашти сень эйстэ, кода сонзэ стратегиянь, экономикань ды политикань ёнксось кирдеви од ломантнень ёндо.


Минек республикасо ламо эряза, превей ды ёроков цёрат ды тейтерть, конатнень пек вадрят невтевксэст эрямонь весе ёнкстнэсэ. Меельце шкастонть а беряньстэ виевгады од ломанень предпринимательствань ёнксось. Панжовить од производстват ды лия ёнов а молиця предприятият.
Течи минек ули меленек ёвтнемс тыненк истят талантливой од ломантнеде, конатне кемекстызь эсест туртов: сынст тиринь ошост а явови лиятнень эйстэ ды тесэяк мереви панжомс тев эсь мелень коряс.
Уледе содавиксэкс: Иван Кунаев ды Михаил Морозов – «YouMoto» Саранск ошсо васенце мотопрокатонь панжицят. Весемеде ёвтнетяно мельга-мельцек.

Велоспортось – тев седеень коряс

Эрзянь цёрась Иван Кунаев чачсь-кассь Саранскойсэ. Кеветее иесэ тусь Московов ды кармась тонавтнеме РУДН-сэ, кочкизе инженерной ёнксонть, конась сюлмавозь пертьпельксэнь тевтнень марто. Прядсь бакалавриат, магистратура, аспирантура. Ламоксть тензэ максовкшнось Президентской стипендия, Потанинской стипендия ды лият. Истя жо прядызе Н. П. Огарёв лемсэ МГУ-нь юридической факультетэнть.
– Весементь лангс ванозь, монень, паряк, улемаль научной важодицякс. Ансяк кеме сюлмот теинь спортонть марто, – корты Иван. – Вишка шкасто саезь пек вечкилия спортонть. Свал ардтнинь велосипедсэ. Кеветее иестэ саезь эстень кочкия велоспортонть, конась 2012 иестэ монь туртов теевсь важодемань персональной ёнксокс – монь спонсорокс кармасть Россиянь ды раськеютконь содавикс брендтнэ. Ды те шкас мон – Велоспортонь коряс Россиянь Сборноень действующей спортсмен.

Велоспортонь вейке ёнксось – те маунтинбайк. Лиякс меремс, те пандопрява ардтнемань туртов велосипед. Прявт тевесь – седе эрязасто ардомс пандопрясто ды ютавтомс тень лангс сехте аламо шка. Россиясо спортонь те ёнксось аволь истя содавикс, кода футболось, эли лия видтнэ. Масторлангсо жо сонензэ явови покш мель. Сонзэ коряс ютавтневить мирэнь Кубкат, Чемпионатт. Спортось вадря, мельстуиця, лезды ламо ардтнемс эрьва кува. Ды седе сеедьстэ пандопрява.

– Васенце велосипедэнть лангс таштынь ярмакт ие ды кото ковт – патянь мирдензэ марто валскень ниле чассто саезь чинь колмо часос важодинь рынкасо ды тень кисэ эрьва чистэ максыльть тень 200 целковойть. Велосипедэнть, конась монень эрявсь, питнезэ ульнесь 12 тёжат целковойть ды миильть сонзэ ансяк Московсо. Нейгак ледстнян, сонзэ рамамо ардтнинь авань марто. Ванкшнынек эрьва кува, кургонок автнинек, аламодо эзимизь маня. Мон арсезевинь сестэ, кодамо мельстуиця ошось. Ды пельиень ютазь туинь эрямо тов, – корты Иван Кунаев.

Велоспортонь коряс васенце пелькстамотне, конатне кадовсть превс, ульнесть теске, Саранскойсэ. Те ульнесь 2008 иесь.
– Сестэ спортонь экстремальной ёнкстнэ ульнесть содавикст. Ламотне явсть мель велосипедэнтень, мотоциклантень. Ледстнян, минь минсь сестэ пелькстамотнень анокстынекак, ютавтынекак. Сакшность малав 80 спортсмент Россиянь эрьва ёндо. Неть пелькстамотнесэ сестэ лисинь изницякс. Ды те чарькодевияк, трассанть содылия пек парсте. Эряви меремс, кода те спортонть кочкия, васенце колмо иетнень перть ардтнинь мельде-валдо. Мейле совинь национальной сборноень лидертнэнь юткс. Ней кавксо иеть Велоспортонь коряс Россиянь сборнойсэ. Мон – спортонь мастер ды Россиянь чемпион, – тешксты Иван.

ВУЗ-нть прядомадо мейле Иван Кунаев важодсь инженерэкс содавикс международной компаниясо, Географической институтсо, роботась юристэкс. Меельце колмо иетнень перть сонзэ компаниязо тонавты ломанть пандопрясо велоспортонтень. Тонавтоманть ветясть Крымсэ, Сочисэ, Португалиясо, Испаниясо, Италиясо, Австриясо. Ней кадовсь ансяк Россиясь – те Крым ды Сочи.

– Те иестэ анокстынек мотопрокатонь коряс проект, конась тевс нолдави Саранскойсэ, – ёвтни Иван. – Васняяк арсинь сонзэ панжомс косояк Сочисэ, косо улить пандот. Ды тосо те спортось седе вешевикс. Ансяк монь пек покш мелем, штобу тосо, косо чачинь, улевель мезе-бути дивавтыця, вадря сервис марто.

Мотопрокатонь панжомадо мелесь сась апак учо. Ютазь иестэ, зярдо Иван Кунаев сась инжекс Саранскоев, вастовсь ялганзо Михаил Морозов марто. Кавонест вечксызь мотоцикласо ардтнеманть ды кортазевсть спортонь те ёнкстонть. Арсезевсть, кода бу вадря улевель панжомс прокат.
– Минек ошсо можна пек ламо мезе мельстуиця теемс, – тешксты Иван. – Ансяк весе мекс-бути васень таркас путыть экономиканть ды ловить цифрат. А эдь паро теемс мезеяк вадрясто, эсь ойменть туртов. Ды минек икеле те ульнесь прявт путовкс. Те проектэсь васень шкасто саезь аволь ярмаконь кисэ. А штобу улевель сервис, улевель вадря тарка. Кода кудов эстеть соват – седееть кеци. Тесэяк истя – пертьпельга ваньксчи, весемесь таркасонзо, эрьва сыцянть туртов чай эли кофе, ламбамопельть. Туемс мель арась. Течинь чине минек ули вадря помещениянок, косо ули весе эрявиксэсь. Сыцятнень туртов улить кемень мотоциклат. Эряви меремс, мотопаркось од. Ули неень шкань вадря защита (томбавомадо ванстыця оршамот). Тесэнь важодицятне эрьва чистэ ванкшныть эрьва мотоцикланть, штобу технически сон улевель анок. Улить вадря инструкторонок, конатне содыть, кува ардомс, кода ардомс. Содыть, кода максомс васенце лезкс ды конанть ули весе эрявикс оборудованиязо зыянов тевень лисемадо. Трассась, кува ардтнетяно, весемезэ 50 вайгельбеть. Тесэ улить таркат кода ансяк ушодыцятненень, истя ёроков мотоциклисттнэнь туртовгак. Сонзэ целанек анокстынек минсь, секс сон тамашавтомо (безопасной).

Мотоциклатнень вечкемась полавтызе эрямонть

Михаил Морозов – ведьалксонь (подводный) спортонь коряс Европань чемпион. Те спортсонть цёрась ульнесь зярыя иень перть. Вете иеде икеле жо кадызе те ёнксонть ды весе мелензэ ды виензэ кармась максомо мотоциклатненень.
– Мотоцикла лангс васенцеде озынь сисем иеде икеле, – корты Михаил. – Молинь Максим Захаровонь мотоклубов. Тосо колмошка иеть ардтнинь, тонавтнинь. Мейле раминь эстень мотоцикла, кавтошка иеть ардтнинь ды ней раминь лия, седе вадря. Бути жо кортамс спортто, мон тензэ яван мель 6 иестэ саезь. Васенцекс ульнесть пандопрява кирякстнема сокст, конатнень лангс стявтымим тетям. Сокссо кирякстнинь, мейле укшномантень ютынь. Спортонь экстремальной ёнкстнэнень вечкемась ульнесь свал. Эрямосон вастовить од ломанть, Ваня вана лиссь – велосипедтнэнень вечкеманть кемекстызе. Вечкевсть мотоциклатне – Максим Захаров вастовсь. Эрямось лангс ливтсь сеть ломантнень, конатне ёвтыльть, мезе од варчамс те эрямосонть.

Михаил тескень, Саранск ошонь. Прядызе Н. П. Огарёв лемсэ МГУ-нь строительной факультетэнть, тонавтнесь аспирантурасо. 2013 иестэ саезь важодсь университетэнь спортивной клубонь прявтокс. Ковдо теде икеле кадызе те роботанть. Кода корты, сась мель мезеяк полавтомс эрямосонть.
– Мон туинь университетстэ ды вейсэ Иван марто тедедень майстэ панжинек мотопрокат, – тешксты Михаил. – Те проектэнть анокстамсто кодамояк субсидия ды лезкс мельга ковгак эзинек пшкадекшне. Карматано снартнеме весементь теемс минсь. Варчасынек каямс яволявтома грантонь коряс. Эдь минек проектэнь ёнксось пек мельстуиця, сон од ломантнень туртов ды лия ёнов а молиця. Ней минь уш весементь нолдынек, улить васенце содамочинек. Нама, карматано ваномо, ков ютама седе тов. Эдь пек а шожда ушодомс мезе-бути од, зярдо тонь арась кодамояк опытэть истямо тевень ветямосо ды варштамс а кинь лангсто. Арсетяно, минек весемесь лиси!

Юлия Еремина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».