Вторник, марта 19, 2024
Важное

Орданьбуень Чукало эрзянь велесь сравтовсь пек мазый таркатнесэ. Певтеме паксят, шольниця вишка Сарка лейне, пангодо-кстыйде пешксе вирнеть. Эряк ды кенярдт! Тесэнь эрзятне алкуксонь важодиця ломанть, тевде а пелицят, кеме хозяйствань кирдицят, ды кода неинек-маринек, парсте морамо-киштеме маштыцят. Малав 40 иеть велень Культурань кудонть юрсо важоди «Эрзянь ават» фольклоронь ансамблясь. Сон ней уш содавикс аволь эсензэ велесэ, республиканть ды, натой, масторонть томбалеяк.



Зярыя иеде икеле сынь ардтнесть морамо эрзянь ды мокшонь диаспоранть туртов Башкириявгак ды Эстониявгак. Ансяк сестэ те ульнесь ансамблянть васенце пурнавксось, ней «Шумбрат, Мордовия!» ды «Вейсэ-марса» фестивалентень якси уш колмоце пурнавксось, козонь сови 11 ава. Неть: Любовь Ивановна Исайкина, Ирина Кузнецова, Татьяна Ивановна Лияськина, Наталья Васильевна Перова, Нина Викторовна Кузнецова, Галина Викторовна Литюшкина, Татьяна Евгеньевна Кипайкина, Елена Николаевна Чавкунькина, Лариса Викторовна Дугушкина, Раиса Андреевна Адушкина, Вера Викторовна Моисеева ды Раиса Константиновна Кипайкина.

Сынь весе аволь профессиональной морыцят, арась эрявикс образованияст, кие важоди школасо, почтасо, фермасо, кие уш умок пенсиясо, ансяк эрзянь морось сынст эрямосо саи покш тарка. Галина Викторовна Литюшкина те ансамблясонть уш ламо иеть. Сон велень активисттка, школань икелень прявт, тонавтыця, зярс-бути савкшнось роботамс велень прявтокскак. «Мольсь 1982 ие. «Под солнцем Родины» республикань фестивалентень тердевсть фольклоронь коллективть. Чукалонь велень советэнь прявтось, патям А.Н. Кузнецова арсезевсь, мекс бу минек аватненьгак а пурнамс ды а невтемс сынст виев вайгелест сцена лангсто. Кудосо пек парсте морыть, кадык республиканть келескак пряст невтьсызь. Сестэнь колхозонь прявтось И.А. Прытков лездась тенст рамамс эрзянь руцят-палят. Васенце составонтень совакшность Софья Кипайкина, Софья Вергизова, Анастасия Лапшаева, Клавдия Самаркина, Екатерина Раскина, Татьяна Тепайкина ды художественной прявтось Нина Сергеевна Подмарёва. Куватьс апак арсе ансамблянть лемдизь: «Эрзянь ават», – ёвтни Литюшкина. Ансамблянь репертуарось пурнавсь куроксто. Велесэнть эриця покштятнень-бабатнень пельде сермализь стувтозь кезэрень моротнень валтнэнь, арсесть сынсь нурька морынеть сестэнь эрямодонть, налксесть пейдевтиця сценкат.

«Эрзянь ават» ансамблядонть башка морыцятне арсесть теемс эйкакшоньгак, ветизь-пурнызь тозонь эйкакшост ды нуцькаст. Истямо лувось кандсь паро видьмекст. Сестэнь «Пизелнэ» ансамблястонть паро морыцякс кассть весенень содавикс Евгений Самаркин, «Эрзянь аватнень» неень шкань художественной руководителесь, Саран ошонь культурань училищань прядыцясь Лариса Дугушкина ды сехте од морыцясь Ирина Кузнецова.

Нама, 40 иень ютазь, ансамблятнень пурнавкстнэ полавтовсть, эйкакштне кассть, аватне сыредсть, састь од морыцят. Ансяк вастовома таркаст кадовсь текесь – Культурань кудось, конантень ней уш 50 ламо иеть. Нама, сон пек таштомсь ды овсе а мазылгавты велень куншканть, (фотосонть) косо мазый ашо-сэнь локсеекс ашти Михаил Архангелэнь лемсэ храмось (сонзэ стявтомс лездась весе велесь ды тосо чачозесь РФ-нь Федеральной Собраниянь Федерациянь Советэнь членэсь В.В.Литюшкин ды ялаксозо А.В.Литюшкин), Ине Отечественной войнасо чавовозтненень кеврунгось. Клубсонть умок арасельть витнемат-петнемат, ташто озамо таркатне зярдо-бути ускозельть Саран ошонь театрасто, сценантеньгак пароль стамс мазый шаршавт ды сынсь морыцятнеяк а отказавольть эрзянь викшневкс марто од оршамопельде, од музыкальной оборудованиядо.

Культурань кудонь прявтось Любовь Ивановна Исайкина тесэ важоди 2013 иестэ саезь ды седеезэ пек мелявты клубонть кисэ: «Минек кавто велетнесэ эрицятнеде, Чукалсо ды Жарёнкасо, малав вейке тежа, бути тенек строить од Культурань центра, сакшныцятнеде кармить ламо. Нейгак ве чияк а эрси, бути калярдомо, книгань ловномо миненек а савольть бу велень эрицятне. Сехте эрязасто чиить, бути минь анокстатано концерт. Эрицятне «Эрзянь ават» ансамблянь пек вечксызь. Сон, прянь апак шна мерян, велень ды райононь каштанчи. Ве мероприятияяк а юты аватневтеме. Ней кизэнь тевтнень лангс апак вано, анокстатано Чукало велентень 350 иетнень топодеманть тешкстамонтень, конань арсетяно ютавтомс августсто».

Алкукскак, «Эрзянь ават» ансамблясь республиканть сценатненьгак мазылгавты кезэрень моротнень морамосо. Сынь койтнень-кирдатнень ванстыцят, эйдест-нуцькаст туртов кандыцят, велень культурань кирдицят ды поладыцят. Галина Викторовна Литюшкина жо ансамблясонть эште историянь ванстыця: башка курынесэ кирди весе газетасто материалтнэнь, конатнесэ ёвтневи ансамблядонть, фотографиятнень, моротнень, вишка театраст путовкстнэнь сценарийтнень. Те эрзянь авась лиясто ансамблянть гастролев усксицяяк, сон 20 ламо иеть ардтни машинань руль экшсэ, ансяк, келя, сехте пек вечки мотоциклат.

Чукалонь аватнень марто вастовомсто сынь пек энялдсть минек редакциянть пельде пачтямс куля Мордовиянь Прявтонь тевтнень топавтыцянтень Артем Алексеевич Здуновнень, Культурань министрань тевтнень топавтыцянтень Светлана Никитовна Баулинанень эсь вешемадост-арсемадост. Од Культурань кудосонть, арсить аватне, муевель тарка библиотекантень, кодамонь-стамонь, эйкакштнень туртов курынетненень, паряк панжовольть од важодема таркат, конатне пек а сатныть тосонь велень од эрицятненень. Сельмест сявадыть лия велетнень лангс, косо панжовить истят ютко шкасто оймсема дворецт. Велень школасонть зярс тонавтнить 42 эйкакшт, ули чинь эйдень кужине, эрить ниле-вете эйкакшонь триця семият. Паро инфраструктурась эдь кецявты сельмтнень, ёжонть ды касты ломантнень седейсэ каштанчинть тиринь веленть кувалма. «Паряк, туицятнедеяк кармить а пек ламо, сыцятнеяк мекев ламолгадыть», – арси велень прявтонь тевтнень топавтыцясь Мария Ивановна Кузьмина, конась мелявты эште вейке ёнксонть коряс, кодаяк сынь а муить велень азор Чукало велезэст. Мария Ивановна ладязь нурька шкас, зярс ломань а муеви. Ансяк одтнэ а капшить...

Чукалонь аватнень марто вастовомсто дивазевинек сынст эрзянь моронтень вечкемантень. Тингень-пирень, кардазонь тевтнень теезь, сынь капшить вейсэ вастовомо. Минек икелеяк сеске оршизь мазый руцяст-паляст ды невтсть а покшке концерт – худрукось Лариса Дугушкина серьгедизе сынст велень эрицянть икелень батюшканть Евгений Самаркинэнь «Вай, тон велинем, велинем» седейс токиця моронть. Эрязат «Эрзянь аватне» интернетсэяк: ветить эсест ансамблянь лопине «Одноклассниксэ», пандемиянть шкасто ютавтнесть онлайн-мероприятият. Арсян, сынст ёжов ды а пелиця обуцяст лезды тенст топавтомс васенце арсемасткак. Кадык тенст теньсэ лезды Пазось ды покш прявттнэ!

Марина Девятова
Фототне Эдуард Ретунскиень

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».