Вторник, марта 19, 2024
Важное

«ТЕПЛИЧНОЕ» АО-со ВАЖОДИЦЯТНЕНЬ СЕДЕ ПОКШ ПЕЛЬКСЭСЬ – ТЕЙТЕРЬ-АВАТ. ЭМЕЖЕНЬ КАСТЫЦЯТ, ТЕХНОЛОГТ, АГРОНОМТ, КОНСЕРВАНЬ ЦЕХЕНЬ МАСТЕРТ ДЫ ВАЖОДИЦЯТ – ВЕСЕ НЕТЬ ТЕВТНЕСЭ МАЗЫЙ, ЁРОКОВ, ЭРЯЗА ДЫ КОДАМОЯК СТАКА РОБОТАДО А ПЕЛИЦЯ АВАТНЕ. ЭРЬВАСЬ ЭЙСТЭСТ ПРЕДПРИЯТИЯНЬ БАШКА ПЕЛЬКСКЕ, ЭРЬВАСЬ – СОНЗЭ ВАНДЫНЬ ЧИЗЭ.


Надежда Ивановна БЕЗИНА «Тепличное» АО-со важоди уш ниленьгеменде ламо иеть. Сась тей 1980 иестэ овсе од тейтерькакс. Ютызе весементь. Васняяк колмошка иеть роботась паксясо, мейле малав кемень иеть ульнесь консервань цехень мастерэкс ды вана уш 31 ие, 1992 иестэ саезь, важоди 3-це цехсэ технологокс.

– Пек вечкса эсь роботам, вечкса сень, мезе теян. Зняро иень перть важодезь, предприятиясь монь туртов кармась омбоце кудокс, – тешксты Надежда Ивановна. – Нама, неть иетнень перть полавтовсь ламось. Васняяк, пурнавсть ламо содамочить, опыт. Мон свал кортан, полавтовить шкатне, полавтовить технологиятне, полавтови сонсь ломанеськак. Нама, полавтоматне паро ёнов.

Надежда Безинань чачома ёнксозо – Кочкуровань Од Пурня велесь. Школанть прядомадо мейле тейтересь кандынзе конёвонзо эсенек университетэнь филологиянь факультетэв. Тонавтнеме бажась понгомс вейсэ ялганзо марто. Надеждань саизь сеске, а вана ялгась баллонь коряс эзь юта. Ды тонась кортызе саемс документтнэнь ды молемс тонавтнеме кинонь техникумс, кона ульнесь Калининградонь областень Советск ошсо.

– Филологиянь факультетстэ конёвон саинь, туинек кие соды ков. Ансяк вана кувать тосо эзинь кирдеве, велявтынь тиринь ёнксов. Авам жо свал тень кортыль, монь эйстэ лиси вадря агроном. Ды Калининградсто велявтомадо мейле прядыя Краснослободскоень велень хозяйствань техникумонть, карминь агрономокс. Мейле эштё прядыя Н.П. Огарёв лемсэ МГУ-нь Аграрной институтонть. Ды муия эсь таркам Тепличной комбинатсо, – корты Надежда Безина.

Эмежень кастоманть марто авась сюлмизе весе эрямонзо. Кода корты сонсь Надежда Безина, цехсэнть весементь кисэ вал кирдить цехень прявтось ды технологось. Кода сынь ладясызь важодеманть, истя весемесь кармияк.

– Технологось весе лувонть мельга ваны – видьмексстэ саезь кенерезь эмеженть видьс, – ёвтни Безина. – Кода авась ваны эсь эйдензэ мельга, истя миньгак. Васняяк мелявтат, штобу видьмекстнэ лисевельть, мейле ванат касомаст мельга. Производствасо эдь эрьва мезе лисни. Лиясто сехте вадря касовкстнэ ормалгадыть, мезеяк коласынзе. Ды чумонть васняяк вешнят эсеть эйстэ. Паряк, мезеяк теить а истя, мезеяк менстить, манявить. Эдь, невтемга, куярось пельиень перть касы, эмежть максы, помидортнэ мик иень перть. Ды весе те шканть перть домкасто ванома касомаст мельга, тонь эйстэ ламосо ашти вадря продукциянть ламочизэ.

Надежда Ивановна жо пек вечксы эсь роботанзо ды топавты сонзэ парсте. Тень коряс коллективсэнть эйсэнзэ ловить вадря, эсь тевень содыця специалистэкс. Ламо иень перть вадрясто важодеманть кисэ Н. И. Безина тешкстазь эрьва кодамо дипломсо ды шнамонь конёвсо. Сон – Мордовия Республикань велень хозяйствань заслуженной роботник, трудонь ветеран.

Анастасия Михайловна ШМУКЛЕР эмежень кастомань предприятиясонть роботы технологокс. Эрзянь тейтересь чачсь-кассь Отяжелень райононь Таразбуесэ, тей сась 2004 иестэ Н. П. Огарёв лемсэ МГУ-нь биологиянь факультетэнть прядомадо мейле.
– Университетсэ тонавтнинь инженерэнь-биотехнологонь тевентень, – ёвтни Анастасия Шмуклер. – Тонавтнеманть прядомадо мейле ульнесь мелем роботамс эсь специальностенть коряс, эли истямо жо малавикс тевсэ. «Тепличноенть» ланга арсекшнинь эштё тонавтнема шкасто, секскак дипломонть получамодо мейле сеске сынь тей. Вечкевикс тевсэнть роботан те шкас.

Эряви меремс, тейтересь аволь сеске аравтозель технологокс. Васняяк ульнесь важодицякс консервань теемань цехсэ, мейле косо-бути иень ютазь аравтызь агрономокс-агрохимикекс, а 2009 иень февральстэ Анастасия Шмуклер (тейтерькс Сапунова) ютавтовсь важодеме 4-це цехс технологонь таркантень.

– Неень шкань теплицатне – те пек а шожда производства, – ёвтни Анастасия Михайловна. – Штобу, мертяно, куярось улевель тантей, цятордыця ды вадря, сонзэ кастоманть туртов эряви теемс вадря условият. Невтемга, теплицатнесэ эрявикс коштось аравтови компьютертнэнь вельде, мезенть коряс а нолдавить кодаткак ильведевкст. Минь жо, технологтне, кемекстатано эрявикс параметрат ды ваннотано, штобу системась роботаволь видестэ. Тесэ аравтови эрявикс температура кода чить, истя ветькак, пштистэ ванови теплицатнесэ летькенть ды эмежтнень валноманть мельга. Пек вадря, неень теплицатнесэ валномась байгень-байгень, сон лезды летькенть кирдемс истямо, кодамо эряви эмежтненень. Эрямось а ашти ве таркасо, весемесь полавтови. Эмежень кастомань ёнкстнэяк свалшкане полавтовить. Минек производствась неень шкань, виевгадтано ды важодемасо нолдатано неень шкань технологиятнень.
4-це цехень теплицатнесэ кастовить помидорт, куярт, порцькат, пиже салат, тундонь шкане кастыть росада. Ды весе неть касовкстнэнь ды эмежтнень вадрячись ламосо ашти А. М. Шмуклер технологонть вадря важодеманзо эйстэ. Эсь тевензэ тейтересь топавты кода эряви. Сонзэ шныть цехень важодицятне, бажамонзо редить прявттнэ. А эдь эсь важодеманть кисэ сехте покш питнесь – те лиятнень паро валост.
«Тепличное» АО-со важодицятнень эйстэ жо сехте покш пельксэсь – те эмежень кастыцятне, конатнень ютксо Галина Петровна ВОЛКОВА. Сон тиринь предприятиянтень макссь 25 иеть. Ды те шкас сюкпря ёвты Пазонтень тей роботамо понгоманть кис.

Галина Волкова Отяжбуень Аловелестэ. Велень школанть прядомадо мейле тонавтнесь Инсаронь аграрной техникумсо мекш марто важодицянь профессиянтень. Зярыя шкань перть котьмась те тевсэнть, ансяк чарькодсь – сон аволь аваломанень туртов.

– Мольсь 1996 иесь. Тевтне масторсонть а пек вадряльть – важодема таркат арасельть, зарплатат малав косояк эзть пандо. Ков пшкадема роботань коряс, эзинь содаяк, – ёвтни Галина Волкова. – А тесэ ялгам ёвтась тень эмежень кастома теплицатнеде. Молинь тов роботань коряс кевкстеме ды сеске эзь кемевияк тень – саимизь. Теплицасо важодемань стакачитнеде овсе эзинь тандадо. Велень ломаненть туртов истямо тевесь пек стакакс а маряви.

Кода ушодыя важодеманть, теплицатне эштё ульнесть ТЭЦ-сэ. Те чис превсэнь, важодеме лисинь мартонь 20-це чистэ, теинек капстань росадань пикировканть. Мейле, апрелень 27-це чистэ, ливтимизь важодеме паксяв, кочкинек тикше.

Зярыя шкань ютазь од теплицатнень 1-це цехсэ лиссь тарка ды Волковань саизь тов, кармась роботамо помидоронь ды куяронь кастома теплицасонть, косо покш мельсэ тевенть топавтсь теплицатнень калавтомас.

– Васенце цехень теплицатнень калавтомадо мейле весень ютавтымизь важодеме лия цехтнева, – корты Волкова. – Ансяк мезеяк лангс апак вано, минь весе топавттано эсь тевенек – озавттано эмежть, якатано мельгаст, касттано ды пурнатано кенерезь помидортнэнь ды куяртнэнь. Ды пек учотано од теплицатнень теемаст прядоманть, штобу минек цехень важодицятне пурнавольть одс ве таркас.

 
Предприятиянть теевемстэ, 1980-це иетнестэ саезь, важоди тесэ Вера Михайловна ГЛАЗКОВА. Сонгак, кода ламот тесэ, эсь важодема кинть ушодызе эмежень кастыцянь тевстэнть.

– Мон чачинь-касынь Ковылкинань районсо. Тетянь-авань эйстэнек ульнесть кавксо эйкакшт. Весе ульнинек роботыцят ды уш вишка шкасто саезь парсте содылинек важодеманть танстензэ. Паряк, вана те ёнксось ветимимгак важодеме эмежень кастома теплицатнес, – ёвтни Вера Глазкова. – Бути жо арсемс, мон мезеяк лия а маштангак. Техникумсо тонавтнема шкасто прядыя Краснослободскоень аграрной техникумонть, эйсэнь кадсть важодеме скалонь потявтыцякс совхозс. Тонавтнема шкасто тосо зярсыя роботынь. А мейле лисинь мирденень ды сынек эрямо Озёрный посёлкав. А ков мон тесэ молян роботамо? Маласо ульнесть теплицат. Истя тей понгиньгак.

Глазкова зярсыя роботась эмежень кастыцякс, весемесь ульнесь мелень коряс. Мейле тердизе эстензэ прявтось Александр Михайлович Живаев ды мерсь: кармат технологокс. Те шкастонть ней уш ютасть колоньгеменде ламо иеть.

– Мон весементень тонавтнинь монсь. Икеле эдь теплицатне ульнесть овсе лият, важодемс пек стакаль. А ней светокультурасо кодат урожайть саевить. Зярдо тей сынь, кавонзазь метрасто саевильть 18, сехте ламось 30 килограммат эмежть. А ней – 100, башка теплицатнестэ – 156 кг кавонзазь метрасто. Ледстнян, зярдо васенцеде пурнынь 13 кг эмежть, прявтось весень икеле шнымим. Кода ней весемесь полавтовсь. Зярдояк эзинь арсекшнеяк, истямо технология марто карман важодеме ды саеме истят урожайть.

Зяро иеть роботан, свал дивсян минек важодицятнень, тейтерь-аватнень вийтнес. Важодема таркав свал ютыть мизолкс марто, кецязь, свал эрязат. Зярдояк а пеняцить. А эдь тевенть топавтыть а шожда, аволь весе цёратненень виень коряс. Сынь минек алкуксонь «трудоголикть» ды пек вечксызь эсь тевенть. Эйстэст ламосо аштияк минек предприятиянть вандынь чизэ.

Мартонь 8-це чистэ тешкстави тундонь сехте валдо ды лембе кенярксчись – Раськеютконь тейтерь-авань чись.
«Тепличное» АО-нь прявтось Александр Михайлович Живаев ды тесэ роботыця цёратне ёвтыть лембе поздоровт те валдо кенярксчинть кувалма эсь коллективень важодицятненень – мазый, ёроков, эрьва тевсэ дока тейтерь-аватненень.
Арсить весенень шумбрачи, оймень вийть ды паро эрямо! Тынк эйстэ ашти кудосо сэтьмечись, тынк кедьсэ – семиянь лембесь-валдось. Уледе уцяскавокс!

Юлия ЕРЕМИНА
Фототне: Э. РЕТУНСКИЙ
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».