Вторник, марта 19, 2024
Важное

Эрьва ие ноябрянь куншкавидьстэ минек республикасо тешкставкшны Велень хозяйствань важодицянь чись. Те шкантень аграрийтнень уш прядовить паксянь весе тевтне: сюротне урядавить, ламбамо якстерькаесь таргави, эмежтне пурнавить. Ды, эряви меремс, те кенярксчись ашти прявтокс ламот предприятиятнень ды организациятнень туртов, эдь Мордовиясь – аграрной регион.


Истят предприятиятнень ютксо «Тепличное» АО-сь, конань прявтсо уш малав 40 иеть содавикс аграриесь, эсь тевень покш профессионалось, РФ-нь ды МР-нь велень хозяйствань заслуженной роботникесь Александр Михайлович Живаев. Неень шкасто предприятиясь сови «РОСТ» компаниятнень группас, конась ловови вадря эмежень кастомань коряс Россиянь рынкасо прявтокс ды вейсэнди теплицань кемготово комплекст весе масторонть келес. Тесэнь теплицатнесэ эмежтне кастовить иень перть, а вана паксянь тевтне, кода республикань ламот хозяйстватнесэ, прядовома лангсот.
Неть читнестэ хозяйствасонть пурнасть капстанть. Зяро озавтозь те эмежденть, кодамо сон чачсь ды кода эйсэнзэ урядыть, ловнодо минек материалстонть.

Те иесь эмежень кастомань хозяйстванть туртов кармась а берянь. Сюрось чачсь вадря, модамартне ды чурькась кассть покшт, удаласть пурькаськак, ярсамонь туртов якстерькаеськак, капстаськак ды лия эмежтнеяк.

– «Тепличное» АО-нть моданзо весемезэ 1490 ламо гектарт, сокавицятнеде-видевицятнеде – малав 1400 гектарт, – ёвтни производствань коряс цехень прявтось Анатолий Васильевич АДМАЙКИН. – Малав 1200 гектартнэс видезель яровой ды озимой товзюро. Сюрось чачсь вадря. Гектарсто саезь 45 центнерт. Эштё сядо гектарт явозельть модамаренть алов. Сондензэ гектарсто пурназь 353 центнерт, весемезэ жо малав 2500 тоннат. Лия эмежтнеде видезельть 67 гектарт. Сынь истя жо макссть а берянь урожай.

Ошось минек аволь сехте покштнестэ, эмежтнень эрявиксчиськак вишкине. Секскак седе ламо видемс а мезекс. Икеле иетнестэ виднилинек седе ламо, ансяк весемесь а миевиль, истя покшолматнень вишкалгавтынек. Ней, кода икеле иетнестэяк, аволь теплицас, а панжадо модас озавтокшнынек модамарть, капстат, пурькат, чурькат, ярсамонь туртов якстерькайть, кабачокт. Мезесь-бути юты эсенек консервань анокстамонь цехс, кадовозесь явови ошонь социальной учреждениятнес ды миеви эрицятненень.
Неень шкане хозяйствань паксятнесэ кадовсь урядамс капстанть ды пурьканть. Ансяк пиземетне зярс таргсевтить шканть ды а максыть прядомс неть тевтнень.

– Нама, пиземетне минек важодеманть аламодо колыть. Ютазь иенть коряс, зярдо неть числатнес паксянь тевтне уш весе прядозельть, шкась таргавсь. Капстанть урядамонзо ней вана прядтано, кадовсь эштё аволь ламо пурькадонть, – ёвтни Анатолий Адмайкин. – Капстадонть те иестэ хозяйствасонть путозельть 28 гектарт. Чачсь сон а берянь: капстапрятне покшт, кеметь. Вейке паксясонть видезь «Атрия» сортось. Сонзэ урожайностесь 900 центнерт гектарсто. Сон седе лади теленень свежасто кадоманть туртов, ванстови парсте февраль-март ковтнес. Секскак сонзэ пурнатано ды сеске усктано экшень кирдиця таркатнес. Шабра паксясо озавтозь капстанть жо пурнатано салтоманть-чапавтоманть ды ней миеманть туртов. Тосо сонзэ урядыть транспортёрсо.

Зярдо ульнинек хозяйствань паксятнесэ, капстанть урядамосо важодсть малав ниленьгемень ломанть. Веенст сонзэ керясть, лиятне жо пурнасть ды стамбарнэстэ вачкасть тракторонь тележкас.
Капстань керицятнень ютксо эмежень кастыцясь Наталья Викторовна МАКАРОВА. «Тепличное» АО-со авась важоди малав кото иеть. Эсь роботанть вечксы ды корты ланганзо мельспаросо.

– Те хозяйствантень важодеме сынь содавикс ломантнень ёвтнемадост мейле. Сынь ды эзинь янксе, – корты Наталья Макарова. – Весе те шканть перть роботан эмежень кастыцякс. Минек важодемась седе ламо шкань перть – тунда, кизна ды сёксня – моли паксясо. Тельня жо складсо тевтнень тейтяно: анокстатано продукциянть лавкасо ды ярмункатнесэ миеманть туртов. Майстэ ушодовить паксянь тевтне – озавттано капстанть. Эряви меремс, сонзэ минь малав весе озавттано кедьвийсэ, техникась тевс нолдавкшны чуросто. А мейле эмежтне кенерить ды ушодови сынст урядамонь шкась. Ноябрянть самс важодтяно паксясо, зярс весе урожаесь а пурнави. Тедеде пиземетнень кувалма шкась аламодо таргавсь. Ансяк те мезеяк, маласо читнестэ весементь прядсынек.

Наталья Викторовнанень мельс тукшны аволь ансяк важодемась, сон тешксты, кодат вадрят ды чарькодицят предприятиянь прявттнэ ды целанек коллективесь. Важодемасо эдь эрси эрьва мезе, секскак тесэ бажить эрямс ояксчисэ ды лездамс вейке-вейкенень. Лиякс а кода.
Важодемадо мейле Наталья Викторовна весе юткошканзо алты семиянзо туртов. Макаровтне трясть-кастсть кавто тейтерть, конатнень кувалма сынь аштить каштанчисэ. Покшось, Елена, важоди ды сонськак уш ава. Вишкинесь, Мария, тонавтни Нижней Новгородсо. Бажи улемс криминалистэкс.

Те чистэнть хозяйствасонть капстанть урядамо лисекшнесть аволь ансяк эмежень кастыцятне, предприятиянь ламот лия важодицятнеяк.
Алексей Дмитриевич ТИМИН «Тепличнойсэ» важоди суликань путницякс (стекольщикекс). Свалшкане сон котьми строямонь-витнемань тевтнесэ. Ней жо лезды паксясо.

– Эсь предприятиянтень лездамс эряви. Те шкастонть весе вийтнень макстано паксянь тевтнень прядомантень, – тешксты Алексей Тимин. – Минь тесэ зярыянек 1-це № цехень важодицят. Цехсэнть ней молить строямонь тевтне. Сон целанек одкстомтови-вадрялгавтови. Течи тесэ лездатано, ванды поладсынек эсенек тевенек.
Ды, алкукскак, цёратнень марто роботась моли седе эрязасто ды кецязь. Сынь виевтькак, тесэнь важодемась тенст овсе мезекскак а маряви.

Надежда Александровна ВИЛКОВА – консервань теема цехень важодиця. Истя жо сась лездамо паксясто капстанть урядамосо.
– Свалшкане важодян консервань теема цехсэ – анокстатано кабачоконь ды лия эмежень икра, солянка ды эмежень лия консерват. Кизэнь-сёксень шкатнестэ паксянь тевтнесэ лездатано, – ёвтни Надежда Вилкова. – Ней вана капстанть урядасынек ды мейле сонзэ карматано салтомо-чапаськавтомо.
Надежда Александровна тешкстызе, предприятиясонть важодемась сонензэ мелень коряс, эдь чачсь-кассь велесэ. Авась Покш Березникень Пермезьстэ.

– Велень тевтне монь туртов содавикст эйкакш шкасто саезь. Секскак, зярдо 22 иеде икеле сынь важодеме эмежень кастома предприятияс, эсень туртов покш стакачить эзинь муе. Малав весемесь уш ульнесь содавикс, весемесь чарькодевикс. Нама, консервань теема цехсэ важодемань ёрокчитнес аламодо тонавтнинь, ансяк теньсэяк мезеяк стакась арась. Ней уш кедтне сынсь весементь теить. Ды минек предприятиясо истят весе важодицятне – роботань вечкицят, ёроковт ды эсь тевентень чарькодицят, – тешкстызе Надежда Вилкова.

Юлия Еремина
Фототне Эдуард Ретунскиень

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».