Четверг, октября 28, 2021
Важное

Покш ды мазый кенярксчи ютась аволь умок Челяба ошсо. Тесэ тешкставсь ошонть чачома чизэ, ютавтовсь Общественно-политической вернисаж ды сонзэ юрсо пурназель национально-культурной вейсэндявкстнэнь куншкакуро.

Эсь пряст невтеме тов сакшность Челяба ёнксонь весе раськетнень ломантне, конатне анокстакшность эсест шкинемаст, ярсамопелест, оршамост выставкат. Челябань эрзятнеяк эзть кадово ве ёнов. Аволь умок те ошсонть чачсь сынст вейсэндямонь од таркине: Южной Уралонь эрзятнень ды мокшотнень автономия. Сонзэ пурныцясь – тосонь эрзянь тейтересь Ольга Лысенко. Ольгань ундоксонзо Ульяновск ёнкссто, умоконь-умок сонзэ бабазо ускизе Ольгань аванзо Челябав, ды нуцьказо эрзянь келенть марсесь ансяк кизна Ульяновскоень патятнень-сырькайтнень кедьсэ оймсемстэ. Ялатеке веренть а манясак, ды Ольгань седейсэ меельце иетнестэ пек кассь мелесь содамс эсь раськеденть седе ламо ды вейсэндямс аволь ансяк Челяба ёнксонь, шабра областтнень эрзятненьгак ды мокшотненьгак. Истя панжовсь национально-культурной куншкакурось. Ней уш анокт весе эрявикс конёвтне, Ольга панжсь башка лопа Инстаграмсо ды терди весень совамс тозонь. Ольга а содасы эрзянь келенть, ансяк те а меши тензэ марямс прянзо тиринь раськенть пельксэкс. Курок ютавтовиця эрицятнень сёрмадстомстояк сон сёрмадсы прянзо «мордовкакс-эрзякс».

Ольга сонсь пек мазый тейтересь, фотомодель, топавты зярыя проектт, вечкевикс ни (сонзэ кавто эйкакшонзо) ды пек эряза ава. Зярдо ошонь прявттнэ тердизь сонзэ ды кевкстизь, мезе сонзэ куншкакурось невти кенярксчистэнть ды кие карми морамо эрзятнень-мокшотнень пельде «Кемть койтнес-кирдатнес!» («Верь в традиции!») концертсэнть, Ольга нусмакадсь, эдь сон ансяк ушоды. Арасть тейтеренть а оршамонзо, а морыцянзо, ансяк палыця седеесь ёвтась виде ки. Ольга гайневтсь Мордовияв эрзянь ды мокшонь раськень регионъютконь вейсэндявксонтень ды пшкадсь лезкс мельга Юрий Александрович Мишаниннэнь. Вейсэнь арсематнеде-вешнематнеде мейле Челябав таштамковонь 4-це чистэ састь эрзянь морыцясь Артём Мамаев ды Мордовиянь раськень театрань оршамопелень арсицясь, дизайнерэсь Елена Киреева. Ольга Лысенко Киреевань эрзя-мокшонь стилизованной оршамопелень коллекциянзо неизе Инстаграмсо ды сеске чарькодсь, истямо мазычись ваныцятнень а кадсынзе мельтеме. Истя лисськак! Сонсь Ольга пандызе дизайнерэнть килангонзояк, истя тензэ вечкевсть оршамотне. Кенярксчинтень анокстамсто мартонзо эштё сюлмавсть зярыя эрзянь ломанть, сынь вейсэ анокстасть а покш выставка, косо невтизь мокшонь кезэрень палянть, эрзянь викшневкс марто някатнень. Мусь сон модельтькак, конатне сцена лангсо невтизь Елена Киреевань коллекциянзо. Ольгань мельсэ анокстамс эштё зярыя покш вастовомат, тейтересь бажи самс инжекс Мордовияв ды арси, тевезэ топавтови те сёксестэнть. Алкуксонь сырнень покольне чачсь Челябань менельсэнть. Кадык сонзэ тевензэ туить!

Кода жо весе ютась тосонь кенярксчистэнть, минь кевкстнинек Мордовиясто участниктнень: Артём Мамаевень ды Елена Киреевань.

 

Артём Мамаев:

«Ваныцятне кувать эзимизь нолда сцена лангсто»

 

Артём Мамаев мельспаросо вастызе тердеманть молемс Челябав морамо покш сцена лангсто. Васняяк организатортнэ мерекшнесть морамс тензэ вейке моро эрзянь эли мокшонь кельсэ. Артём истя тейськак, серьгедизе «Ардан мон кудов» моронть, ансяк ваныцятне эзизь нолда кодаяк ды секе-тев пижнесть «браво» ды «бис». Савсь поладомс ды морамс эштё кавто: эрзякс «Тон монь седеем, монь сырнень покольнем» (рузонь кельстэ ютавтызе Раиса Щанкина) ды мокшокс «Велев молян мон» (музыкась Василий Родионовонь, стихтне Вера Брындинань). Анокстазь репертуарсонзо ульнесть эштё кавто рузонь морот, ансяк Артём кода-бути эзь смея морамс седе тов, эдь лиятне ансяк вейкень-вейкень морасть. Сон жо – колмо! Аудиториясь пек лембестэ вастсь эрзянь цёранть, кона мораськак эрзянь панарсо. Кадык а весе чарькодизь моротнень, ялатеке марявсь пельдест алкуксонь седейлембе. Кой-кить ушодсть киштеме ды мельганзо морамояк.

«Ваксозонок сакшнось эрзянь ава, сон эри Челябасо, лемензэ ёвтызе Вирень инзейнекс. Минь мартонзо ламо кортнинек, снимавтнинек. Тердицянок Ольга Лысенко ютавтсь ошканть экскурсия. Монень пек вечкевсть тосонь ломантне, а покшкавтницят, мизолдыцят. Паряк, Челябанть марто сюлмотне касыть-кемекстыть. Паро бу улевель тосо ютавтомс эсень концерт», – арси Артём.

 

Елена Киреева:

«Губернаторонь нись Ирина Текслер

снимавтсь монь

коллекциянть

марто»

 

«Челябасо минек Артём марто вастымизь пек лембестэ. Ошонть куншкасо вернисажсонть минь тосонь тейтертнень-модельтнень марто (ютксост ульнесь сонсь Ольга Лысенкояк) невтинек монь «Нарда» коллекциянть ды Валентина Мишанинань «Куйгорож» спектаклястонть оршамопельтнень. Сынь весе теезь од вешематнень коряс, ансяк эрзянь ды мокшонь раськень викшневкстнэнь, тешкстнэнь марто», – ёвтни эрзянь тейтересь, раськень театрань дизайнерэсь Елена Киреева.

Те кедьчелькев тейтеренть ставкстнэ аволь весть невтневсть эрьва кодамо выставкасо ды 2017 иестэ лиснесть изницякс Евразиянь «Этно-эрато» раськень оршамопелень конкурссонть «Сехте вадря финнэнь-угрань раськень оршамопель» номинациясонть. Ней сынь дивавтызь Челябань весе эрицятнень.

«Минь ульнинек сехте мазыекс ды эрязакс. Савсь эстеньгак лисемс сцена лангс, модельтнеде эзть сатно. Ютамодонть мейле ваксозонок састь ламо ломанть, лия регионстояк, весе бажасть мартонок снимсемс, тердсть эстест инжекс. Челябань краеведениянь музеень прявттнэ ёвтасть мель стявтомс коллекциянть эсест музейс ды невтнемс эрицятнень туртов. Талнозевинек, зярдо малазонок састь сынсь организатортнэ ды ютксост губернаторонть Алексей Текслерэнь нись – бизнес-ледись, мазый авась Ирина Текслер, ды тешкстынзе оршамотнень мазычист ды лия ёнов а молиця ёнксост. Сон истя жо снимавсь мартонок ды яла кевкстнесь, мекс те шкас а содыль те коллекциядонть. Те авась – содавикс «модница» ды сонзэ пельде шнамонь валтнэ монень теке медень тансть», – ёвтни Елена ды полады, келя, Челябанть марто сюлмотнень сон бу поладовлинзе ды Ольга Лысенко марто сынь арсить топавтомс эштё зярыя вейсэнь проектт.

Меельцекс тешкставлия: пек паро, улить минек од ломантнень ютксо истят, кить а пелить а васоло килангодо, а васоло ошто, косо киньгак а содыть, ды ялатеке сыргить невтеме эсь шкинемаст, эсест тиринь раськест ды сыть тосто изнямо марто. Мельспаросо аштян сень кувалмаяк, регионтнэсэяк эрзянь ды мокшонь раськень од ломантне кармасть таргамо лангс эсест ундоксост ды бажить пурнамс перькаст истят жо тиринь келенть, койтнень-кирдатнень ванстомань кисэ аштицятнень.

Тешкстама: Челябань ёнкссо, 2010 иестэ ютавтозь эрицятнень сёрмадстоманть коряс, эрясть 12 тёжадо ламо эрзят ды мокшот. Сехте ламотне Челяба ошсо – 3 тёжат, Магнитогорскойсэ –

1 тёжа, Златоустсо ды Миассо – кодгеменень-кодгемень.

 

Марина Девятова

 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».