Вторник, марта 19, 2024
Важное

Течи, ноябрянь 10-це чистэ, эсь профессиональной кенярксчист тешкстыть Российской Федерациянь Внутренней тевень органтнэсэ важодицятне. Зярдо-бути те профессиясонть службанть кандсть ансяк виев, мездеяк а пелиця алкуксонь цёратне. Меельце шкастонть жо те тевенть марто седе сеедьстэ эсь эрямост сюлмить тейтерь-аватнеяк.

Истятнэнь ютксо минек течинь героинясь, Россиянь МВД-нь «Ичалковский» ММО-нь полициянь 7 № пунктонь (Покш Игнатовань районось) кемгавксово иеде седе вишкинетнень тевест коряс инспекторось, полициянь капитанось Виктория Викторовна Бочкарева. Те виев обуця авась полициясо важодемантень макссь уш малав комсь иеть ды вейкеяк чи эзь янксе эйкакшпорасто кочказь тевденть.

Виктория Бочкарева чачсь Ицялонь буесэ, зярыя шкадо мейле семияст ютась эрямо Покш Игнатовав. Школадо мейле тейтересь мольсь тонавтнеме Н.П. Огарёв лемсэ МГУ-в, прядызе биологиянь ды биотехнологиянь факультетэнть. Ансяк вана те специальностенть коряс важодемс тейтерентень эзь саво, районсост истямо ёнксонь коряс таркатнеде аволь уш пек ламо. Секскак эсь тонавтнеманть сон поладызе заочна юридической факультетсэ.

– Мон прядыя вузсо тонавтнемам ды сынь эсенек районов, – ёвтни Виктория Бочкарева. – Сынь важодеме сестэ эштё милицияв ды сеске кемгавксово иеде седе вишкинетнень тевест коряс подразделенияс. Мольсь 2004 иесь, монсь эштё одолинь, 23 иеть ансяк тень ульнесть. Ульнесь пелема, сатыть-арась вием, содамочинь истямо тевентень. Кода карман роботамо, монськак эштё аламо мезе содан, эсень туртов весемесь од. Тень лангс апак вано, ушодынь тесэ роботамо. Пек ламо тень лездась икелень инспекторось Владимир Фёдорович Темаев. Сон весементень тонавтсь, толковась, кода улема те эли тона тевсэнть, кода муема кель-вал эйкакштнень ды од ломантнень марто.

Кода ёвтни Виктория Бочкарева, школасо тонавтнемстэ сонзэ ульнесь пек покш мелезэ улемс военноекс. Ансяк эрямось ладявсь аламодо лиякс ды ней сон важоди военнойтнененьгак малавикс тевсэнть.

– А меревлинь: мон эстень тевенть кочкия апак сода, апак чарькоде. Те а истя, – тешксты Виктория Викторовна. – Мон вишка пингстэ саезь ламо мезе содылинь органтнэсэ службадонть. Покштям Алексей Фёдорович Сонин милициясо службантень алтызе весе эрямонзо. Ламо тень ёвтнекшнесь эсь важодемадонть, ламо превс путомат макснесь. Сонзэ лангс ванозь, мон те тевенть кочкияяк.

Кода тешксты авась, зярдо ушодызе важодеманзо, тевтнеде ульнесть седе ламо. Васняяк, районсонть од ломантнеде ульнесть зярыяксть седе ламо неень шкань коряс. Теке марто сестэ компьютерт арасельть ды документтнэнь марто роботась ульнесь конёв лангсо. Ней жо весементь эряви кандомс электронной базатнес. А те саи пек ламо шка.

– Минек важодемасонть прявтось – кемгавксово иеде седе вишкинетнень ютксо закононь коламотнень анолдамось, правоохранительной органтнэнь учётсо аштиця эйкакштнень марто важодемась. Кеме сюлмот кирдтяно тонавтнемань учреждениятнень марто. Нейгак вана ансяк сынь школасто. Тосо ульнесь классной час, кортынек правовой тематиканть коряс. Школасо тонавтницятнень марто сеедьстэ ютавтовить панжадо урокт, толковави тенст законодательной базась, ёвтневи ответственносттенть, конань кандыть кемгавксово иеде седе вишкинетне те эли тона закононь коламонть, апаро тевень тееманть кис. Ламо кортатано наркотиктнень тевс нолдамонть коряс. Неть кевкстематнень эйкакштнень марто эряви кортамс, эряви весементь толковамс, штобу сынь чарькодевельть, те аволь стяконь тев, сынст иетнень лангс апак вано, каршо вал сави кирдемс.

Кода мерсь Виктория Бочкарева, эйкакштне ды од ломантне районсонть иестэ иес аламолгадыть. Нама, те пек берянь. Теке марто ПДН-нь инспекторось содасынзе малав весень. Важоди эрьванть марто, кинь коряс улить кевкстемат.

– Теке марто ули вадря ёнкскак – эйкакштнень ды од ломантнень теевть преступленият минек районсонть а тешкставить уш зярыя иеть. Нама, закононь аволь стака коламот улить. Эйкакштне таргитькак, ней вана кезовонть марто маскатнень мельга пштистэ ваннотано. Кенярдовты – покш зыянов тевть арасть, – кемексты Виктория Викторовна.

Покш Игнатовань районсо В. В. Бочкарева ПДН-нь инспекторось ськамонзо. Важодемантень сави явомс малав весе шканзо.

– Минек важодемасо тешкстазь част арасть. Эсь тевенть топавттано читькак ды сеедьстэ ветькак, – корты Виктория Бочкарева. – Од ломантнень шкаст – чокшнесь ды весь. Секскак те шкастонть дежурятано. Ней вана кезовонть марто мероприятият а ютавтневить, эйкакштне седе ламо аштить кудосо. Ансяк тень лангс апак вано, важодемась ютавтови седеяк покш. Монь эсеньгак ули тейтерем, ней уш студентка. Ансяк монь кинть эзизе кочка. Мерсь тень: «Авай, монь арась мелем роботамс те системасонть». Ды тень мон парсте чарькодьса. Сон зярс ульнесь вишкине, монь малав эзь некшне. Мон седе ламо лиятнень эйкакшост марто важодинь-котьминь.

Теке марто Виктория Бочкарева тешкстызе, ней эйкакштнеде башка седе ламо сави роботамс тетятнень-аватнень марто. Важодема ютавтови сеть семиятнень марто, косо тетятне-аватне эсь тевест а топавтыть. Истят семиятне саевить башка вановт алов, кортыть-роботыть мартост. Кие-бути пурны превть, полавтови паро ёнов, кие-бути жо пачкоди сеньс, мик тетянь-авань праваст саевить.

– Мон меревлинь бу, тетятнень-аватнень марто роботамс, паряк, седеяк стака. Эдь эрьванть эйкакшозо сехте вадря, сехте превей. Сынь а кемить, што эйкакшост чалгась аволь виде ки лангс, – ёвтни Виктория Викторовна.

Парсте важодемань кисэ В. В. Бочкарева аволь весть тешкстазь Почётонь грамотасо ды Благодарностьсэ. Республикасонок ютавтозь ПДН-нь инспектортнэнь ютксо профессиональной ёрокчинь пелькстамосо сайнесь колмоце тарка.

– Ней вана арсян ды овсе а янксян эсь эрямонть полициясо службанть марто сюлмамонть коряс. Косо эштё мон муевлия эсь прям. Нама, улить стакачить. А шожда ней роботамс эйкакштнень ды од ломантнень марто, сынь ней пек явовить икеленсетнень эйстэ. Ансяк, мезеяк лангс апак вано, мон вечкса эсь роботам ды покш мельсэ топавтан сонзэ, – корты Виктория Бочкарева.

 

Юлия Еремина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».