Вторник, марта 19, 2024
Важное

Саранск ошонь школатнесэ вейксэньгемень ниле тонавтыцятнень ютксто 37 ветить мокшонь кель, 57 – эрзянь. Юткстост ламотне те тевенть топавтыть аволь вейке ие. Вейкесь эйстэст – Любовь Дмитриевна Осяева, кие вана уш кода 10 ламо иеть вети эрзянь келень урокт Саранск ошонь 5 № школасо.



Любовь Дмитриевнань весе эрямозо, ловт, сюлмавозь школанть марто. Те тевентень вечкемань сяткине седейсэнзэ кирвазсь уш сестэ, зярдо сонсь тонавтнесь школасо. Мелесь улемс тонавтыцякс ветизе васня Зубова-Полянань педагогической училищав. Сонзэ прядомадо мейле (1980 иестэ) поладызе тонавтнеманзо М.Е. Евсевьев лемсэ МГПИ-сэ. Тонавтомань тевензэ ушодызе 1986 иестэ Покш Березникень Госагыр чачома велесэнзэ. Ды 17 иеть эсензэ эрямосто макссь те школантень, сынст ютксто кемень иеть топавтсь директоронь тевтнень.

Седе тов уцясказо пачтизе Саранскоев. Тесэяк сон эзизе полавто вечкевикс тевензэ лия лангс, кармась ветямо эрзянь келень урокт васня Саранск ошонь 40 № школасо, мейле сась 5-це № школав. Ды вана уш кеменде ламо иеть Любовь Дмитриевна Осяева тонавты эйкакшт эрзянь келенть содамо 2-це классто саезь 7-це классос.

Улемс тонавтыцякс – те аволь ансяк верьга кандомс тонавтыцянь лементь. Те тевесь веши пек ламо вийть, кармавты свал улемс анококс цидярдомс эрьва кодат стакачитнень, конат стякшныть сонзэ кинть лангсо, терди а кадновомс эрямонть эйстэ ды апак лотксе тонавтнемс эстензэяк. Весемеде питнеекс эсензэ важодемасо Любовь Дмитриевна лови сень, кода муемс виде кинть эйкакштнень седейс, кода кирвазтемс сяткине сынст оймесэ. Истямо ладсо вана уш 40 иеть кода лади эсь тевензэ Любовь Дмитриевна Осяеваяк.

…Сон – сэрей, мазый ава. Корты сэтьместэ, апак капша. Вайгелезэ чевте, вановтозо лембе. Весть неемстэнзэ уш мерят, те аванть тунь арасть кежензэ. Оймень коряскак сон седеймариця, ломанень вечкиця, паронь арсиця. Ды те алкукс истя. Любовь Дмитриевна сеть ломантнень ютксто, кить эрямост перть лаказь лакить тевсэ, кемить ансяк эсест виест лангс. Сон эри истямо коень коряс: саик лангозот канстонть, иля мере – стака ды а кандови. Кодамо стака илязо уле, а вечки пеняцямо мезе лангскак. Кодамо илязо уле эйкакшось, Любовь Дмитриевна соды, кода мартонзо кортнемс, кодат валт ёвтамс. «Кежсэ мезеяк а теят.
Эйкакштне вечкить, зярдо мартост чевтестэ ды валанясто», – корты сон.
Паросо пандыть эйкакштне эстензэяк. Кунсолыть эйсэнзэ. Топавтыть эрьва энялдоманзо ды кармавтоманзо. Любовь Дмитриевна машты ладямо уроконзо, сынст эйсэ кияк а ашти пельсудозь ды нузялдозь. Сон весенень муи тев. Кинь кармавтсы прянь яжамо содамоёвкс лангсо, кинь – валморонь ловномо, кинь – морамо эли сценкасо налксеме.

Секс, паряк, кевкстеманть лангс: «Школасонк эрсить-арась истят тевть, зярдо эйкакшонть арась мелезэ тонавтнемс эрзянь келенть?», Любовь Дмитриевна апак пеле мерсь: «Истят тевть монь арасельть. Эйкакштне якить паро мельсэ». Ды сеске ёвтызе мелявксонзо сень коряс, мекс киртизь тиринь келень тонавтома шканть, кадсть ансяк таргозонзо кавто част. Сеяк, вейке час – урок, омбоцесь – факультатив.

– Истя теемс аволь эряво. Эряви-арась тонавтнемс тиринь келенть минек школатнесэ, теде, койсэнь, а мезекс ульнесь кевкстнемс тетятнень-аватнень кедьстэ. Бути истя тейсть, сестэ кадык кармить тетятнень-аватнень кедьстэ кевкстнеме лия предметтнэнь тонавтомаст коряскак. Минь эрятано эсенек тиринь масторсо ды эряви весенень содамс минек раськенть коензэ-кирданзо, эрямопингензэ ды, васняяк, тиринь келенть.

Эсензэ меленть-арсеманть тонавтыцясь а сёпи тетятнень-аватнень марто кортнемстэяк. Ды свал мукшны мартост вейке-вейкень чарькодема. Истямо ладсо кортнезь, сынст школасо арасель истямо тев, зярдо тетятне-аватне молевельть эрзянь келенть тонавтоманзо каршо.
Кода эрьва тонавтыцясь, сехте покш казнекс лови сень, зярдо сонзэ кедьсэ тонавтниця эйкакштне лиснить изницякс тиринь келень коряс эрьва кодат пелькстамотнесэ. Истят изнявкстнэде ульнесть аволь аламо.

Любовь Дмитриевна весе седейсэ мелявты тиринь келенть сы шкань уцясканзо кисэ ды терди весень вейсэнь вийсэ кундамс сонзэ ванстомо ды а максомс тензэ ёмамс.

Раиса Щанкина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».