Вторник, марта 19, 2024
Важное

Морось, теке оляс менезь нармунь, келемтинзе сёлмонзо ды кепететсь верев. Ков седе верьга гайгсь сон, тов седе валдомгадсть ломантнень чамаст ды лембелгадсть вановтост.



«Браво, «Келу»!» – пурьгине ладсо зэрькстась залось.
Ниленьгеменде ламо иеть те фольклорной ансамблясь эсензэ моротнесэ кенярдовты, невти эрзянь, мокшонь моротнень мазычист ды сюпавчист. Республикасонок, маряви, арась истямо
тарка, ков аволь пачколе «Келусь». Ды аволь ансяк Мордовиясо.
Те ансамблянть кинзэ-янонзо а онкставить. Сынь таргавсть аволь ансяк Россиянть келес, седеяк васолга. Ансамблясонть кемнилее тейтерь-ават. Кить састь икеле, кить седе мейле. Ламот теевсть содавиксэкс, кандтнить покш лемть. Валентина Антошкинань (тейтерькс Дедяевань) истямо лемезэ зярс арась. Те а корты седе, буто сонзэ путовксозо ансамблянтень аволь истямо покш. Те аволь истя. «Келу» ансамблясо Валентина Антошкинань тарказо лиятнень коряс аволь седе вишкине, косто-косто, паряк, лиятнедеяк покш. Ансяк казнень ды лемень максыцятне аволь свал редить эйсэнзэ. Те, паряк, лисни секс: обуцянь коряс Валя виздиця, а вечки эцеме ломанень сельме икелев, а машты невтеме эсь прянть. Морамстояк сон свал косояк анеявома таркасо. Теке марто Валентина Антошкина истят морыцятнень ютксто, кить эсест гайтев вайгельсэст мазылгавтыть моронть.

Содазь, эрзянь моротне сеньсэ питнейтькак: сынь моравить ламо вайгельсэ. Веенст морыцятне таргить алга, омбонстнэ – верьга. Верьга морыцятнестэ вейкесь – Валентина Антошкина.
Эрьванть эйстэ пек ламо вешеви. Тесэ аламо тонадомс верьга вайгеленть таргамо, эряви маштомс сонзэ путомо истя, ладязо лия вайгельтнень юткс. А стяко «Келу» ансамблянть моронзо явовить лиятнень эйстэ: сынь гайгить велувсо, лисьмапрянь шольниця чудикерьксэкс, конат прыть вейке покш ды келей лейс.

Морось сынст кудосо ульнесь чипаень таркас

Кода Валентина Антошкина (Дедяева) понгсь «Келу» ансамбляв? Тень чарькодьсак сестэ, зярдо кармат содамо, кодамо те ломанесь ды кодамо таркасо сонзэ туртов ашти морось. Зярдо марят истят валт: «Морось – вечкемазо, эрямонь смустезэ», – сынь ёвтазь сондензэ. Авась, маряви, чачськак моразь. Кортамояк парсте эзь тонадо, а уш моронь морамосо виензэ варчнизе. Кудосост секе-тев кайсететсь човине вайгелезэ.

Мейлеяк морось сонзэ туртов кармась улеме сехте малавикс ды вечкевикс оякс, кона, косо илязо уле, свал седейсэнзэль. Школасо тонавтнемстэ вейкеяк вастовома, вейкеяк чокшне эзь ютне сонтемензэ. Косо мезе илязо юта – фестивальть, олимпиадат, смотрат, викторинат, – школасто кучилизь Валянь. Кода лисиль сцена лангс – сэрьс аволь покшке, сэнь сельме, товзюро тюсонь черензэ карксамо видьс новолильть – кунсолыцятнень вановтсост кирвазильть валдо кенярксов толнэть. А уш зярдо серьгедиль моро – залось зэрькстыль цяпамотнеде.

Аванзо вете эйкакштнень ютксто сон сехте вишкинель, кода мерить, очко нардавксоль. Вишка эйкакштнень свал седе вечкить. Зярдо цёратнень ютксто тейтернесь ськамот, седеяк кармат сельме икеле. Валяненьгак мель явсть весе. Тонавтсть, превс путсть, налксесть мартонзо, кандтнесть кедь лангсо. Валя кассь, кода цецясь, лембе, маней таркасо, косо арасельть а покш мелявкст, а стакачить, а ризкст. Сонензэ весемесь марявсь валдокс ды кенярксовокс.

Ризксэв ёжомарямотнень васенцеде маринзе, зярдо кулось тетязо – Фёдор Харитонович. Тейтерентень сестэ ульнесть ансяк 12 иеть. Валя чачсь Отяжбуень Киржеманы велесэ, эрзятне те веленть лемдить Трокскужокс.

Велесэ тевть муевить весенень. Валяненьгак сынь сатотсть. Тетянзо куломадо мейле сынь седеяк ламолгадсть: сонзэ таркас кармась якамо фермань ванстомо ды ревень ваномо. Кеменьшка-кевейкеешка иесэ яксесь якстерькаень мотыжамо.

Кудоютксояк тевтнеде пря велькскальть. Сынст топавтомсто авазо пильге лангсто пракшнось. Валя лездась тензэ, ков сатотсть виензэ: муськиль, киякс шлиль, скалт-тувот андыль.

Тевтнень топавтсь кода покш ломань, превтне ялатеке эйкакшонь ульнесть. Ютко шкасто таргилинзе коцт панкскестэ стакшнозь няканзо, ушодыль котьмамо-озямо мартост. Някатнень стакшнось сонсь. Икеле, аволь кода ней, налкшкеть чуросто кинень рамсесть лавкасто. Ярмактне, конатнень пандсть тетянстэнь ревень фермань ванстоманть ды аванстэнь колхозов якамонть кис, эзть сатно эйкакштнень оршамскак. Кодат тосо налкшкеть?

Весть Валянь превс сась стамс паро, мазый няка. Муинзе куломанень анокстазь Таша бабанзо коцттнэнь-оршамотнень, таргась тосто зярыя пацят ды каштом лангсо салавинька кундась тевс. Керсинзе пацинетнень панксонь панкс. Курок бабазо рединзе ёмазь пацинетнень, ёвтась аванстэнь. Тень кисэ Валянень понгонесь парынестэ! Нейгак сон ледстни сеть сельведтнень. Авадонзо башка кияк сурсо эзь токше эйсэнзэ. Тетязо чевте седеель. Аволь тосо кедьсэ вачкодемс – чирь вал зярдояк а мериль.

Кода Валянень эзь сатно сон, кода сельмензэ сявадсть ялганзо лангс, кинь ульнесть тетяст! «Тетинем, корьмайнем, мекс туить, мекс кадымизь?» – авардсь сон салава.

Иень ютазь кулось бабазо. Сырель сон, 96 иеть тензэ ульнесть. Валя пек авардсь. Ветенест Таша бабаст ванынзе. Чинь-чоп эйкакштнень мельга яказь, виде-паро начко нулакс велявтыль. Озыль оймамо, ушодыль ёвтнеме од порадонзо. Лиясто морыне серьгедиль. Валя кургонь автезь кунсолыль эйсэнзэ. Моротне кувакальть, лужаняльть.
Бабазо морыль, эсензэ сельведтне кеверезь кеверильть. Валя сестэ эзь чарькоде, мекс сырькаезэ аварди. Те мейле, зярдо сон сы «Келу» ансамбляв ды карми тонавтнеме эрзянь кезэрень морот, чарькодьсы, кодамо вий кекшезь эрьва моросонть. Сынст эйсэ невтезь минек раськенть эрямозо, се, кодамо стака уцяска печтясть эрзятне, зяро майсемат пракшность сынст лангс седикеле. Ды, меремс, неень шкастояк эрьва мезть эрсить эрьва ломаненть эрямосо. Ламо мезе савсь печтямс Валянь аванстэнь Зоя Спиридоновнанень. Вийть тензэ макссть эйкакштне, нуцькатне. Ды морось, кона сынст кудосо свал ульнесь чипаень таркас. Дедяевтнень кудораськесэ весе, ловт, моронь вечкицяльть. Тетязо маштсь седямо гитарасо. Мельганзо тонадсь Слава лелязояк, кона мейле тусь тонавтнеме хоровой дирижёрокс культпросветучилищав. Лангозост ванозь, Валяяк кармась варчнеме ёрокчинзэ. Ды курок аволь ансяк тонадсь, сонсь кармась моронь ладсеме-сёрмадомо.

Авазо парсте седиль балалайкасо. Ялга ютксо-косо моронь сыргавтыцясь ульнесь сон. А уш кодак серьгедиль нурька морот, Нуя лейсэнть, кона чуди велест вакска, калтнэяк сыргозильть удомсто ды ушодыльть киштеме. Пелькстамо мартонзо илязо терявтне кияк – а изнявиль.

Улезэ вечкема тев

Аванзо пельде Валя тонадсь улемс кемекс ды нардевекс. Обуцянь коряс сон чевте ды лавшо седей. Пек кеми ломаннень. Текень кувалма сеедьстэ савкшны тензэ янксемс ды майсемс. Сехте пек сестэ, зярдо ломанесь, конанень кемсь, карми манчеме ды кенгелеме. Сон виздиця, овсе а моли сетнень ёнов, кить а кенерить, кода мерить, лисеме ал потсто, сынсь уш анокт сеске куземс менель тёкшс. Зярдояк а сявады сельмезэ лиянь сюпавчи лангс. Мезе ули, сенень кенярды. Покш лем мельгаяк а панси, куш сонзэ вайгеленть марто умок уш улемаль покш солисткакс. Келя, а маштан эцеме сельмс, секс истямокс эзинь касо. Эрямосонть ней алкукс истя: а маштат пулосот юводомо, прявттнэнь мелест ваномо ды корост кирдеме – тантей сюкоро а варчат. Авась эно менельстэ тештеть кундсеме а бажи. Сонзэ туртов улезэ вечкема тевезэ. Морось Валянь туртов – ойме кошт, ванькс ведь ды шумбра кши. Весе се, мезевтеме арась эрямо.


Мелесь молемс тонавтнеме, косо тонавтыть парсте морамо, умок чарась пряудемсэнзэ. Седеяк виензась, зярдо прядызе школанзо. Те ульнесь 1983 иестэ. Вейке ава, конань марто весть аштесть больницясо, мерсь молемс Казанень культурань институтов. Валя истя тейськак.
Казанев сась, ансяк эзь сода, кодамо экзаменс анокстама. Секс экзаментнэ эзть идеве. Мерсть самс сы иестэ. Велявтсь Саранскоев. Превезэнзэ сась «Келу» ансамблясь. Талнозь ды пелезь совась кудонтень, косо, мерсть тензэ, пурнавкшны те ансамблясь. Вастызе сонзэ а сыре, а од цёра, аламос кортнесь-тейсь мартонзо, кевкстизе, костонь, кить тетянзо-аванзо, ды мерсь «невтемс вайгелензэ». Валя кувать апак арсе серьгедизе «Умаринанть».
Чувтонь паро умаринась,
Чувтонь мазый умарь
чувтось…

Цёрась кунсолызе апак лоткавтне ды мерсь нурькинестэ: «Паро. Саты. Кадовт. Сайтядызь».

Те ульнесь Г.И. Сураев-Королев, кона васенце чистэнть саезь кармась тонавтомонзо «верце нотатнень саеме». Седе тов пек тензэ лездась Мордовиянь искусствань заслуженной деятелесь А.Я. Лёвина, кона сестэ «Келусо» дирижёроль.

Кода иля снартне, эсь прят а манясак

Истя сон кармась морсеме «Келусо» ды превезэнзэяк эзь сайне мельть-арсемат туемс тосто. Ансяк, кода мерить, ломанесь арси, Пазось тев теи. Ялганзо, малавиксэнзэ сеедьстэ кортасть тензэ: моразь, келя, васов а туят, морось а андтанзат ды а оршатанзат. Кочкак лия тев, конань кисэ седе ламо пандыть. Валя васня киньгак эзь кунсоло. Мейле арсесь-тейсь: алкукс моразь прясь а тряви. Теке марто арасель образованиязо. Неть мельтнень превсэ кирдезь, сыргась «ярмаков» тевс (бухгалтерэкс) тонавтнеме.

Ансяк кода иля снартне, эсь прят а манясак. Лямбирень училищасо сон чистэнзэяк, онстонзояк несь эсь прянзо морыцякс. Зярс тосо тонавтнесь, арасель вейкеяк чизэ, кона ютаволь апак мора. Морсесь ськамонзо, морсесь «Умарина» ансамблясо, Саранск ошонь народной инструментэнь оркестранть марто.

Лямбирьсэ тонавтнема шкась Валянь туртов ульнесь сехте мазый, сехте валдо ды кенярксов. Одоль, шумбраль. Од шкасто седеесь веши вечкемань ёжомарямот, учи таго-мезе од ды кенярксов. Ды Валя вастызе вечкеманзо. Сыре Шайгова буень Рязановка велень рузонь цёрась сеске педясь седеезэнзэ. Сашань мельскак тусь Валя. Васня ансяк некшнесть вейке-вейкест, виздсть натой варштамс сельмеде сельмс. Васенцеде лембе валт ёвтасть, зярдо прядызь училищанть ды пурнавсть меельце чокшнев. Се вастовомасонть Валя лиснесь моронь морамо. Те шкас эзизе стувто се моронть: «Ой, цветет кудрявая рябина». Талномадонть, мекс эйсэнзэ кунсолы Саша, седеезэ аноколь кирнявтомс мештестэнзэ. Саша те шкастонть вансь лангозонзо ды пельсь натой таргамс оймензэ. Валянь цёковонь кондямо вайгелезэ, мазычизэ допрок рамизь седеензэ. Се чокшнестэнть Саша васенцеде сыргась Валянь ильтямо ды седе мейле сынь свал вейсэльть. Яксесть кавтошка ковт ды, тундонь сазь, налксесть свадьба. Валядо седе уцяскав сестэ арасель косояк.

Ансяк те уцяскась мольсь аволь кувать. Зыянось ды кажось, кода содазь, пракшныть апак учо. Истя лиссь Антошкинтнэнь семиясояк. Сергей цёрынест чачомадо мейле ютасть кавтошка иеть, тесэ апак учо лиссь се покштояк покш кажось: апак учо кулось Саша. Зярдо Валянень ёвтасть теде, сон теке чувтомсь тарказонзо ды эрямось сеске чополгадсь.

Истя сезевсь сынст уцяскаст. Валянь туртов, кона 23 иесэ кадовсь довакс, ушодовсть сехте чопода, сехте стака читне. Сон эрясь теке онстонзо. Лиясто седеезэнзэ чииль истямо апаро, ойменть а кодаль таргамс. Сестэ Валя сайнилизе кедезэнзэ гитаранть ды ушодыль моронь ладсеме. Кодамо моро илязо ладсе, весе сынь алтазельть вечкевиксэнстэнь.

Ашо пельнекс уезь уят ней тон велькссэм,
Лембе пиземнекс свал моданть лангс пизят,
Мельгам сулеекс ильтят эрьва эскельксэм,
Шожда варминекс кутморят монь, палсят.

Моры, эсензэ турватнесэ – салов тансть. Те танстесь сельведтнеде, конатнень кода иля кирде – а кирдевить.

Мельстэнзэ зярдояк эзь тукшно «Келу» ансамблясь

Сон свал кевкстни эсь прянзо: «Мезе теевель моровтомо?». Морось тесэяк идизе. Кода теде мейле сонзэ а вечкемс? Те вечкемась таго изнясь. Зярс-бути Валя важодсь микшницякс магазинсэ. Мейле металлобазасо товароведэкс. Сась мельс, те тевесь аволь сонзэ. Видькстась: мельстэнзэ зярдояк эзь тукшно «Келу» ансамблясь. Арсесь-тейсь, таго сась филармонияв. «Саимизь мекев», – энялдсь Валя. Саизь апак кавтолдо.

Ней сонзэ мезеськак а кармавтсы тосто туеме. Кадык пандытькак тосо – псакань сельведть. Неть ярмактне цяк-цяк сатотсть, зярдо кадовсь ськамонзо. Кедь лангсонзоль Сергей цёрынезэ. Весементь цидярдызе Валя.

Чоподанть мельга свал сакшны валдо. Сонзэ эрямосояк эрсить валдо ды кенярксов чить. Кинзэ лангсо таго вастовсь цёра, конань марто сюлмизь эрямост. Чачсь Оля тейтерест. Сон ней уш кассь покшокс. Тусь аванзо киява. Тонавтни морыцякс. Прядызе МГУ-нь Национальной культурань институтсо средне-профессиональной образованиянь отделениянть, ней арси поладомс тонавтнеманзо седе тов.
Морось а максы стувтомс чачома велентькак, конань Валя вечксы, кода эсензэ аванзо. Седе малавикс ды вечкевикс тарка сонзэ туртов арась.

Седяк, седяк, гармония,
Седяк зяро вий.
Одпорам онстом неия,-
Каршом пакшакс чийсь.
Гармониянь седямосонть
Нурсесь Алопесь,
Од ломанень морамосонть
Оймсесь тундонь весь.

Н. Ишуткинэнь валонзо лангс В. Строкинэнь моронть Валя а стяко вечксы весемеде пек. Сон ледстни эсь одпорадонзо, зярдо кизэнь чокшнестэ пуромильть вейс куринкань од ломантне, налксильть, пейдильть ды морсильть морот. Мезе седе паро ули эрямосонть?!

Медьковонь 26 чистэ Валентина Фёдоровна Антошкина
(Дедяева) тешкстызе чачома чинзэ. Сонензэ топодсть 55 иеть.
Эрзянь те пародояк паро морыцянтень ёвтатано седейстэ
молиця лембе валт, арсетяно кеме шумбрачи, кувака эрямо,
шкинемасо од изнявкст, вечкема кода малавикстнэнь, истя
кунсолыцятнень пельде.

Раиса Щанкина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».