Вторник, марта 19, 2024
Важное

Сась алкуксонь сёксесь. Неень шкане кода а ормалгадомс гриппсэ ды коронавируссо, ванстомс эсь прянть ды малавикстнэнь, минек ловныцятненень толковамот максы Мордовия Республикань Здравоохранениянь государственной бюджетной учреждениянь «Поликлиника № 2» медицинской профилактикань отделениянь врачось Татьяна Ивановна СЕРЖАНТОВА.


Татьяна Сержантова чачсь Отяжелень райононь Низовка велесэ 1978 иестэ. Тоско ушодсь школасо тонавтнеме, шкань ютазь тетянзо-аванзо тусть эрямо Чаунзань райононь Апраксина велев. Вейксэньгеменце иетнестэ, школанзо парсте прядомадо мейле (максозель тензэ сиянь медаль), кармась тонавтнеме Н. П. Огарёв лемсэ МГУ-нь сестэнь медицинской факультетсэ «Лечебное дело» специальностенть коряс. 2000-2001 иетнестэ ютась ординатура Саранск ошонь 13 № поликлиникасо. Ёроков ды тевензэ парсте содыця од специалистэнть тердизь важодеме лецямонь те учреждениянтень. Татьяна Ивановна васня ульнесь терапевтэкс приёмной отделениясо, мейле сонзэ ютавтызь те больницянь васенце номер терапевтической отделенияс (стационарс).
2015 иестэ саезь неень шкас сон важоди терапевтэкс Республиканской медицинской профилактикань центрасо.

– Татьяна Ивановна, мезе те гриппесь?

– Гриппесь – те куроксто ушодовиця, вируссо кандтневиця педиця орма. Сон вейке ломаньстэ омбоцес юты кешнямсто-козомсто, лексемстэ. Сеедьстэ токи лексемань, нервань, седеень-санонь ды ломаньсэнть уликс лия таркатнень.

– Чарькодеви, эрьва ормась ломанень шумбрачинть колы. Инескеть, пачтядо, кодамо зыян канды ормалгадозентень гриппесь?

– Гриппесь сеедьстэ юты стакасто: рунгонь температурась кузни 39-40 градусос, появакшныть виев сурневтема, прянь пек сэредема. Гриппсэ сэредемась ды шкастонзо кода эряви алецямось сеедьстэ пачтить тевелявонь ормантень, пачти сынст таргоземас.
Грипптенть сеедьстэ сэредить пилетнеяк, конатне мик лоткакшныть марямодо. Гриппесь лавшомгавты весе организманть, теи сонзэ орматнеде а цидярдыцякс. Тень пингстэ ломанентень педсить ламо лия орматкак, юткстост истят, кода энцефалитэсь ды менингитэсь. Сынь ветить ломаненть инвалидэкс эли мик куломас.

– Татьяна Ивановна, кинень сехте пек пелема грипптенть?

– Тешкстаса, сехте сеедьстэ гриппсэ ормалгалить медицинасо ды образованиясо важодицятне. Коммунальной, микшнемань-рамамонь тевтнень топавтыцятне. Прянть пек ванстома сетнененьгак, конатненень, секень вант, учома грипптенть мельга стака ёжо. Истямокс лововить колмо иеде седе вишкине эйкакштне, 60 иеде сыретне, лия ормасо сэредицятне, школасо, вузсо тонавтницятне, шумбрачинтень зыянонь кандыця таркасо важодицятне, седеень ды тевелявонь-мезень ормадо майсицятне. Юткозост совить сахаронь диабетсэ майсицятне, рунгонь покш сталмо мартотне, пешксесэ тейтерь-аватне, армияв туицятне.

– Виде, орманть ков седе шожда а нолдамс, сонзэ лецямодо. Инескеть, ёвтнеде, кода прянть ванстомс грипптенть?

– Гриппенть а нолдамонь лувтнестэ сехте лезэвекс ловозь вакцинациясь. Тешкстаса, прививканть теемстэ организмантень совавтови кольстязь-калавтозь вирус: пелькскеть, конатнень арась виест сынст ламолгавтомс.

Прививкась кармавты ломантнень ютксо теемс сонзэ ванстыця антителат. Теде мейле понгиндеряй организмантень гриппень вирус, антителатне тейсызь сонзэ вийтемекс (аволь зыяновокс), сестэ се ломанесь а ормалгады эли орманть ютавтсы ков седе шождасто.

– Татьяна Ивановна, сеедьстэ сеть ломантнень пельде, кить икеле тейнесть прививкат, ней сави марямс, минь икеле путнинек, паряк, ней а эряви те тевенть топавтомс. Тынк вановтонк коряс, мекс гриппенть эйстэ путома прививкат эрьва иестэ?

– Сеть ломантненень, кить кавтолдыть те кевкстеманть коряс, пачтян: масторлангсонть улить «А» гриппень ды «Б» гриппень эрьва кодат вируст. Сынст лувост эрьва иестэ полавтневи. Тешкстаса, сынсь вирустнэяк свал полавтнить генетикаст-лувост. Специалисттнэ иень перть ваныть неть тевтнень мельга, ливтнить лангс полавтнематнесэ сехте виев ёнкстнэнь. Мейле, весе неть ванноматнень мельс саезь, вакцинань теицятне совавтыть препараттнэс эрявикс полавтоматнень.

– Татьяна Ивановна, аволь умок ушодовсь сёксесь, аволь лембе читнень марто седе ламолгадыть экшендемань орматне. Тынк коряс, зярдо седе паро путовтомс прививкат ды кода тенень анокстама?

– Прививкат теевтема эрьва иестэ, ормань шканть ушодовомадо икеле. Те – августсто саезь ноябрянть прядовомс.

– Кодат вакцинат неень шкане тевс нолдтневить?

– Тень туртов улить, кода тенст мерить, инактивированной вакцинат. Сынь зыянонь а кандыцят, эрьва кинень ладицят, организманть пек виевгавтыцят. Весе вакцинациятнень лангс улить парочидест кемевтиця конёвт (сертификатт).

– Татьяна Ивановна, ялатеке улить ломанть, конатненень а мереви теевтемс истят прививкат?

– Тешкстаса, эрьванть, кие арсесь путовтомс прививка, васняяк вансы врач. Сон кевкстнесы ломаненть аволь умок печтязь ды свалшкань уликс ормадонзо, парсте-аволь ютавтызе икелень прививканть, путоматнень шкадонть.
Беряньстэ ёжомарямонть эли свалшкань орманть пштилгадомань шкасто прививкат а тейневить.

– Прививкадонть гриппсэ ормалгалить?

– Кемевттядызь: прививканть эйстэ гриппсэ ормалгадомс а кода. Эдь вакцинасонть арасть вирусонь цела пелькст. Бути ломанесь шкань ютазь ормалгады гриппсэ, ютавтсы шождасто, мельганзо а эрсить осложненият.

– Ломантнень ютксо ули истямо мель, гриппте прививкась ванстсынзе коронавирусонь ормадонтькак. Виде-аволь те мелесь?

– Арась, а вансты. Эдь сынст аволь вейкеть вирусост, орматнень кандтницяст. Грипптенть ды COVID-19 прянть ванстомга эряви путовтомс прививкат кавонест орматнеде. Прививкатнень путомань юткось – вейке ков. Мельсэ кирдема: гриппсэ ды коронавируссо ве шкасто ормалгадомась пачтятадызь стакасто сэредемас, пелема мик куломадо.

– Косо путовтома гриппте прививка?

– Вакцинация ютавтнить эрямо таркатнень коряс поликлиникатнесэ. Тень тееме, кода свал, кармить эйдень кужотнесэ, школатнесэ, важодема таркатнесэ.

Гриппте прививкатне шумбрачинтень зыян а кандыть. Ванстынк ормадонть эсь прянк ды малавиксэнк, уледе шумбрат!

Валентина Юдина
Минздрав РМ
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».