Вторник, марта 19, 2024
Важное

 

Ютазь недлясто Мордовиянь Прявтось Владимир Волков пшкадсь Кучома марто Государственной Собраниянтень. Покш промксось ютавтовсь Республикань культурань дворецсэ.

Региононь руководителесь ёвтынзе 2019 иень социально-экономической виевгавтомань невтевкстнэнь ды тешкстызе, мезе лангсо эряви важодемс маласо шкастонть.

Экономикась

2019 иестэ региононь валовой продуктась кассь малав 4% ды кармась 246 млрд. целковойть. Вадря касома невтсь промышленностесь – 7% ламо. Пурназь 1 миллион 350 тёжат тоннат сюро. Ламолгадсь эрямо таркатнень строямось, витнезь малав 180 вайгельбеть кить.

Республикань Прявтось тешкстызе, Мордовиясо ушодовсь касомань-кепетемань од этап, конась сюлмавозь национальной проекттнэнь топавтомаст марто, конатнень яволявтынзе Россиянь Президентэсь. Кото иетнень перть республикантень федеральной бюджетстэ явовить малав 55 млрд. целковойть. Национальной проекттнэнь топавтоманть Мордовиянь Прявтось ёвтызе эсь Кучоманть прявт темакс.

Промышленностьсэ топавтозь инвестициянь комсь проектт. Тедеде производствань кастомань проектт топавтовить кемготово промышленной  предприятиятнесэ. Ды аволь ансяк Саранскойсэ, истя жо Рузаевкань, Чаунзань, Зубово-Полянань районтнэсэ. Сынст вельде теевить малав 3 тёжат важодемань од таркат.

Мордовиянь Прявтось тешкстызе: течи прявт кевкстемась – зарплататнень кастомась.

Эрицятнень алкуксонь доходост кассть 2,8 процентс. Минь чарькодтяно, те аламо. Ломантненень а редяви. Ламотнень улить эрямо таркань, машинань рамамс, эйкакштнень тонавтомаст лангс саезь кредитэст. Секскак Мордовиянь эрицятнень доходост касомась улезэ кавксть седе покш весероссиянь невтевксэнть коряс. Пшкадян Правительствантень, важодема таркань весе максыцятненень: важодемань производительностень кастоманть вельде покшолгавтынк доходтнэнь, – мерсь Владимир Волков. – 2024 иентень Мордовиясо средней зарплатась улезэ 42 тёжат целковойть. Те иенть прядовомс средней зарплатась уш касозо 2,5-3 тёжат целковойс!

Велень хозяйствась

Вадрясто прядызе иенть Мордовиянь агропромышленной комплексэсь. Кода тешкстызе Мордовиянь Прявтось, велень хозяйствань невтевкстнэ касыть уш сисем иень перть, мелят касомась сеске кармась 9%. Мордовиясь котоце ие пурны миллион тоннадо ламо сюро. Эрьва гектарсто саезь 30 центнерт.

Эсест сехте вадря невтевкстнэс малавгадсть якстерькаень кастыцятне, сынь пурнасть миллион тоннадо ламо ламбамо якстерькай, вейке гектарсто сайсть 475 центнерт, – мерсь Владимир Волков.

Мелят АПК-сонть топавтозь кеменде ламо покш инвестпроектт. Тедеде эрявить строямс тувонь кастомань колмо комплекст Ковылкинань районсо, ловсонь комплекс Инсаронь районсо, Рузаевкань районсо одкстомтомс ловсонь комплексэнть, строямс бройлерэнь кастомань коряс площадкат Масловка велесэ. Таштамковонь 17-це чистэ Теньгушевань районсо ушодомс ловсонь комплексэнь строямонть. Тень коряс вейсэнь важодема тешкстазь Венгриянь инвестортнэнь марто.

Республикань Прявтось ламо кортась «Комплексное развитие сельских территорий» од программадонть, кона нолдазь тевс тедеде.

Мордовиянтень федеральной бюджетстэ явовить 840 млн. целковойть, – тешкстызе Владимир Волков. – Эряви строямс Культурань куншкакуро Сыре Шайговасо, витнемс райононь ДК-нть Лямбирьсэ, топавтомс малав ведьгемень проектт велетнень мазылгавтомаст-вадрялгавтомаст коряс, истя жо прядомс весе объекттнэнь, конатнень ушодынек строямо велень виевгавтомань икелень программанть коряс. Велетнесэ эрямо таркань строямонь программантень совавтовсть покш полавтомат. Истя, велень хозяйствасо важодицятнень туртов льготань ипотекань ставкась карми 3-1%. Нолдави тевс велесэ арендань эрямо таркань строямонь программась – кемень иетнень ютазь ломанентень мереви рамамс эрямо тарканть икелень питненть эйстэ весемезэ 1 проценттэ. Райононь ды велень администрациятненень содама, кода важоди те программась. Прявтось – пачтямс сонзэ условиятнень эрьва семиянтень, эрьва эрицянтень. Тедеде од госпрограмманть коряс кудотнень строямс анокстама тёжадо ламо модань участкат, анокстамс инженерэнь инфраструктура Лямбирень, Отяжбуень ды Краснослободскоень районтнэсэ. Сы иестэ Ромодановасо ды Чаунзасо. Администрациянь прявттнэнь тевест: истят площадкат улест эрьва районсо, кудотнень строямс возможность – эрьва велесэ.

Строительствась

Мелят строязь эрямо таркань 348 тёжат кавонзазь метрат, те 4,5% седе ламо 2018 иенть коряс.

Тедеде программась карми улеме седеяк покш, – тешкстызе Владимир Волков. – Строицятненень максома 40 производственной ды социальной объектт, строямс эрямо таркань 360 тёжат кавонзазь метрат.

Китне

Мелят китнень строямс ды витнемс ютавтозь 4 млрд. целковойть. Прявт проектэсь, конань эряви прядомс тедеде, – те Северо-Восточной кинть лангсо сэдтнень теемась. Республикань Прявтось ледстизе: объектэнть максома те иень панжиковонь 7-це чинтень.

Теде башка, Владимир Волков кармавтсь эрязкавтомс кинь строямонть Строительной куросонть ды а стувтнемс велень китнень витнемадост.

ЖКХ-сь

Саранскоень эрицятне пеняцить аволь вадря веденть лангс, – башка тешкстызе Владимир Волков. – Меельце иетнестэ, Футболонь коряс масторлангонь чемпионатонтень анокстамонть шкасто, ламо теезь водоснабжениянь системанть одкстомтомга, магистраленть ды внутренней водопроводонть полавтомга. Ансяк пеняцямотне эзть киртяво, «Горводоканалонть» важодемасо аламо мезе полавтовсь. Арсян, прявт тувталось – аволь виде управлениясь ды технологиятнень а топавтомась. Саранскоень мэрэнтень, окойники, эряви витемс те стакачинть!

Здравоохранениясь

Неень шкане Мордовиясь совась первичной звенань одкстомтомань-виевгавтомань коряс программантень, конань вети Россиянь Минздравось. Покш важодема ветяви ФАП-тнень строямост коряс. Тедеде эрявить панжомс сеске 70 ФАП-т ды врачонь амбулатория Ковылкинань райононь Троицкое велесэ. Теде башка, велетнесэ рамавить медицинань лезксэнь максомань 33 мобильной комплекст.

Тедеде ушодови эйкакшонь республиканской больницянь хирургиянь од корпусонть строямось.

Меельце вете иетнестэ Мордовиясо 5 млрд. целковойть явовить онкологиянть каршо бороцямонтень. Республикань онкодиспансерэнть туртов рамазь неень шкань оборудования. Сы иестэ панжови онкодиспансерэнь од поликлиникась, – мерсь Владимир Волков.

 

Образованиясь

«Образование» нацпроектэнть лувсо строявить школат, эйдень кужот, дополнительной образованиянь учрежденият. Кавто иетнень перть строявить вейксэ эйдень кужот – колмо Саранскойсэ ды кото районтнэсэ. 2024 иенть самс стявтома ниле од школат – кавто Саранскойсэ ды вейкень-вейкень – Торбеевань ды Лямбирень районтнэсэ.

Мон уш максокшныя те кевкстеманть ошонь власттненень, ансяк эзинь маря каршо вал. Ков молить тонавтнеме эйкакштне Васенко куросонть, «Леруа Мерлен» лавканть вакссо, Таня Бибинань куросонть строявиця кварталтнэстэ? Маласо аштиця школатне пешксеть. Те кевкстеманть эряви ванномс ды витемс, – мерсь Владимир Волков.

Мордовиянь Прявтось ёвтызе, 2021 иень таштамковонь 1-це чистэнть саезь республикань зярыя школатнесэ кармить тонавтовомо китаень ды испанонь кельтне.

Демографиясь

Мордовиянь Прявтось башка мель явсь демографиянь кевкстематненень ды яволявтсь эйкакш марто семиятненень лездамонь од ёнкстнэде:

1. Сеть аватненень, кить 25 иетнень топодемс чачтыть васенце эйкакш, максовить 100 тёжат целковойть ипотекань коряс васенце взносонть пандомс. Ансяк ули вейке вешема: семиясонть эрьва ломаненть лангс доходось улезэ республикасонть кавто прожиточной минимумтнеде аволь седе покш.

2. 2021 иестэ саезь эйкакштнень школав пурнамс ярмаконь лезксэсь покшолгавтови кавксть. Истя жо сы иестэ покшолгавтови республикань авань капиталось, конась пандови колмоце ды меельце эйкакшонть чачтомаст кис.

3. Спортонь ды культурань весе учреждениятнес ламо эйкакшонь семиятне понгост питневтеме. Ды аволь ансяк эйдетне, истя жо тетятнеяк-аватнеяк.

4. 30 минутас киртямс важодемань чинть сеть аватненень, кить кастыть 12 иеде седе вишкине вейке эли кавто эйкакшт, кинь колмо ды седе ламо эйкакшост – 1 часос. Тень пингстэ зарплатась ванстови целанек. Бути эйкакштнень касты тетясь, сонзэ важодемань чись истя жо киртяви.

5. Республикань ламо эйкакшонь триця семиятненень кудоютконь тевтнесэ кармить лездамо волонтёрт. Невтемакс, сайсызь эйкакшонть школасто эли эйдень кужосто, ветясызь секцияв, лездыть лавкасо рамсемстэ.

Татьяна Иконникова

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».