Вторник, марта 19, 2024
Важное

Тундонь васенце чинть каршо кенярксов куля сась республикав: РФ-нь Президентэсь В. В. Путин Мордовиянь 20 эрицятненень макссь казнеть. Казезтнень ютксо Ромодановань муниципальной райононь организационной отделэнь прявтось, эрзянь авась Людмила Гусева.

Тешкстасынек, Людмила Андреевна ютазь иестэ лиссь изницякс Мордовия Республикань муниципальной сехте паро служащей пелькстамосонть. Тейтерь-авань кенярксчиденть икеле минь кортнинек те оймамонь а содыця, ламо тевень топавтомо бажиця эрзянь аванть марто. Ледстяса, кодамо кевкстема марто сонензэ эзинек пшкале, сон свал анок лездамс. Эрьва тевенть топавты шкастонзо, чарькодезь ды седейшкава. Уш зярыя иеть сон минек газетань паро ялга.

Мартонзо кортамонть ушодомсто, васняяк ледстинек тетянзо, Андрей Васильевич Захватовонь, кие ламо иень перть ульнесь «Эрзянь правда» газетас домка смусть марто публикациянь анокстыцякс. Людмила Гусева (тейтерькс Захватова) вишка пингстэ аволь весть васня ванкшнось, мейле ловнось тетянзо сёрмадовкстнэнь, конатнень Андрей Васильевич ванстсь башка папкасо, тосо жо путозельть «Эрзянь правда» газетанть пельде паро публикациянь анокстамонь кисэ благодарносттне ды Почетонь грамотатне.

Андрей Васильевич ды Нина Васильевна трясть-кастасть колмо эйкакшт. Людмила Андреевна семиясо омбоце эйкакш. Эште вишкинестэ бажась улемс тонавтыцякс. Сон топавтовсь. Школанть прядомадо мейле теевсь М. Е. Евсевьев лемсэ МГПИ-нь (ней МГПУ) студенткакс. Тонавтнесь парсте, вечксь общественной роботанть. Институтсо улемстэ теевсь содавиксэкс од цёранть Александр Гусев марто. Вузонть прядомадо мейле одтнэ сайсть мель урьвакстомс-венчамс.

Людмила Гусевань ледстнеманзо коряс, Ицялбуень РОНО-со, ков кучизь сонзэ важодеме, эзть сода маласо шкасто сонзэ мирденень лисемань кулядонть, секс тензэ мерсть улемс Ичалкань комсомолонь райкомонь 3-це секретарекс. Александр Александровичень жо кучокшнызь важодеме тиринь Ромодановань районов. Сестэ одтнэнень свадьбадо икеле савсь видькстамс ладямонь тевдест. Ромодановань РОНО-в мольсть кавонест ды вешсть вейсэнь важодема тарка. Сынст уцясказост се шкане тов сась теке райононь Белозерье татаронь велестэ школань прявтось, кинь ансяк ладякшнызь те тевентень.

Сон тердинзе эсензэ велень школав важодеме. Алтась максомс тонавтомань част зяро ули мелест, эрямо тарка, косо ули весемесь. Теке жо чистэнть тердинзе эсензэ машинасо варштамс важодемань од тарканть. Истя тейстькак. Алкукскак, Гусевтнень вастызь лембестэ, топавтызь весе алтамотнень. Малав вете иень перть тосо эрясть ды важодсть. Паряк эштёяк кадовольть, бути тенст аволь лисе лия тев. Людмила Андреевнань валонзо коряс, пек тонадокшность велентень, тонавтыцянь коллективентень ды эйкакштненень.

Весе лиссь апак учо, сась тенст Ромодановань СПТУ-сто прявтось ды энялдсь молемс сыненст важодеме. Ромодановасояк тевест тусть аволь беряньстэ. Сеске тенст макссть эрямо тарка ды тонавтыцянь вечкевикс тев. Виде, Людмила Андреевна теде мейле эште ламо важодемань таркат эстензэ мукшнось. Кодамо коллективсэ аволь ульнекшне, эрьвадонть ёвтни лембестэ, паронь ледстнезь. Вана нейгак Ромодановань муниципальной райононь администрациясо важодемстэ, организационной отделэнь прявтокс улемстэ, маряви сон чинек-венек палы эсь тевсэнзэ.

Ламо тееме ды эрьва ков кенереме тонавтынзе кавонест цёранзо: Алексеень ды Андреень. Сынь прядсть вузт, ней важодить МР-ва МВД-нь ГИБДД-сэ. Алексей Александрович школанзо парсте прядомадо мейле тонавтнесь Саранскоень кооперативной институтсо «Юриспруденция» специальностенть коряс. Сон ламо эйкакшонь триця тетя – ниле эйдензэ. Андрей Александрович васня тонавтнесь Н. П. Огарев лемсэ МГУ-нь электронной техникань факультетсэ, мейле прядызе теке вузонь юридической факультетэнть. Сонзэ кавто эйкакшонзо.

Вана истя, Людмила Андреевнань ней кото нуцьканзо, сынь кенярдовтыть эрьва кодамо ёрокчисэ: якить музыкальной школав, вечкить спортонть. Людмила Андреевна весе ютко шканзо алты сыненст. Нать, самай теньсэ тейтерь-аванть уцяскась!
Мартонь 8-це чинь кенярксчистэнть ули меленек арсемс те мазый авантень шумбрачи, седеяк покш уцяска ды парочи!

Валентина Юдина
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».